Di Jɔj Dɛm 16 - Krio Fɔs Oli Baybul

We Samsin Bin De Gaza

¹ Samsin go Gaza, usay i mit wan rare gyal ɛn lidɔm wit am.

² We dɛn tɛl di Gazayt dɛn se Samsin de de, dɛn sɔrawnd di ples ɛn mek ambush fɔ am na di siti get ol nɛt. Dɛn bin de de kwayɛt wanol nɛt de tɔk na dɛn at se, dɛn go bia te mɔnin kam; na da tɛm de dɛn go kil am.

³ Bɔt Samsin jɛs wet te midul nɛt. Nain i grap. I go ol di domɔt dɛn na di siti get, ɛn di tu pila, ɛn rut dɛn. Di ba o, ɔltin; i tot dɛn nain sholda ɛn kɛr dɛn go rayt ɔp di il we de frɔnt Ɛbrɔn.

Samsin Ɛn Dilayla

⁴ We ɔl dat pas, Samsin bin kam gɛt wan galfrɛn we nem Dilayla. I bin de na Sorɛk Vali.

⁵ Di filistin dɛn bigman dɛn go mit Dilayla ɛn tɛl am fɔ bɛl Samsin, fɔ ebul no usay in trɛnk de, ɛn aw dɛn go ebul wikin am, so dat dɛn go ebul chen am ɛn put am wanples. Di fayv bigman dɛn tɛl Dilayla se, dɛn ɔl wan bay wan go gi am ilɛvin ɔndrɛd silva kɔpɔ.

⁶ So Dilayla go aks Samsin se usay in wɔndaful trɛnk de, ɛn aw pɔsin go ebul wikin am.

⁷ Nain Samsin tɛl am se na we dɛn tay am wit sɛvin frɛsh rop we dɛn kin tek mek bo ɛn aro, in kin tɔn ɔdinari pɔsin.

⁸ So di Filistin bigman dɛn gi Dilayla sɛvin frɛsh rop, we dɛn kin tek mek bo ɛn aro. Nain i tay Samsin wit di rop dɛn.

⁹ Dilayla bin dɔn mek sɔm man dɛn ayd na wan rum de wet. Nain i ala tɛl Samsin se di Filistin dɛn de kam. Samsin jɛs kɔt di rop dɛn lɛk we rɔba kin kɔt we faya tɔch am. So dɛn nɔ bin ebul no Samsin in sikrit bɔt in trɛnk

¹⁰ So Dilayla tɛl Samsin se, i lay gi am ɛn mek am ful. So naw lɛ i tɛl am aw dɛn go ebul tay am we i nɔ go ebul kɔt am.

¹¹ Nain Samsin tɛl am se, if dɛn tay am wit nyu rop we dɛn nɔ yuz wande, i de wik ɛn tan jɛs lɛk ɔdinari man.

¹² So, Dilayla tek nyu rop we dɛn nɔ yuz wande tay Samsin, ɛn ala tɛl am se di Filistin dɛn de kam, ɛn sɔm bin dɔn ayd insay wan ɔda rum. Samsin jɛs kɔt di rop kɔmɔt nain an lɛk na trɛd.

¹³ Nain Dilayla tɛl Samsin se Samsin stil de lay gi am ɛn de mek am ful. Dilayla stil prɛs am fɔ tɛl am usay in trɛnk de. Nain Samsin tɛl am se, if dɛn plant di sɛvin dada we de nain ed to di trɛd dɛn we dɛn dɔn rɛdi fɔ mek kɔntri klos, ɛn tayt am wit pin, in go wik ɛn bi lɛk ɛni ɔda pɔsin.

¹⁴ We Samsin de slip, Dilayla plant di sɛvin dada to di trɛd dɛn we dɛn dɔn rɛdi fɔ mek kɔntri klos, ɛn tayt am wit pin. Nain i ala tɛl am se di Filistin dɛn de kam. Samsin jɛs wek ɛn lus in ia kɔmɔt pan di trɛd dɛn we dɛn dɔn rɛdi fɔ mek kɔntri klos.

¹⁵ Nain Dilayla aks Samsin se aw i go se i lɛk am we in at nɔ de to am. I se Samsin dɔn mek am ful tri tɛm naw, ɛn nɔ tɛl am usay in trɛnk de.

¹⁶ Ɛvride i de mɔna am fɔ tɛl am usay in trɛnk de. I mɔna am te Samsin vɛks lɛk tik.

