Di Jɔj Dɛm 17 - Krio Fɔs Oli Baybul

Mayka In Aydɔl Dɛm

¹ Wan man bin de we nem Mayka. I bin de na da il kɔntri we nem Ifrem.

² Wande, Mayka tɛl in mama se, di ilɛvin ɔndrɛd silva kɔpɔ we dɛn bin tif nain mama in an, we bin mek in mama bin de swɛ ɛn bin ivin tɔk bɔt am we insɛf yɛri, de to am. I tɛl am se na im tek am. Nain in mama se, mek PAPA GƆD blɛs in pikin.

³ Mayka gi in mama di ilɛvin ɔndrɛd silva kɔpɔ bak. Nain Mayka in mama se in de gi PAPA GƆD di mɔni. Dɛn go yuz am fɔ mek bod imej ɛn kɔba am wit silva, we min se in dɔn gi di mɔni bak to PAPA GƆD.

⁴ We Mayka gi in mama di kɔpɔ, in mama gi di man we de wok wit silva tu ɔndrɛd silva kɔpɔ. Di man mek di bod imej we kɔba wit silva; i bin de na Mayka in os.

⁵ Mayka bin gɛt in yon shrayn nain os. I so klos we di man dɛn we de mek sakrifays fɔ pipul sin kin wɛr, ɛn sɔm lay lay gɔd dɛn. I mek wan pan in bɔypikin dɛn, man we de mek sakrifays fɔ pipul sin nain shrayn.

⁶ Dɛn tɛm dɛn de, Izrɛl nɔ bin gɛt kiŋ; ɔlman bin de du wetin dɛn fil se rayt fɔ dɛn.

⁷ So, wan yɔŋ man bin tap na Bɛtliɛm we de na Juda. I kɔmɔt na di Juda fambul ɛn na bin Livayt.

⁸ Dis man lɛf Bɛtliɛm siti we de na Juda fɔ go tap ɔda say we i go ebul fɛn ples. So i ol rod. Nain i rich na Mayka in os na Ifrem na di il kɔntri.

⁹ We i rich de, Mayka aks am usay i kɔmɔt. I ansa Mayka se in na Livayt we bin tap na Bɛtliɛm na Juda ɛn in go tap ɛnisay we i fɛn ples.

¹⁰ Nain Mayka tɛl di Livayt se, lɛ i tap to am ɛn bi lɛk in yon papa ɛn man we de mek sakrifays fɔ pipul sin, i go gi am klos ɛn it, ɛn tɛn silva kɔpɔ ɛvri ia.

¹¹ Di Livayt in at gi am fɔ tap wit Mayka we bin jɛs kam tan lɛk wan pan di man in bɔypikin dɛn.

¹² So Mayka mek am man we de mek sakrifays fɔ pipul sin nain shrayn ɛn di man bin tap nain os.

¹³ Nain Mayka tɔk se in no se PAPA GƆD go mek bɛtɛ fala am, bikɔs i gɛt Livayt fɔ di man we de mek sakrifays fɔ pipul sin.