Di Jɔj Dɛm 6 - Krio Fɔs Oli Baybul

Gidiɔn

¹ Di Izrɛlayt dɛn du bad bad tin dɛn na PAPA GƆD in yay bak; so PAPA GƆD mek di Midianayt dɛn kapchɔ dɛn fɔ sɛvin ia.

² Bikɔs di Midianayt dɛn traŋa pas di Izrɛlayt dɛn, di Izrɛlayt dɛn mek kev ɛn ɔda ples dɛn fɔ ayd na dɛn mawnten, ɛn ples we dɛn ɔl kin mit sikrit wan ɛn du tin dɛn.

³ Bikɔs ɛnitɛm we di Izrɛlayt dɛn plant ɛnitin, di Midianayt ɛn di Amalɛkayt ɛn dɛn pipul dɛn we tap na di dɛzat kin atak dɛn;

⁴ dɛn go kam siz dɛn land bay fos ɛn pwɛl ɔl wetin dɛn plant insay di wanol land, te rich Gaza bɔda. Dɛn nɔ kin lɛf natin na Izrɛl; dɛn kin kɛr ɔl dɛn ship, got ɛn dɔŋki go.

⁵ We dɛn kin de kam wit dɛn kaw, dɛn tɛnt ɛn dɛn kamɛl dɛn, dɛn kin fiba lokɔs; dɛn kin so plɛnti dat yu nɔ go ebul kɔnt dɛn, ɛn na so dɛn kin pwɛl ɔltin na di land.

⁶ Layf bin bita fɔ Izrɛl bikɔs di Midianayt dɛn bin de mɔna dɛn, so dɛn beg PAPA GƆD wantɛm mɔ fɔ sɔri fɔ dɛn.

⁷ We di Izrɛlayt dɛn beg PAPA GƆD fɔ ɛp dɛn bikɔs di Midianayt dɛn de mɔna dɛn,

⁸ PAPA GƆD sɛn wan prɔfɛt go tɛl dɛn se, in PAPA GƆD we na Izrɛl dɛn PAPA GƆD se nain pul dɛn kɔmɔt slev na Ijipt;

⁹ ɛn i pul dɛn kɔmɔt ɔnda Ijipt, ɛn ɔnda ɔl di ɔda pipul dɛn we bin de trit dɛn bad. I se in ivin drɛb di pipul dɛn kɔmɔt na dɛn land ɛn gi Izrɛl di land.

¹⁰ I se, in bin tɛl dɛn se in na PAPA GƆD we na dɛn PAPA GƆD, so dɛn nɔ fɔ butu to di Amɔrayt dɛn we gɛt di land, dɛn gɔd dɛn. Bɔt dɛn nɔ gri du wetin i se.

¹¹ PAPA GƆD in enjɛl go sidɔm ɔnda wan big tik na Ofra, we na Joash we na Abizayt, gɛt am. Joash in bɔypikin, Gidiɔn bin ayd de de pul wit kɔmɔt na di tik, na di ples usay dɛn de pul wayn, so di Midianayt dɛn nɔ go si di wit.

¹² PAPA GƆD in enjɛl apia to Gidiɔn ɛn tɛl am se in na man we brev ɛn gɛt trɛnk, ɛn PAPA GƆD de wit am.

¹³ Nain Gidiɔn se, duya in beg, lɛ i ɛskyuz am, in wan aks am se if PAPA GƆD de wit dɛn, wetindu ɔl dɛn disgresful tin dɛn de, de mit dɛn. Gidiɔn aks se aw bɔt dɛn wɔnda tin dɛn we dɛn fɔstɛmpapa dɛn bin de tɛl dɛn bɔt; lɛk aw PAPA GƆD pul dɛn kɔmɔt Ijipt. Gidiɔn se PAPA GƆD luk dɔn fɔgɛt bɔt dɛn naw ɛn i dɔn alaw di Midianayt dɛn fɔ rul dɛn.

¹⁴ Nain PAPA GƆD tɔn to am ɛn tɛl am se in de sɛn am naw; lɛ i go lɛk man lɛk we in na trɛnkman so, go fri Izrɛl kɔmɔt na di Midianayt dɛn an.

¹⁵ Nain Gidiɔn aks am se aw in we na di las wan na di grup we wik pas ɔl na di Manasɛ fambul, go ebul fri Izrɛl.

¹⁶ Nain PAPA GƆD ansa an se in go de wit an ɛn in go mek i ebul kil ɔl di Midianayt dɛn lɛk we dɛn go kil wan pɔsin.

¹⁷ Nain Gidiɔn tɛl PAPA GƆD se if PAPA GƆD dɔn pik am fɔ tru, lɛ i du sɔntin we go sho se fɔ tru tru, nain PAPA GƆD de tɔk to am.

¹⁸ Nain Gidiɔn tɛl am se duya mek i nɔ go yet te in go tek in ɔfrin kam fɔ kam gi am. Nain PAPA GƆD se in go wet am te i kam bak.

¹⁹ So Gidiɔn go insay dɛn os go kuk wan yɔŋ got ɛn mek bred we nɔ gɛt yist wit tɛn kilogram flawa. I put di bif na baskit ɛn put di sup na pɔt kɛr am go ɔnda di kɔtintri go gi am.

