Di Jɔj Dɛm 19 - Krio Fɔs Oli Baybul

Di Livayt Ɛn In Switat

¹ Di tɛm we Izrɛl nɔ bin gɛt kiŋ yet, wan Livayt we bin tap na dɛn fa fa pat insay insay di il kɔntri na Ifrem, bin go gɛt wan switat na Bɛtliɛm we de Juda.

² Wande, in switat vɛks go bak nain papa os na Bɛtliɛm we de Juda; i bin de de bɔt fo mɔnt.

³ Wande, di man grap se in de go koks am ɛn kɛr am go bak nain os. I kɛr in wokman ɛn sɔm dɔŋki dɛn we i de go. We di gyal in papa si am, i go mit am ɛn i bin gladi fɔ am.

⁴ Di gyal in papa mek i tap to dɛn fɔ tri de. Dɛn tu bin de it ɛn drink..

⁵ Di de we mek fo, di Livayt rɛdi ali mɔnin fɔ go om. Bɔt di gyal in papa se lɛ i it smɔl bred bifo i go.

⁶ So dɛn tu sidɔm it ɛn drink. Nain di gyal in papa tɛl di Livayt se mek i fil fri fɔ slip de da de de bak, so dɛn go ɛnjɔy dɛnsɛf.

⁷ Ɔl we i tray fɔ go, di gyal in papa fos am fɔ slip de bak da de de, te i gri.

⁸ Ali di nɛks mɔnin, dat na di de we mek fayv, di Livayt rɛdi fɔ go. Nain di gyal in papa tɛl am se lɛ i nɔ go yet; lɛ i wet te ivintɛm. So dɛn tu sidɔm it.

⁹ Di tɛm we di Livayt ɛn in switat wit in wokman rɛdi se dɛn de go, di Livayt in switat in papa tɛl dɛn se i dɔn let, so mek dɛn slip de wantɛm; i se ivintɛm dɔn kam, so mek dɛn ɛnjɔy dɛnsɛf ɛn slip de wantɛm. I se dɛn go lɛf ali mɔnin di nɛks de fɔ go om.

¹⁰ Bɔt di Livayt nɔ gri igen; i tek in switat ɛn in tu dɔŋki we tiŋs pak ɛn go. Dɛn go te dɛn rich ɔpozit Jebɔs, we na Jerusɛlɛm.

¹¹ Bay di tɛm we dɛn rich nia Jebɔs, tɛm bin dɔn go. So in wokman tɛl am se lɛ dɛn bɛn go Jebɔs lɛ dɛn go slip de.

¹² Bɔt di Livayt ansa am se dɛn nɔ go go na siti we na fɔrina dɛn de de, we dɛn nɔto pat pan Izrɛl neshɔn. I se bifo dat, mek dɛn go Gibia we de bifo say.

¹³ Di livayt se mek dɛn bia rich Gibia ɔ Rama go slip de.

¹⁴ So dɛn pas go. Bay di tɛm we di san de go dɔŋ, dɛn bin dɔn rich Gibia we na di Bɛnjamin fambul gɛt de.

¹⁵ So dɛn bɛn de fɔ slip da nɛt de. Na di opin ples insay di siti dɛn go sidɔm bikɔs nɔbɔdi nɔ gri lɔj dɛn da nɛt de.

¹⁶ Wan olpa we kɔmɔt na di il kɔntri na Ifrem bɔt tap na Gibia, usay di Bɛnjaminayt dɛn de, bin kɔmɔt nain fam da ivintɛm de.

¹⁷ We i go es in ed ɔp, i si di Livayt dɛn sidɔm na di opin ples na di siti. Nain di olpa aks dɛn se, usay dɛn kɔmɔt ɛn usay dɛn de go.

¹⁸ Nain di Livayt ansa am se, dɛn kɔmɔt Bɛtliɛm we de na Juda ɛn dɛn de go na di fa fa pat insay insay Ifrem we na il kɔntri, usay in kɔmɔt. I tɛl am se in kɔmɔt Bɛtliɛm we de na Juda ɛn in de go om, bɔt nɔbɔdi nɔ gri lɔj dɛn.

¹⁹ Di Livayt tɛl di olpa se dɛn gɛt ɔl wetin dɛn want; gras fɔ di dɔŋki dɛn, ɛn bred ɛn wayn fɔ in, in switat, ɛn in wokman dɛn. I se dɛn gɛt ɔl wetin dɛn want.

²⁰ Nain di olpa tɛl dɛn kabɔ ɛn se in go kia fɔ dɛn so dat dɛn nɔ go slip na di opin ples na di siti.

²¹ So di olpa kɛr dɛn go nain os ɛn gi dɛn dɔŋki dɛn gras fɔ it, gi di pipul dɛn wata fɔ was dɛn fut, it fɔ it ɛn tin fɔ drink.

²² As dɛn bin de insay di olpa in os de drink wayn de ɛnjɔy dɛnsɛf, man dɛn we na lidɔm biznɛs nɔmɔ de na dɛn ed we de na di siti, dɔn sɔrawnd di os de bit bit di do. Dɛn tɛl di olpa se, mek i put di man we i kɛr go nain os, bikɔs dɛn wan lidɔm wit am.

²³ So di masta na di os we na di olpa, go na do go tɛl dɛn se, nɔ o mi brɔda dɛn, una nɔ du dɛn kayn dɔti ɛn wikɛd tin de, mɔ so we na mi os dɛn kam.

²⁴ Di olpa tɛl dɛn se lɛ dɛn tek di Livayt in switat ɛn in yon gyal pikin we na vajin, lɛ dɛn rabish dɛn ɛn du ɛnitin dɛn lɛk fɔ du wit dɛn.

²⁵ Bɔt di man dɛn nɔ gri. So di olpa tek di Livayt in switat push am na do gi di man dɛn we na lidɔm biznɛs nɔmɔ de na dɛn ed. Dɛn lidɔm wit am ol nɛt; dɛn du ɔl kayn tin we di lɔ se nɔ gud fɔ du to uman. As do bigin klin so, dɛn lɛf am mek i go.

²⁶ As do de klin, di uman jɛs go fɔdɔm na di olpa in os domɔt te do klin..

²⁷ We do klin, di Livayt grap fɔ go. As i opin di do so fɔ go na do, i mit in switat lidɔm frɔnt de ɛn in an bin de nia di domɔt.

²⁸ Nain i tɛl am se mek i grap lɛ dɛn go. Bɔt di gyal nɔ ansa. Nain i put am pan wan pan in dɔŋki dɛn ɛn go om.

²⁹ We i rich nain os, nain i le in switat, ɛn tek nɛf kɔt kɔt am to twɛlv pat. I sɛn wan wan to di twɛlv fambul na Izrɛl.

³⁰ Ɔl di pipul dɛn we si wetin apin tɔk se, frɔm we di Izrɛlayt dɛn kɔmɔt Ijipt, dɛn nɔ si ɔ yɛri bɔt tin lɛk dat wande. So dɛn fɔ tink bɔt wetin fɔ du bɔt dat.