Di Jɔj Dɛm 7 - Krio Fɔs Oli Baybul

Gidiɔn Fɛt Ɛn Bit Di Midianayt Dɛm

¹ Jerubabɛl, (dat na Gidiɔn) ɛn ɔl di pipul dɛn we bin go wit am, grap ali mɔnin go kamp na Arɔd watasay usay wata de kɔmɔt ɔnda grɔn. Di Midianayt dɛn yon kamp bin de nɔth to dɛn yon, dat nainsay di vali nia Morɔ Il.

² PAPA GƆD tɛl Gidiɔn se nid nɔ de fɔ kɛr ɔl dɛn pipul dɛn de fɔ go fɛt di Midianayt dɛn, bikɔs we dɛn go win, dɛn go se na dɛn yon pawa ɛn trɛnk dɛn tek win; dɛn nɔ go prez in PAPA GƆD fɔ dat.

³ So i se lɛ Gidiɔn anawns to di pipul dɛn se ɛnibɔdi we de fred, lɛ i go om. We Gidiɔn tɛst dɛn, na twɛnti-tu tawzin man bin kɔmɔt Mawnt Giliad tɔn bak go om, ɛn na tɛn tawzin bin lɛf.

⁴ Bɔt PAPA GƆD tɛl Gidiɔn se dɛn stil plɛnti. I se lɛ Gidiɔn kɛr dɛn go na di watasay mek in PAPA GƆD go tɛst dɛn, ɛn ɛni wan we in se fɔ go wit Gidiɔn, fɔ go wit am. Bɔt ɛni wan we in se nɔ fɔ go wit am, nɔ fɔ go wit am.

⁵ So Gidiɔn kɛr di man dɛn go na di watasay. Nain PAPA GƆD tɛl Gidiɔn se lɛ i sheb di man dɛn to tu grup; di wan dɛn we go drink wata di we we dɔg kin drink fɔ de wan say, ɛn di wan dɛn we go nildɔŋ drink, fɔ de wan say.

⁶ Di man dɛn we bin bel di wata wit dɛn an tinap de drink, na bin tri ɔndrɛd; ɔl di balans bin nildɔŋ drink wata.

⁷ Nain PAPA GƆD tɛl Gidiɔn se na wit di tri ɔndrɛd man we bel wata na dɛn an tinap drink, in go fri Izrɛl ɛn mek dɛn kapchɔ di Midianayt dɛn. I se lɛ di balans man dɛn go na dɛn os.

⁸ Gidiɔn tek ɔl di provishɔn ɛn di trɔmpɛt na di ɔda pipul dɛn an ɛn mek dɛn go om. I bin lɛf wit tri ɔndrɛd man. Di Midianayt dɛn kamp bin jɛs de bɔtɔm say na di vali.

⁹ Da sem nɛt de, PAPA GƆD tɛl am se mek i grap go fɛt di Midianayt dɛn na dɛn kamp bikɔs in go mek dɛn kapchɔ dɛn.

¹⁰ I se if Gidiɔn de fred fɔ go de go atak dɛn, lɛ i go waka de wit in wokman Pura,

¹¹ ɛn we i yɛri wetin dɛn de tɔk, i go gɛt maynd fɔ go atak di kamp. So, in ɛn in wokman we nem Pura go waka na di gyad dɛn we ol wɛpɔn dɛn eria na di kamp.

¹² Da tɛn de, di Midianayt dɛn ɛn di Amalekayt dɛn ɛn ɔl di pipul dɛn na di Ist, bin skata ɔlɔbɔt bɔku bɔku wan na di vali lɛk lokɔs; dɛn kamɛl dɛn bin so bɔku dat pɔsin nɔ go ebul kɔnt dɛn. Dɛn bin bɔku lɛk sansan na san bich.

¹³ We Gidiɔn rich na di Midianayt dɛn kamp, i yɛri wan pan dɛn de tɛl in kɔmpin wetin i bin drim. I se in drim se wan lof bred we dɛn mek wit bali, rol go insay dɛn kamp go nak wan tɛnt. I se i so nak am dat di tɛnt tɔn ɔpsay-dɔŋ ɛn lidɔm flat na grɔn.

