Di Jɔj Dɛm 5 - Krio Fɔs Oli Baybul

Di Siŋ We Dɛbora Ɛn Barak Siŋ

¹ Da de de, Dɛbora ɛn Barak we na Abinoam in pikin siŋ se,

² Di bigman dɛn na Izrɛl tinap lɛk bigman, ɛn di pipul dɛn gri fɔ go we dɛn nɔ fos dɛn, prez PAPA GƆD fɔ di wan dɛn we go fɛt we dɛn nɔ fos.

³ Lɛ dɛn kiŋ ɛn dɛn prins dɛn lisin di siŋ bikɔs na PAPA GƆD a de siŋ to; A go siŋ to PAPA GƆD we na di PAPA GƆD na Izrɛl.

⁴ PAPA GƆD, we yu bin kɔmɔt Mawnt Sɛir, we yu kɔmɔt na Idɔm, di grɔn shek ɛn bibig ren fɔdɔm, fɔ tru, wata kɔmɔt ɔp di skay.

⁵ Di mawnten dɛn shek bifo PAPA GƆD, Mawnt Saynay we de yanda shek bifo PAPA GƆD we na di PAPA GƆD na Izrɛl.

⁶ Di tɛm we Shamga, Anath in bɔypikin dɛn bin de, di tɛm we Jeɛl bin de, dɛn gɛda we pipul dɛn bin de gɛda bɔku bɔku wande travul wit kamɛl na di land togɛda, bin tap; na dɛn kɔna kɔna rod dɛn bin de travul.

⁷ Vilej layf bin tap na Izrɛl, i bin tap te Dɛbora kam i kam lɛk mama fɔ Izrɛl.

⁸ We Izrɛl pik nyu gɔd dɛn, wa fɔdɔm na Izrɛl, pan di fɔti tawzin man dɛn, nɔn dɛn nɔ si ol tin fɔ fɛt.

⁹ Mi maynd de to di kɔmanda dɛn we gri fɔ go fɛt we dɛn nɔ fos dɛn. Blɛs PAPA GƆD.

¹⁰ Una we de rayd dɛn wayt dɔŋki fɔ go tɛl ɔlman bɔt wetin apin, una we di sidɔm ples pantap una ɔs na saf kushin, sɛf fɔ de tɔk bɔt wetin apin, ɛn yu we de waka na trit sɛf fɔ tɔk bɔt dat.

¹¹ Una lisin dɛn myuzishian dɛn we de siŋ usay dɛn wata wɛl dɛn de, dɛn de siŋ bɔt aw PAPA GƆD win di wa, di win we di pipul dɛn na Izrɛl win. PAPA GƆD in pipul dɛn ɔl kɔmɔt na dɛn siti dɛn kam.

¹² Bi wi lida, bi wi lida Dɛbora! Bi wi lida ɛn siŋ yu siŋ Tinap bifo dɛn Barak ɛn kɛr di wan dɛn we yu dɔn kapchɔ go, fɔ tru, yu na Abinoam in pikin.

¹³ Di wan dɛn we de bato dɛn fɔ tru, kam mit dɛn bigman dɛn, PAPA GƆD in pipul dɛn rɛdi fɔ fɛt fɔ am.

¹⁴ Na Ifrem dɛn kɔmɔt kam na di vali, ɛn dɛn tinap wit Bɛnjamin ɛn in fambul dɛn. Di kɔmanda dɛn kɔmɔt Mekir ɛn di ɔfisa dɛn kɔmɔt na di Zɛbyulɔn fambul.

¹⁵ Di bigman dɛn na di Isaka fambul kam wit Dɛbora, ɛn na dɛn bin de bato Barak insɛf; dɛn fala am go na di vali. Insay di Rubɛn fambul, wanwɔd nɔ bin de; sɔm se lɛ dɛn kam, sɔm se lɛ dɛn nɔ kam.

¹⁶ Wetin du una lɛf biɛn wit dɛn ship? Na fɔ de lisin we dɛn shɛpad dɛn de ple flut fɔ di ship dɛn? Yɛs, di Rubɛn fambul nɔ bin gɛt wanwɔd, dɛn nɔ bin ebul mekɔp dɛn maynd fɔ kam as wan fambul.

¹⁷ Di Gad fambul bin de na di ist say na di vali; wetindu di Dan fambul dɛn bin de nia di bot dɛn? Di Asha fambul dɛn bin jɛs de na di bich ɛn na de nɔmɔ dɛn bin de.

¹⁸ Di Zɛbyulɔn fambul na pipul we risk dɛn layf fɔ fɛt; Di Naftali fambul dɛnsɛf risk dɛn layf ɛn fɛt.

¹⁹ “Di kiŋ dɛn kam, dɛn fɛt; di kiŋ dɛn na Kenan fɛt, na Tanak, nia Riva Mɛgido; bɔt dɛn nɔ bin ebul kɛr nɔn silva go.

²⁰ Di sta dɛnsɛf na di skay bin de fɛt, na di tɛm we dɛn bin de du wetin dɛn kin du na di skay, dɛn bin de fɛt Sisɛra.

²¹ Bɔku bɔku wata bɔs na Kishɔn we swip dɛn go, dat na Riva Kishɔn in pawa. Mi at satisfay ɛn a fil pawa na mi sol!

²² Di ɔs dɛn bin de galɔp de kam ɛn na so dɛn bin de stamp dɛn fut na grɔn.

²³ PAPA GƆD in enjɛl se fɔ swɛ Merɔz, fɔ swɛ di pipul dɛn we de de, bad bad swɛ, bikɔs dɛn nɔ bin go ɛp fɛt fɔ PAPA GƆD, dɛn nɔ ɛp fɛt dɛn traŋa pipul dɛn fɔ PAPA GƆD.

²⁴ Di uman we gɛt blɛsin pas ɔl na Jeɛl, Ibɔ we na kenayt in wɛf, I gɛt blɛsin pas ɔl di uman dɛn we tap na tɛnt.

²⁵ I aks fɔ wata bɔt na milk i gi am, I gi am di milk na dɛn bol we bigman dɛn kin it.

²⁶ I ol di pɛg we dɛn kin tek ol tɛnt na grɔn nain lɛf am, ɛn wan wokman ama nain raytan; i nak am wan tɛm nɔmɔ we brok in ed, i put di pɛg nain tɛmpul ɛn wap am go insay.

²⁷ I wik ɛn fɔdɔm ɛn lidɔm day wan na grɔn. Na bifo am so i wik ɛn fɔdɔm; usay i lidɔm, na de i day.

²⁸ Sisɛra in mama bin de luk fɔ an na winda; I luk te ɛn se; Wetin du in karej nɔ kam te tide? Wetin du di ɔs dɛn slo so tide?

²⁹ Di uman we gɛt sɛns pas ɔl di sɛns uman dɛn we de wok fɔ am, ansa se, we na dat di mami bin jɛs de tink nain at,

³⁰ “Dɛn nɔ jɛs de fɛn tin dɛn we dɛn go sheb? Wan ɔ tu uman fɔ wan sojaman; dɛn fayn klos fɔ Sisɛra, chen we di kwin go wɛr, tu bid we dɛn day fɔ put na mi nɛk?”

³¹ PAPA GƆD, na so ɔl yu ɛnimi dɛn fɔ day, bɔt di wan dɛn we lɛk yu fɔ jɛs de shayn lɛk di san we i de kɔmɔt na mɔnin. Apat dat, Izrɛl bin gɛt kolat fɔ fɔti ia.