¹⁷ Nain Samsin tɛl am in sikrit se, wande dɛn nɔ bab in ia nain ed, bikɔs, frɔm we i de nain mama in bɛlɛ, in na Nazirayt. I tɛl am se di de we dɛn bab am, in go wik ɛn tan jɛs lɛk ɛni ɔda mɔtalman.

¹⁸ We Dilayla si se na di tru Samsin dɔn tɛl am, i sɛn se lɛ di Filistin bigman dɛn go de wantɛm wantɛm, bikɔs Samsin dɔn tɛl am di tru tin. Nain di Filistin bigman dɛn go mit am ɛn dɛn bin ol mɔni na dɛn an.

¹⁹ Bifo dɛn kam, Dilayla bin dɔn koks Samsin te i slip nain lap. We Samsin slip, Dilayla kɔl wan man we i mek krep di sɛvin dada we bin de na Samsin in ed. We i dɔn krep am dɔn, Dilayla bigin tɔmɛnt Samsin. Datɛnde, Samsin in trɛnk bin dɔn lɛf am.

²⁰ Dilayla ala tɛl Samsin se di Filistin dɛn de kam. Nain Samsin wek. Nain i tɔk se in go fri insɛf jɛs lɛk di ɔda tɛm dɛn. Samsin nɔ bin no se PAPA GƆD in spirit dɔn lɛf am.

²¹ Di Filistin dɛn kapchɔ am ɛn pul in yay dɛn kɔmɔt. Dɔn dɛn kɛr am go dɔŋ Gaza ɛn tay am wit ayɛn chen. Naim dɛn bin mek de tɔn di grenin ston na di prizin.

²² Samsin in ia bin dɔn bigin gro bak afta we dɛn bin krep am.

Aw Samsin Day

²³ Di Filistin bigman dɛn gɛda fɔ mek sakrifays to dɛn gɔd we nem Degɔn ɛn fɔ mek gladi gladi, bikɔs dɛn se na dɛn gɔd mek dɛn kech Samsin.

²⁴ We di pipul dɛn si Samsin, dɛn bigin prez dɛn gɔd ɛn de tɔk se, dɛn gɔd dɔn mek dɛn dɔn kech dɛn ɛnimi, di man we bin de nyakanyaka dɛn kɔntri ɛn dɔn kil dɛn bɔku.

²⁵ So, we dɛn dɔn fil fayn, dɛn bigin tɔk se lɛ dɛn pul Samsin kɔmɔt na do mek dɛn tek am mek fɔn. Dɛn pul am kɔmɔt na prizin ɛn tek am mek fɔn. Dɛn mek i tinap bitwin di pila dɛn.

²⁶ Nain Samsin tɛl di bɔbɔ we bin de ol in an waka, bikɔs i nɔ bin de si, se, lɛ i kɛr am go to di men pila dɛn na di os, so in go liŋ pan dɛm.

²⁷ Di os bin ful; ɔl di Filistin bigman dɛn bin de de, ɛn bɔt sɔm tri tawzin man ɛn uman dɛn bin de na di ruf de luk we dɛn bin de tek Samsin mek fɔn.

²⁸ So Samsin pre to PAPA GƆD se, E PAPA GƆD we na mi Gɔd, a de na ya. A de beg yu, gi mi mi trɛnk bak, a de beg yu, gi mi wan tɛm mɔ nɔmɔ, so dat a go tɔn am gi di Filistin dɛn fɔ we dɛn bɔs mi yay.

²⁹ Nain Samsin put in raytan pan wan pila ɛn in lɛf an pan di ɔda wan, ɛn push dɛn wit ɔl in trɛnk.

³⁰ Nain Samsin ala se lɛ in ɛn di Filistin dɛn day togɛda. Samsin push dɛn wit ɔl in trɛnk. Wantɛm wantɛm, di os fɔdɔm pan ɔl di Filistin bigman dɛn ɛn ɔl di pipul dɛn we bin de de. Di pipul dɛn bin so plɛnti dat i kam bi se, di pipul dɛn we Samsin kil we i de day, plɛnti pas di wan dɛn we i kil we i bin de alayv.

³¹ Nain in brɔda dɛn ɛn in ɔda fambul dɛn, go tek am go bɛr am nain papa we nem Manoa in grev, we de bitwin Zora ɛn Ɛshtɔl. Samsin bin bi lida na Izrɛl fɔ twɛnti ia.