Di Jɔj Dɛm 4 - Krio Fɔs Oli Baybul

Dɛbora Ɛn Barak

¹ We Eud day, di Izrɛlayt dɛn bigin du dɛn bad bad tin dɛn na PAPA GƆD in yay bak.

² So PAPA GƆD mek Jabin, we na Kenan kiŋ we tap na Ezɔ, kapchɔ dɛn. In ami kɔmanda bin nem Sisɛra ɛn i bin tap na Arɔshɛth we na jɛntayl dɛn de de.

³ Di Izrɛlayt dɛn beg PAPA GƆD fɔ ɛp dɛn bikɔs, Kiŋ Ezɔ we bin gɛt nayn ɔndrɛd karej, bin dɔn du wikɛd wikɛd tin dɛn to di Izrɛlayt dɛn fɔ twɛnti ia.

⁴ Datɛnde, na Dɛbora, Lapidɔth in wɛf we na bin Prɔfɛtɛs, na bin Izrɛl dɛn lida.

⁵ I kin sidɔm ɔnda wan pamtri we de bitwin Bɛthɛl ɛn Rama na Ifrem we gɛt bɔku il. Na de pipul dɛn na Izrɛl kin go mit an fɔ jɔj dɛn kes.

⁶ Wande, Dɛbora sɛn kɔl Barak we na Abinoam we kɔmɔt Kedɛsh na Naftali in bɔypikin. I tɛl am se PAPA GƆD we na di PAPA GƆD na Izrɛl dɔn tɔk traŋa wan se, in Barak fɔ gɛda tɛn tawzin man na di Naftali fambul ɛn di Zɛbyulɔn fambul go Mawnt Tabɔ.

⁷ Dɛbora se PAPA GƆD se, in go mek Sisɛra we na di kɔmanda na Jabin in Ami, wit in karej dɛn ɛn in sojaman dɛn, go fɛt dɛn nia Riva Kishɔn ɛn in PAPA GƆD go mek di Izrɛlayt dɛn bit Kiŋ Jabin in ami.

⁸ Nain Barak tɛl Dɛbora se if in di Dɛbora de go wit am, in go go, bɔt if i nɔ de go wit am, in nɔ go go.

⁹ Nain Dɛbora se in go go wit am bɔt wɔn am lɛ i no se, na uman go gɛt di prez fɔ di wok we in de go du, bikɔs na uman an PAPA GƆD go sɛl Sisɛra. So Dɛbora go Kedɛsh wit Barak.

¹⁰ Barak bin sɛn kɔl di Zɛbyulɔn ɛn di Naftali fambul fɔ go Kedɛsh; na tɛn tawzin man bin go wit am. Dɛbora sɛf bin go wit am.

¹¹ As ɔl dat bin de apin, wan man we nem Ibɔ we na Kenayt, bɔt bin dɔn kɔmɔt nia di Kenayt pipul dɛn we na Mozis in fadɛnlɔ, Obab, in jɛnareshɔn, ɛn bin dɔn go bil in tɛnt nia wan kɔtin tri na Zananim nia Kedɛsh.

¹² We Sisɛra yɛri se Barak we na Abinoam in bɔypikin dɔn go ɔp Mawnt Tabɔ,

¹³ Sisɛra tek ɔl in karej, in nayn ɔndrɛd ayɛn karej ɛn ɔl in sojaman dɛn we bin de wit am, kɔmɔt Aroshɛth we na jɛntayl dɛn de de, go Riva Kishɔn

¹⁴ Nain Dɛbora tɛl Barak se, go fɛt am. Tide na di de we PAPA GƆD dɔn mek fɔ lɛ yu win Sisɛra. Nain Dɛbora aks am se if PAPA GƆD nɔ de wit am. Barak bin go dɔŋ fɔ go fɛt Sisɛra wit tɛn tawzin man biɛn am.

¹⁵ PAPA GƆD mek Sisɛra, in karej dɛn ɛn in sojaman dɛn kɔnfyus we dɛn go fɔ fɛt, ɛn na so Barak de kil dɛn fitifata. Sisɛra in kam dɔŋ in karej ɛn rɔnawe kɔmɔt na di batul fil.

¹⁶ Barak rɔnata Sisɛra in karej ɛn in sojaman dɛn te rich Aroshɛth we na jɛntayl dɛn de de, ɛn kil dɛn ɔl; wan pan dɛnsɛf nɔ lɛf.

¹⁷ Bɔt Sisɛra bin kan dɔŋ in karej ɛn rɔn go na Jeɛl. Dat na da Kenayt we nem Ibɔ in wɛf in tɛnt, bikɔs wanwɔd bin de bitwin Jabin we na kiŋ na Ezɔ ɛn Ibɔ we na Kenayt in os.

¹⁸ So Jeɛl go na do go mit am ɛn tɛl am mek i nɔ fred fɔ go insay in tɛnt. Sisɛra go insay in tɛnt ɛn Jeɛl tek wan kapɛt kɔba am.

¹⁹ Nain Sisɛra tɛl am se in tɔsti, duya lɛ i gi am sɔm wata. Jeɛl opin wan big bɔtul milk gi am fɔ drink. We i dɔn drink dɔn, Jeɛl kɔba am bak.

²⁰ Nain Sisɛra tɛl Jeɛl se mek i tinap na di domɔt, ɛn if ɛnibɔdi aks am if ɛnibɔdi de insay, lɛ i se nɔ.

²¹ Sisɛra bin taya so i slip. Nain Jeɛl tek wan pɛg we dɛn kin tek ol tɛnt na grɔn, ɛn wan ama ɛn go nia Sisɛra saful saful, ɛn wɛr di pɛg nain tɛmpul wit di ama, te i rich na grɔn we mek Sisɛra day.

²² We Barak go na da eria de fɔ go luk fɔ Sisɛra, Ibɔ in wɛf we na Jeɛl, go mit am ɛn tɛl am se mek in go sho am di man we i de luk fɔ. Barak go insay Jeɛl in tɛnt ɛn si Sisɛra day wan wit di tɛnt pɛg bɔs nain tɛmpul.

²³ Na da de de PAPA GƆD mek Jabin we na kiŋ na Kenan, rɛspɛkt Izrɛl.

²⁴ So di Izrɛlayt dɛn mɔna Kiŋ Jabin na Kenan bad bad wan te dɛn kil am.