²⁰ Di enjɛl tɛl am se mek i put di bif ɛn di bred we nɔ gɛt yist pantap wan big ston ɛn tɔn di sup pan dɛn. Gidiɔn du wetin i se.

²¹ PAPA GƆD in enjɛl tek di tik we i bin ol tɔch di bif ɛn di bred we nɔ gɛt yist; nain faya kech na di ston ɛn bɔn di bif ɛn di bred. Wantɛm wantɛm PAPA GƆD in enjɛl jɛs lɔs kɔmɔ de.

²² Na da tɛm de Gidiɔn biliv fɔ tru se na bin PAPA GƆD in enjɛl. So i se, O Lɔd mi PAPA GƆD, tide, a dɔn si PAPA GƆD in enjɛl fes to fes.

²³ Bɔt PAPA GƆD ansa am se lɛ i gɛt kolat ɔltɛm; lɛ i nɔ fred, i nɔ go day.

²⁴ So Gidiɔn bil wan ɔlta de fɔ PAPA GƆD ɛn kɔl am, PAPA GƆD na pis. I de te tide na Ofrɔ we blant di Abieza famili.

²⁵ Da nɛt de, PAPA GƆD tɛl Gidiɔn se lɛ i tek tu pan in papa in man kaw dɛn, di sɛkɛn wan fɔ ol sɛvin ia. I tɛl am se lɛ i brok in papa in ɔlta we i bil fɔ Baalath ɛn brok Ashɛra in imej we de nia di ɔlta.

²⁶ I se Gidiɔn fɔ bil ɔlta fɔ PAPA GƆD we nain PAPA GƆD pantap wan smɔl il, ɛn i fɔ le di ston dɛn tret ɛn fayn wan. Dɔn i fɔ bɔn di sɛkɛn man kaw as sakrifays na faya ɛn na di Ashɛra imej we i bin brok, i fɔ yuz fɔ mek di faya.

²⁷ So Gidiɔn mek tɛn pan in wokman ɛp am du wetin PAPA GƆD bin tɛl an fɔ du; bɔt bikɔs i bin de fred in fambul dɛn ɛn di man dɛn na di siti, i nɔ du am santɛm, i du am na nɛt.

²⁸ We di man dɛn na di siti wek na mɔnin, dɛn si se Baal in ɔlta dɔn brok, di Ashɛra imej we bin de nia am dɔn brok ɛn dɛn dɔn sakrifays di sɛkɛn man kaw na di nyu ɔlta.

²⁹ Dɛn ɔl bin de wɔnda se udat du ɔl dat. We dɛn aks aks, dɛn bin gɛt fɔ no se na Gidiɔn we na Joash in bɔypikin, du ɔl dat.

³⁰ So di man dɛn na di siti tɛl Joash se mek i kɛr in bɔypikin go na do so dat dɛn go kil am, bikɔs i dɔn brok Baal in ɔlta ɛn dɔn brok di Ashɛra imej we bin de nia am.

³¹ Naim Joash aks di pipul dɛn we go mit am fes to fes se, if na dɛn fɔ tinap ɛn fɛt fɔ Baal. I se dɛn go kil ɛnibɔdi we fɛt fɔ Baal bay mɔnin. I se if Baal no se in na gɔd fɔ tru, lɛ i fɛt fɔ insɛf we dɛn dɔn brok in ɔlta

³² Frɔm da de de, dɛn bigin kɔl Gidiɔn Jɛrubabɛl, we min se, lɛ Baal pɔnish am bikɔs i dɔn brok in ɔlta.

³³ Ɔl di Midianayt dɛn ɛn di Amalɛkayt ɛn di pipul dɛn we tap na di dɛzat gɛda, krɔs Riva Jɔdan ɛn kamp na Jɛzril Vali.

³⁴ Nain PAPA GƆD in spirit kam pan Gidiɔn; i blo di trɔmpɛt ɛn kɔl di Abiɛzrayt dɛn fɔ fala am.

³⁵ I sɛn mɛsenja dɛn to ɔl di Manasɛ fambul, di Asha fambul, di Zɛbyulɔn fambul ɛn di Naftali fambul. Dɛn ɔl go jɔyn am.

³⁶ Gidiɔn tɛl PAPA GƆD se, as in PAPA GƆD bin dɔn se i go put in Gidiɔn bifo fɔ fri Izrɛl,

³⁷ in Gidiɔn de le le ship ia usay dɛn kin mas rɛs, ɛn if we dyu fɔdɔm na di wul nɔmɔ sok, di grɔn dray, in go no datɛnde se PAPA GƆD go fri Izrɛl jɛs lɛk we i bin dɔn se.

³⁸ Ɛn na so i bi; Gidiɔn wek ali mɔnin ɛn kwis di ship ia. Di wata we kɔmɔt de ful wan bol.

³⁹ Nain Gidiɔn beg PAPA GƆD lɛ i nɔ vɛks pan am bɔt lɛ i gi am wan mɔ chans fɔ tɔk. I se in de put di ship ia bak bɔt dis tɛm di ship ia fɔ dray ɛn na di grɔn nɔmɔ fɔ sok.

⁴⁰ PAPA GƆD mek i bi so; di ship ia bin dray na mɔnin, bɔt di grɔn bin sok.