¹⁴ Nain in kɔmpin tɛl am se i mɔs bi se na wan man na Izrɛl we nem Gidiɔn we na Joash in pikin, in sɔd; PAPA GƆD dɔn gi am pawa oba Midian ɛn ɔl in sojaman dɛn.

¹⁵ We Gidiɔn yɛri di man in drim ɛn wetin i min, i butu wɔship PAPA GƆD. We i go bak na dɛn yon kamp, i ala tɛl ɔlman se lɛ dɛn grap bikɔs, PAPA GƆD dɔn gi dɛn pawa fɔ kapchɔ di Midianayt dɛn.

¹⁶ Nain i sheb di tri ɔndrɛd man to tri grup ɛn gi ɔlman in yon trɔmpɛt wit ɛmti ja we gɛt faya insay.

¹⁷ Nain i tɛl dɛn se dɛn fɔ de luk am ɛn du ɛnitin we in du. I se we in kɔmɔt insay di kamp, lɛ dɛn du wetin in de du.

¹⁸ Gidiɔn tɛl ɔl di man dɛn we de fɛt wit am se, wɛn in ɛn di wan ɔndrɛd man we de wit am blo dɛn trɔmpɛt, ɔlman fɔ blo dɛn trɔmpɛt ɛn ala se, fɔ PAPA GƆD ɛn fɔ Gidiɔn.

¹⁹ So Gidiɔn ɛn di wan ɔndrɛd man we de wit am go nia di Midianayt dɛn kamp jɛs bifo twɛlv na nɛt we dɛn jɛs chenj di wachman dɛn, blo dɛn trɔmpɛt dɛn ɛn brok di ja dɛn we dɛn bin ol na dɛn an, na grɔn.

²⁰ Nain di balans man dɛn blo dɛn trɔmpɛt dɛn ɛn brok di ja dɛn we bin de na dɛn an. Dɛn bin ol di trɔmpɛt dɛn na dɛn raytan ɛn di tik we gɛt faya na dɛn lɛfan, so dɛn go ebul blo dɛn trɔmpɛt. We dɛn brok di ja dɛn, nain dɛn ɔl ala se, sɔd fɔ PAPA GƆD ɛn fɔ Gidiɔn.

²¹ Gidiɔn ɛn in man dɛn tinap rawnd di kamp ɛn di wanol ɛnimi ami rɔnawe de ala mɔdra.

²² We Gidiɔn in tri ɔndrɛd man bin blo dɛn trɔmpɛt, PAPA GƆD mek di Midianayt dɛn bigin fɛt dɛnsɛf wit dɛn sɔd. Dɛn rɔn go Bɛth Shita lɛk we yu de go Zarɛthan, te rich Ebɛl Mɛola we de nia Tabat.

²³ Nain Gidiɔn kɔl di man dɛn we kɔmɔt na di Naftali, Asha ɛn ɔl di Manasɛ fambul dɛn fɔ rɔnata di Midianayt dɛn.

²⁴ Afta dat, Gidiɔn sɛn mɛsej to ɔl di pipul dɛn na Ifrem we de na di Mawnten se, lɛ dɛn kan dɔŋ kam fɛt di Midianayt dɛn. I se lɛ dɛn ol Riva Jɔdan ɛn ɔl di ɔda watasay dɛn te rich Bɛthbara, so di Midianayt dɛn nɔ go krɔs dɛn fɔ rɔnawe. Gidiɔn mek di man dɛn we kɔmɔt na di Ifrem fambul ol di Riva Jɔdan ɛn di watasay dɛn we de te rich Bɛthbara.

²⁵ Dɛn kapchɔ di tu Midianayt prins we na Ɔrɛb ɛn Ziɛb; dɛn kil Ɔrɛb na Ɔrɛb ston ɛn Ziɛb na di ples we dɛn de mek wayn we nem Ziɛb, bɔt dɛn bin stil de rɔnata di Midianayt dɛn. Dɛn bin kɛr Ɔrɛb ɛn Ziɛb dɛn ed go to Gidiɔn oba Riva Jɔdan.