Di Jɔj Dɛm 3 - Krio Fɔs Oli Baybul

Di Pipul Dɛn We Bin Lɛf Na Di Land

¹ Na di neshɔn dɛnwanya we PAPA GƆD bin lɛf fɔ tɛst di Izrɛlayt dɛn we nɔ bin ɛva fɛt wa na Kenan wande.

² Na fɔ tich da jɛnareshɔn de wetin na wa bikɔs dɛn nɔ no wa wande.

³ Na di neshɔn dɛnwanya; di Filistin dɛn fayv siti, ɛn ɔl di Kenanayt dɛn siti, di Sidonian dɛn, di Ivayt dɛn we de na di Libanɔn Mawnten, dat na frɔm mawnt Baalath Amɔn te rich di rod fɔ go insay Amath Siti.

⁴ PAPA GƆD lɛf dɛn de bikɔs i wan tɛst si if Izrɛl go obe in kɔmandmɛnt dɛn we i bin gi Mozis fɔ gi dɛn fɔstɛmpapa dɛn.

⁵ So di Izrɛlayt dɛn bin tap na di sem land wit di Kenanayt dɛn, di Itayt dɛn, di Amɔrayt dɛn, di Pɛrizayt dɛn, di Ivayt dɛn ɛn di Jɛbyusayt dɛn.

⁶ Izrɛl ɛn di difrɛn difrɛn neshɔn dɛn bin de mared dɛn kɔmpin bɔy ɛn gyal pikin dɛn, ɛn Izrɛl bin de wɔship dɛn gɔd dɛn.

Ɔthniɛl

⁷ Di Izrɛlayt dɛn fɔgɛt bɔt PAPA GƆD ɛn du bad bad tin dɛn nain yay, ɛn bin de wɔship dɛn tin dɛn we dɛn mek wit tik ɛn ston, we dɛn kɔl Baalath ɛn Ashɛra.

⁸ Ɔl dat bin mek PAPA GƆD vɛks pan Izrɛl, so i mek Kiŋ Kushan Rishataim na Mɛsopotemia kapchɔ dɛn ɛn rul dɛn fɔ et ia.

⁹ Bɔt we di Izrɛlayt dɛn beg PAPA GƆD, PAPA GƆD pik Ɔthniɛl, we na Kelɛb in lili brɔda, Kɛnaz in pikin, fɔ fri dɛn, ɛn i fri dɛn.

¹⁰ PAPA GƆD in spirit kam pan an ɛn i bi Izrɛl dɛn lida, dɔn i go fɛt Kiŋ Kushan Rishataim na Mɛsopotemia, ɛn PAPA GƆD mek i bit am.

¹¹ So di land bin gɛt kolat fɔ fɔti ia. Afta dat, Ɔthniɛl day.

Eud

¹² Di Izrɛlayt dɛn du bad bad tin dɛn na PAPA GƆD in yay bak. So PAPA GƆD mek Kiŋ Ɛglɔn na Moab in ami, trɔŋ pas Izrɛl, bikɔs di Izrɛlayt dɛn nɔ bin de du wetin rayt na PAPA GƆD in yay.

¹³ Kiŋ Ɛglɔn jɔyn an wit di Amonayt ɛn di Amɛlikayt go fɛt ɛn bit Izrɛl; dɛn kapchɔ Sam siti.

¹⁴ Di Izrɛlayt dɛn bin de ɔnda Kiŋ Ɛglɔn fɔ etin ia.

¹⁵ Bɔt we di Izrɛlayt dɛn beg PAPA GƆD, PAPA GƆD pik Eud we kɔmɔt na di Bɛnjamin fambul, ɛn na lɛfan man, fɔ fri dɛn. Di Izrɛlayt dɛn sɛn Eud go gi Kiŋ Ɛglɔn prɛzɛnt na Moab.

¹⁶ So Eud mek wan sɔd we shap tu say, fɔ insɛf. Di sɔd na bin fifti sɛntimita or twɛnti inchis lɔŋ. I tay am nain rayt lɛg ɛn kɔba an wit in klos.

¹⁷ So i kɛr di prɛzɛnt go gi Kiŋ Ɛglɔn. Kiŋ Ɛglɔn na bin fat fat man.

¹⁸ Bɔt we Eud dɔn gi di kiŋ di prɛzɛnt dɔn, i tɛl di wan dɛn we bin tot di prɛzɛnt, fɔ go om.

¹⁹ Bɔt we dɛn rich usay dɛn kav dɛn ston dɛn nia Gilgal, in tɔn bak go tɛl Kiŋ Ɛglɔn se in gɛt wan sikrit mɛsej fɔ an. So di kiŋ mek ɔlman sɛt mɔt ɛn go na do.

²⁰ So Eud go mit di kiŋ nain rum we kol we de na di ruf, ɛn tɛl am se, in gɛt mɛsej fɔ am. Nain di kiŋ tinap.

²¹ Nain Eud pas in lɛfan, drɔ in sɔd ɛn wɛr am na di kiŋ in bɛlɛ.

²² Di wanol sɔd wit di andul ɔl wɛr insay di kiŋ in bɛlɛ, ɛn di fat kɔba an. Eud nɔ drɔ di sɔd kɔmɔt o, bifo dat, i mek i bɔs dɔŋ di kiŋ in wes say ɛn ɔltin we bin de insay in bɛlɛ, bɔs kɔmɔt.

²³ Dɔn Eud lɛf am de go na do, ɛn lɔk di do dɛn we de na di rum we de na di ruf.

²⁴ We Eud dɔn go, di kiŋ in wokman dɛn kam de ɛn si se di do lɔk, bɔt fil se di kiŋ de go na yad na di tɔylɛt we de nain kol rum.

²⁵ So dɛn wet te dɛn taya. We dɛn si se di kiŋ nɔ opin di do, dɛn tek di ki opin di do ɛn si dɛn masta lidɔm na grɔn day wan.

²⁶ Di tɛm we dɛn bin de dile, Eud bin dɔn rɔnawe pas biɛn dɛn ston dɛn we dɛn kav, go Sɛira.

²⁷ We i rich de, i tinap na Ifrem na di mawnten ɛn blo di trɔmpɛt. So di Izrɛlayt dɛn si am lɛk dɛn bigman ɛn fala am go dɔŋ di Mawnten.

²⁸ Nain i tɛl dɛn se lɛ dɛn fala am go, bikɔs PAPA GƆD dɔn mek dɛn dɔn win dɛn ɛnimi dɛn we na di Moabayt dɛn. So di pipul dɛn fala am. Dɛn go kapchɔ di say we di Moabayt dɛn kin krɔs Riva Jɔdan ɛn nɔ alaw nɔn pan dɛn fɔ krɔs.

²⁹ Datɛnde, dɛn kil bɔt sɔm tɛn tawzin trɔŋ Moabayt dɛn we ebul fɛt; wan sɛf nɔ rɔnawe.

³⁰ Na da de de di Izrɛlayt dɛn kapchɔ Moab we mek Izrɛl gɛt kolat fɔ eti ia.

³¹ Afta Eud, na Shamga we na Anath in bɔypikin, we kil siks ɔndrɛd Filistin wit da tik we dɛn de tek kɔntrol dɛn kaw we dɛn de dig fam, bin fri Izrɛl.