Di Jɔj Dɛm 20 - Krio Fɔs Oli Baybul

Izrɛl Rɛdi Dɛnsɛf Fɔ Fɛt Wa

¹ Ɔl di pipul dɛn na Izrɛl, dat na frɔm Dan to Biashiba ɛn Giliad, gɛda wit wanwɔd bifo PAPA GƆD na Mizpa.

² Ɔl di pipul dɛn we go gɛda wan ples bifo PAPA GƆD, dat na di bigman dɛn na Izrɛl, di bigman dɛn fɔ di difrɛn fambul dɛn, na bin fo ɔndrɛd tawzin we na man dɛn we de waka wit fut fɔ go fɛt.

³ (Di Bɛnjaminayt dɛn yɛri se di Izrɛlayt dɛn dɔn go Mizpa.) So di Izrɛlayt dɛn aks di Livayt fɔ ɛksplen aw dɛn pas we wikɛdnɛs lɛk dat bi.

⁴ Di Livayt we nain switat dɛn kil, se in ɛn in switat go Gibia fɔ go slip te mɔnin.

⁵ Nain di man dɛn na Gibia sɔrawnd di os da nɛt de. I se dɛn bin min fɔ kil am. I se dɛn rabish in switat ɛn i day.

⁶ I se so in tek in switat in bɔdi, kɔt am pispis, ɛn sɛn am go alsay na di kɔntri we Izrɛlayt dɛn de, bikɔs dɛn dɔn du bad bad tin na Izrɛl we mek Izrɛl dɔn gɛt trɔbul.

⁷ I aks di pipul dɛn na Izrɛl fɔ luk insay di mata ɛn tɔk wetin fɔ bi.

⁸ Nain di Izrɛlayt dɛn ɔl gri se dɛn nɔn nɔ go go na dɛn tɛnt ɛn os dɛn.

⁹ Dɛn se wetin dɛn go du, dɛn go balɔt fɔ pik di man dɛn we go go atak Gibia.

¹⁰ Dɛn se wan pat pan tɛn pat pan di man dɛn na Izrɛl, go de fɔ di it say. Ɔl di ɔda wan dɛn go go fɛt Gibia fɔ di bad bad dɔti gem we dɛn ple we mek Izrɛl dɔn gɛt trɔbul.

¹¹ So ɔl di man dɛn mek wanwɔd fɔ go atak Gibia.

¹² Di ɔda fambul dɛn na Izrɛl sɛn mɛsenja dɛn to di Bɛnjamin fambul de aks us kayn bad bad tin dɛn du so.

¹³ Dɛn tɛl di Bɛnjamin fambul se lɛ dɛn gi dɛn di man dɛn we na ledɔm biznɛs nɔmɔ de na dɛn ed we du da bad bad tin de, lɛ dɛn go kil dɛn ɛn pul di sin kɔmɔt na Izrɛl. Bɔt di Bɛnjaminayt dɛn nɔ gri du wetin dɛn brɔda dɛn we dɛn ɔl na Izrɛlayt tɛl dɛn.

¹⁴ Di Bɛnjaminayt dɛn Kɔmɔt na dɛn difrɛn siti dɛn go Gibia fɔ go fɛt di ɔda Izrɛlayt dɛn.

¹⁵ Di Bɛnjaminayt dɛn gɛda twɛnti siks tawzin sojaman kɔmɔt na dɛn difrɛn siti dɛn, apat frɔm di pipul dɛn na Gibia we pik sɛvin ɔndrɛd spɛshal man dɛn.

¹⁶ Pan di pipul dɛn we dɛn pik na Gibiɔa, dɛn gɛt sɛvin ɔndrɛd lɛfan man dɛn, ɛn kin maks yu wan ia na yu ed ɛn nɔ mis am.

¹⁷ Di Izrɛlayt dɛn, we yu pul di Bɛnjamin fambul, gɛda fo ɔndrɛd tawzin fɛtman. Dɛn ɔl tren fɔ fɛt.

