Di Jɔj Dɛm 18 - Krio Fɔs Oli Baybul

Mayka Ɛn Di Dan Fambul

¹ Di tɛm we Izrɛl nɔ bin gɛt kiŋ yet, di Dan fambul bin de fɛn land fɔ dɛnsɛf fɔ tap, bikɔs pan di fambul dɛn na Izrɛl, dɛn nɔ bin dɔn gɛt land fɔ dɛnsɛf yet.

² So di pipul dɛn na di Dan fambul pik fayv soba man we kɔmɔt na di siti dɛn bitwin Zora ɛn Ɛshtaɔl, ɛn tɛl dɛn fɔ go waka ɔlsay na di land ɛn wach am. We dɛn rich na Ifrem na di il kɔntri, dɛn go tap na Mayka in os.

³ We dɛn bin de na Mayka in os, dɛn yɛri wan vɔys we dɛn no, we na di yɔŋ Livayt in vɔys. Nain dɛn tɔn to am ɛn aks am, udat kɛr am go de, wetin i de du de ɛn us biznɛs i gɛt de.

⁴ Nain i tɛl dɛn ɔl wetin in ɛn Mayka dɔn mekɔp; aw Mayka aya am ɛn aw in dɔn bi Mayka in man we de mek sakrifays fɔ pipul sin

⁵ So dɛn tɛl am se duya, lɛ i fɛnɔt to PAPA GƆD if bɛtɛ go fala dɛn na di patrol we dɛn de go datɛnde.

⁶ Nain i tɛl dɛn se lɛ dɛn go ɛn nɔ fred natin bikɔs di patrol we dɛn de go, de na PAPA GƆD in an.

⁷ So di fayv man go. We dɛn rich Laish, dɛn si se di pipul dɛn we de de, na lɛk di Sidonian dɛn; dɛn pisful, kwayɛt, dɛn nɔ gɛt plaba wit ɔda pipul dɛn, dɛn jɛntri ɛn gɛt ɔltin we mɔtalman kin tink bɔt, ɔlwe di Sidonian dɛn de fa frɔm dɛn ɛn nɔ gɛt nɔn biznɛs wit dɛn.

⁸ We dɛn tɔn bak go na Zora ɛn Ɛshtaɔl, dɛn kɔmpin dɛn aks dɛn fɔ tɛl dɛn wetin dɛn si.

⁹ Nain dɛn tɛl dɛn se lɛ dɛn go fɛt di pipul dɛn ɛn kapchɔ di land, bikɔs di land gud fɔ plant. Dɛn se lɛ dɛn nɔ sidɔm o, ɛn lɛ dɛn nɔ westɛm; lɛ dɛn go kapchɔ di land wantɛm wantɛm.

¹⁰ Dɛn tɛl dɛn igen se, di pipul dɛn nɔ go de mɛmba se dɛn go atak dɛn. Dɛn se na big land ɛn natin nɔ de we dɛn go want we nɔ de de, ɛn PAPA GƆD dɔn gi dɛn di land.

¹¹ Na siks ɔndrɛd sojaman na di Dan fambul wit dɛn wɛpɔn dɛn fɔ fɛt, bin kɔmɔt Zora ɛn Ɛshtaɔl

¹² ɛn go kamp na Kiriath Jɛarim na Juda. Na dat mek te tide, dɛn de kɔl da ples de Dan in Kamp.

¹³ We dɛn kɔmɔt de, dɛn go Ifrem na di il kɔntri, ɛn dɛn go na Mayka in os.

¹⁴ Nain di fayv man we bin go wach rawnd Laish aks dɛn kɔmpin dɛn se, if dɛn no se da klos we da man we de mek sakrifays fɔ pipul sin kin wɛr, bod lay lay gɔd we dɛn kɔba wit silva ɛn ɔda lay lay gɔd dɛn de na sɔm pan dɛn os dɛn de, ɛn se lɛ dɛn tink wetin fɔ du.

¹⁵ Nain dɛn go insay Mayka in os usay da yɔŋ Livayt de ɛn aks aw di yɔŋ Livayt de du.

¹⁶ Bay da tɛm de, siks ɔndrɛd sojaman we kɔmɔt na di Dan fambul, bin dɔn tambay na di get.

