Di Jɔj Dɛm 21 - Krio Fɔs Oli Baybul

Dɛn Fɛn Wɛf Dɛn Fɔ Di Bɛnjaminayt Dɛm

¹ Di man dɛn na Izrɛl bin dɔn prɔmis PAPA GƆD na Mizpa se, nɔn pan dɛn nɔ go gi dɛn gyal pikin dɛn fɔ mared to di Bɛnjamin fambul.

² We di Izrɛlayt dɛn go Bɛthɛl, dɛn de de te ivintɛm de ala de kray to PAPA GƆD bita bita wan.

³ Dɛn bin kray de aks PAPA GƆD we na di PAPA GƆD na Izrɛl se, wetindu tɛm lɛk dawande, dɛn fɔ lɔs wan pan dɛn fambul.

⁴ Di nɛks de, di Izrɛlayt dɛn wek ali mɔnin ɛn bil ɔlta ɛn mek sakrifays we dɛn de bɔn na faya, ɛn pis ɔfrin.

⁵ Nain di Izrɛlayt dɛn aks se, uswan pan di fambul dɛn na Izrɛl nɔ go gɛda bifo PAPA GƆD. Dɛn bin dɔn swɛ bad bad wan to PAPA GƆD se dɛn go kil ɛni fambul we nɔ go fɔ go gɛda bifo PAPA GƆD na Mizpa.

⁶ Di Izrɛlayt dɛn sɔri fɔ di Bɛnjamin fambul we na dɛn brɔda dɛn, ɛn bin de tɔk se, da de de, wan pan di fambul dɛn na Izrɛl nɔ de igen

⁷ Dɛn bigin aks dɛnsɛf se aw dɛn go du fɔ fɛn wɛf fɔ di man dɛn we lɛf na di Bɛnjamin fambul, bikɔs dɛn bin dɔn swɛ wit PAPA GƆD in nem se, dɛn nɔ go gi dɛn gyal pikin dɛn to di Bɛnjamin fambul fɔ mared.

⁸ Nain dɛn aks se, udat pan ɔl di fambul dɛn nɔ go na Mizpa to PAPA GƆD. I kam bi se nɔbɔdi nɔ de de we kɔmɔt Jabɛsh we de na Giliad.

⁹ We dɛn kɔl di rɛjista, nɔn pan di pipul dɛn we kɔmɔt Jabɛsh Giliad nɔ bin de usay dɛn bin gɛda.

¹⁰ So di pipul dɛn sɛn twɛlv tawzin pan dɛn sojaman dɛn we nɔ de fred ɛn tɛl dɛn se, mek dɛn go kil ɔlman na Jabɛsh Giliad; uman ɛn pikin sɛf nɔ fɔ lɛf.

¹¹ Dɛn tɛl dɛn se dɛn fɔ kil ɔl di man dɛn, ɛn kil ɔl di uman dɛn we nɔto vajin.

¹² Ɔl ɛn ɔl, na fo ɔndrɛd yɔŋ vajin we nɔ no man, we min se dɛn nɔ lidɔm wit man wande, dɛn fɛn pan di pipul dɛn na Jabɛsh Giliad; dɛn kɛr dɛn go na di kamp na Shaylɔ we de na Kenan.

¹³ Ɔl di Izrɛlayt dɛn sɛn wɔd to di Bɛnjaminayt dɛn we bin de na Rimɔn ston se, lɛ di plaba dɔn.

¹⁴ Na da tɛm de di Bɛnjaminayt dɛn go bak na dɛn land. Nain dɛn gi dɛn di uman dɛn we dɛn nɔ bin kil pan di uman dɛn na Jabɛsh Giliad, bɔt nɔto ɔlman bin gɛt.

¹⁵ Di Izrɛlayt dɛn bin sɔri fɔ di Bɛnjaminayt dɛn bikɔs PAPA GƆD bin dɔn mek wanwɔd nɔ de bitwin di fambul dɛn na Izrɛl igen

¹⁶ So di bigman dɛn na Izrɛl aks wetin dɛn go du fɔ fɛn wɛf fɔ di Bɛnjaminayt man dɛn we lɛf, we i bi se dɛn bin kil ɔl di uman dɛn na di Bɛnjamin fambul.

¹⁷ Dɛn se dɛn mɔs fɛn uman dɛn fɔ di man dɛn we nɔ day pan di Bɛnjamin fambul, so dat wan pan di fambul dɛn na Izrɛl nɔ go lɔs.

¹⁸ Bɔt dɛn nɔ sɔpoz fɔ gi dɛn dɛn gyal pikin dɛn fɔ mared, bikɔs dɛn di Izrɛlayt dɛn bin dɔn swɛ se, na bad bad tin go mit di pɔsin we go gi di Bɛnjaminayt dɛn wɛf.

¹⁹ Nain dɛn se, di fɛstival we dɛn kin ol ebri ia fɔ PAPA GƆD na Shaylɔ we de na di nɔt pat to Bɛtɛl, di ist pat to di rod we kɔmɔt Bɛtɛl go Shɛkɛm, ɛn di sawt pat to Libanɔn, de kam.

²⁰ Nain dɛn tɛl di Bɛnjaminayt dɛn traŋa wan se, lɛ dɛn go mek ambush na di greps fam dɛn

²¹ ɛn de wach; we Shaylɔ uman dɛn kɔmɔt fɔ dans di tɛm we dɛn kin dans, dɛn fɔ kɔmɔt na di greps fam dɛn go kech wan wan pan di Shaylɔ uman dɛn we go bi dɛn wɛf, ɛn kɛr dɛn go na dɛn land.

²² Dɛn se, we di uman dɛn na Shaylɔ dɛn papa ɛn dɛn brɔda dɛn go go le kɔmplen, dɛn go tɛl dɛn se, lɛ dɛn jɛs gi dɛn di uman dɛn wantɛm, bikɔs nɔto wa dɛn kapchɔ dɛn ɛn tek dɛn mek wɛf, ɛn nɔto dɛn di papa dɛn bin gi dɛn dɛn uman ya we pipul dɛn go se dɛn du bad.

²³ Nain di Bɛnjaminayt dɛn du wetin dɛn tɛl dɛn fɔ du; dɛn go kech wan wan uman we dɛn bin de dans, ɛn kɛr dɛn go na dɛn land. Dɛn go bil dɛn siti dɛn bak ɛn tap de.

²⁴ So di Izrɛlayt dɛn kɔmɔt Shaylɔ da sem tɛm de, ɛn go bak na dɛn land we dɛn bin gi dɛn, akɔdin to famili ɛn fambul.

²⁵ Da tɛn de, Izrɛl nɔ bin gɛt kiŋ; ɔlman bin jɛs de du wetin i fil fɔ du.