Di Fɛt We Dɛn Fɛt Di Bɛnjamin Fambul.

¹⁸ Di Izrɛlayt dɛn go Bɛtɛl go aks PAPA GƆD se, us wan pan di fambul dɛn fɔs fɔ go atak di Bɛnjamin fambul. Nain PAPA GƆD tɛl dɛn se na di Juda fambul fɔs fɔ atak di Bɛnjamin fambul.

¹⁹ So di Izrɛlayt dɛn wek ali mɔnin go kamp nia Gibia.

²⁰ Di Izrɛlayt dɛn go chalenj di Bɛnjaminayt dɛn na Gibia fɔ fɛt.

²¹ Na twɛnti tu tawzin Izrɛlayt di Bɛnjamin fambul kil da de de.

²² Di nɛks de, di Izrɛlayt mek maynd go chalenj dɛn bak usay dɛn bin chalenj dɛn di fɔs de.

²³ So dɛn go bifo PAPA GƆD go kray te ivintɛm. Nain dɛn aks PAPA GƆD if dɛn fɔ go fɛt di Bɛnjaminayt dɛn we na dɛn brɔda dɛn bak. PAPA GƆD tɛl dɛn se dɛn fɔ go fɛt dɛn.

²⁴ So di Izrɛlayt dɛn go fɛt di Bɛnjamin fambul bak di sɛkɛn de.

²⁵ Di Bɛnjaminayt dɛn kɔmɔt Gibia go fɛt dɛn ɛn kil etin tawzin Izrɛl fɛtman.

²⁶ Nain ɔl di Izrɛl sojaman dɛn go na Bɛtɛl go kray usay dɛn kin go wɔship PAPA GƆD, ɛn fast da de de te ivintɛm. Dɛn mek pis ɔfrin ɛn di ɔfrin we dɛn de bɔn na faya, to PAPA GƆD.

²⁷ Dɔn di Izrɛlayt dɛn aks PAPA GƆD (da tɛm de, di Ak ɔf di Kɔvinant bin de Bɛtɛl

²⁸ ɛn na Finɛas we na Ɛlieza, Erɔn in pikin, in yon pikin bin de waka bifo di ak) se if dɛn fɔ go fɛt dɛn brɔda dɛn we na di Bɛnjaminayt dɛn bak, ɔ dɛn nɔ fɔ go. PAPA GƆD tɛl dɛn se dɛn fɔ go bikɔs in go mek dɛn bit di Bɛnjaminayt dɛn.

²⁹ So di Izrɛlayt dɛn sɛt ambush rawnd Gibia.

³⁰ Di Izrɛlayt dɛn go atak di Bɛnjamin fambul di tɔd de na Gibia; dɛn rɛdi dɛnsɛf fɔ fɛt jɛs lɛk di ɔda tɛm dɛn.

³¹ So di Bɛnjaminayt dɛn go fɔ go fɛt di Izrɛlayt dɛn. Di Izrɛlayt dɛn drif dɛn kɔmɔt nia dɛn siti. Di Bɛnjaminayt dɛn bigin kil di Izrɛlayt na di rod we go Bɛtɛl ɛn di wan we go Gibia, jɛs lɛk aw dɛn bin dɔn de du di pas tu de. Dɛn kil bɔt tati Izrɛlayt.

³² Di Bɛnjaminayt dɛn de se di Izrɛlayt dɛn de na rod de wet dɛn, bɔt di Izrɛlayt dɛn de se lɛ dɛn fɔm lɛk dɛn de fred ɛn drif di Bɛnjaminayt dɛn kɔmɔt nia dɛn siti.

³³ So ɔl di Izrɛlayt sojaman dɛn kɔmɔt usay dɛn bin de, go Bealtama go rɛdi dɛnsɛf fɔ fɛt, dɔn di Izrɛlayt sojaman dɛn we bin dɔn sɔrawnd Gibia, jɛs bɔs kɔmɔt usay dɛn bin ayd.