¹⁷ Di fayv man we bin go wach Laish go insay Mayka in os ɛn tek di klos we di man we man we de mek sakrifays fɔ pipul sin kin wɛr, tek di imej, tek di wan we dɛn kɔba wit silva ɛn di ɔda wan dɛn. Da tɛn de, Mayka yon man we de mek sakrifays fɔ pipul sin bin tinap na di get wit di siks ɔndrɛd fɛtman.

¹⁸ We dɛn go tek ɔl dɛn tin dɛn de na Mayka in os, di man we de mek sakrifays fɔ pipul sin aks dɛn wetindu dɛn du dat.

¹⁹ Nain dɛn tɛl am se mek i sɛt in mɔt; mek i nɔ tɔk natin. Dɛn tɛl am se mek i go wit dɛn go de wit dɛn lɛk dɛn papa ɛn dɛn man we de mek sakrifays fɔ pipul sin. Nain dɛn aks am se, fɔ bi man we de mek sakrifays fɔ pipul sin fɔ jɛs wan os nɔmɔ, ɔ fɔ wanol fambul na Izrɛl, us wan bɛtɛ.

²⁰ Di man we de mek sakrifays fɔ pipul sin bin gladi. So i tek di klos we man we de mek sakrifays fɔ pipul sin kin wɛr, dɛn smɔl smɔl gɔd dɛn ɛn di imej we dɛn mek wit bod ɛn kɔba wit silva, ɛn go wit dɛn.

²¹ Dɛn put dɛn pikin dɛn, kaw ɛn dɛn tinks dɛn bifo ɛn tɔn rawnd de go.

²² We dɛn dɔn go fawe, Mayka kɔl ɔl in neba dɛn fɔ kɔmɔt go mit di Dan fambul; dɛn rɔnata dɛn.

²³ Dɛn bigin ala kɔl di Dan fambul. Nain di pipul dɛn na di Dan fambul tɔn rawnd ɛn aks Mayka se wetin nain prɔblɛm we mek i tot ɔl da krawd de go mit dɛn.

²⁴ Nain Mayka ansa se, dɛn dɔn tek in gɔd dɛn ɛn in man we de mek sakrifays fɔ pipul sin, ɛn nɔ lɛf natin fɔ am, dɔn dɛn de go aks am se wetin nain prɔblɛm.

²⁵ Nain di Dan fambul dɛn tɛl am se, lɛ i tek tɛm tɔk lɛ dɛn nɔ vɛks fɔdɔm pan am. Dɛn se, datɛnde, in ɛn ɔl in fambul dɛn go day.

²⁶ We Mayka si se di Dan fambul tu traŋa fɔ am, i tɔn bak go nain os saful ɛn di Dan fambul go dɛn we.

²⁷ We dɛn dɔn tek Mayka in gɔd dɛn ɛn in man we de mek sakrifays fɔ pipul sin, di Dan fambul go Laish; to dɛn kwayɛt pipul dɛn we nɔ de drim se ɛnibɔdi go atak dɛn, go kil dɛn wit dɛn sɔd dɛn ɛn bɔn dɛn siti.

²⁸ Nɔbɔdi nɔ go ɛp dɛn bikɔs dɛn bin de fa frɔm Saydɔn, ɛn dɛn nɔ bin mek padi wit nɔn ɔda pipul dɛn. Laish bin de na Bɛthrɛɔb Vali. Di Dan fambul bil di siti bak ɛn tap de.

²⁹ Dɛn gi di siti nem Dan, we na dɛn fɔstɛmpapa we na Izrɛl bɔn, in nem. Fɔstɛm, di siti bin nem, Laish.

³⁰ Di Dan fambul dɛn mek gɔd fɔ dɛnsɛf. Na Mozis in granpikin we nem Jonɛthan, we na Mozis in yon pikin we nem Gashɔm, bɔn, ɛn in bɔypikin dɛn, na bin di man dɛn we bin de mek sakrifays fɔ pipul sin na di Dan fambul te di tɛm we dɛn kapchɔ dɛn mek slev.

³¹ Ɔl di tɛm we PAPA GƆD os de na Shaylɔ, na Mayka in imej we i mek, bin de na PAPA GƆD in os.