³⁴ Na tɛn tawzin Izrɛl sojaman we dɛn tek tɛm pik, bin atak Gibia ɛn di fɛt nɔ bin izi; di Bɛnjaminayt dɛn nɔ bin kech ɔp se dɛn dɔn atak dɛn bad bad wan ɛn dɛn dawnfɔl dɔn rich.

³⁵ PAPA GƆD kapchɔ di Bɛnjaminayt dɛn ɛn ɔl di Izrɛlayt dɛn si se nain du am. Di Izrɛlayt dɛn kil twɛnti fayv tawzin, wan ɔndrɛd Bɛnjaminayt fɛtman.

³⁶ So di Bɛnjaminayt dɛnsɛf si se dɛn dɔn lɔs di fɛt. Di Izrɛlayt dɛn bin mek lɛk dɛn de rɔnawe pan di Bɛnjaminayt dɛn bikɔs dɛn bin biliv dɛn man dɛn we bin sɛt ambush na Gibia.

Aw Di Izrɛlayt Dɛn Manej Win

³⁷ Na dɛn kɔmɔt kwik kwik go kil ɔlman insay Gibia Siti.

³⁸ Di Izrɛl sojaman dɛn we bin drif di Bɛnjaminayt ɛn di wan dɛn we bin sɛt ambush na Gibia, bin mek ɔp se, we di man dɛn we bin sɛt ambush rawnd Gibia kapchɔ di siti, dɛn fɔ mek faya we go pul tik tik smok.

³⁹ Datɛnde, di Izrɛl sojaman dɛn we bin de drif di Bɛnjamin sojaman dɛn, fɔ tɔn ɛn fɛt di Bɛnjamin sojaman dɛn. Di Bɛnjamin sojaman dɛn bin dɔn bigin kil sɔm pan di Izrɛl sojaman dɛn. Dɛn bin dɔn kil bɔt sɔm tati. So dɛn bin de se dɛn go kil dɛn lɛk aw dɛn bin dɔn de kil dɛn di fɔs tu fɛt.

⁴⁰ We di smok we de kɔmɔt na di siti bigin go ɔp, we na bin di Izrɛlayt dɛn signal, di Bɛnjaminayt dɛn tɔn biɛn ɛn wɔnda fɔ si se faya dɔn kech dɛn siti.

⁴¹ Nain di Izrɛlayt dɛn tɔn rawnd fɔ fɛt, we mek di Bɛnjaminayt dɛn at pwɛl bikɔs dɛn si se dɛn dawnfɔl dɔn rich.

⁴² So di Bɛnjaminayt dɛn rɔn lɛk dɛn de go na di ɛmti ples we pɔsin nɔ go ebul tap, bɔt di fɛt mɔna dɛn; di Izrɛl sojaman dɛn we bin go bɔn dɛn siti, bɔs bifo dɛn ɛn kil dɛn ɔl.

⁴³ Di Izrɛl sojaman dɛn bigin kil di Bɛnjamin sojaman dɛn frɔm Noa te rich ɔpozit Gibia na di ist.

⁴⁴ Na etin tawzin tɔf tɔf Bɛnjamin sojaman day da de de.

⁴⁵ Dɛn bin rɔn de go na di ɛmti ples we pɔsin nɔ go ebul tap to Rimɔn ston. Na fayv tawzin pan dɛn, dɛn kil na rod. Dɛn rɔnata dɛn go Gidɔm usay dɛn go kil tu tawzin mɔ.

⁴⁶ Da de de, na twɛnti fayv tawzin tɔf tɔf Bɛnjamin sojaman di Izrɛlayt dɛn kil.

⁴⁷ Siks ɔndrɛd pan di Bɛnjaminayt dɛn bin rɔn go ayd na Rimɔn ston na di ɛmti ples we pɔsin nɔ go ebul tap, fɔ fo mɔnt.

⁴⁸ Di Izrɛl sojaman dɛn tɔn bak go kil di balans Bɛnjaminayt dɛn; animal o, mɔtalman o, dɛn kil dɛn ɔl ɛn layt faya na ɔl dɛn siti dɛn.