Di Jɔj Dɛm 14 - Krio Fɔs Oli Baybul

Samsin Mit Wan Gyal Na Timna

¹ Wande, Samsin go Timna usay i go si wan dɛn Filistin dɛn gyal pikin.

² Nain i go tɛl in papa ɛn mama se in dɔn si wan pan dɛn Filistin dɛn gyal pikin; lɛ dɛn go mared am fɔ am.

³ Nain in mama ɛn papa aks am se if i nɔ si nɔn pan in fambul dɛn gyal pikin dɛn we i lɛk, ɔ ivin pan ɔl di wanol Izrɛl dɛn gyal pikin dɛn we i go mared. If na dɛn ɔnsakɔmsayz filistin dɛn gyal pikin i want. Bɔt Samsin tɛl dɛn se, na im in at tek, so mek dɛn go mared am fɔ am.

⁴ In mama ɛn papa nɔ bin no se na PAPA GƆD de lid am fɔ fɛn we fɔ fɛt di Filistin dɛn. Da tɛm de, na di Filistin dɛn bin gɛt pawa oba Izrɛl.

⁵ Wande, Samsin ɛn in mama ɛn papa go Timna. Samsin go usay dɛn de plant greps na Timna, usay wan yɔŋ layɔn go ala pan am.

⁶ Nain PAPA GƆD in spirit go pan am ebi ebi wan; i chɛr chɛr di layɔn wit in ɛmti an lɛk we pɔsin go chɛr chɛr pikin got. Bɔt i nɔ bin tɛl in mama ɛn papa bɔt wetin i du.

⁷ Afta dat i go tɔk wit di gyal; in at tek am bad bad wan.

⁸ Afta tu tri de, we i de go fɔ go mared di gyal, i bɛn go luk di day layɔn; plɛnti plɛnti ɔni bin dɔn gɛda pan am, ɛn ɔni bin dɔn mek pan am.

⁹ I krep di ɔni put nain an de it am we i de go na rod. We i rich usay in mama ɛn papa de, i gi dɛn sɔm ɛn dɛnsɛf it. Bɔt i nɔ tɛl dɛn se na pan di layɔn in day bɔdi i pul di ɔni.

¹⁰ So Samsin in papa go mit di gyal in pipul dɛn na dɛn os. Samsin bin mek big big pati de, bikɔs na so ɔl di yɔŋ man dɛn bin de du.

¹¹ We di pipul dɛn si Samsin, dɛn mek tati yɔŋ man go tap wit am.

¹² Samsin tɛl dɛn se in de gi dɛn wan parebul. I se if dɛn ebul tɛl am wetin di parebul min bifo di sɛvin de pati dɔn, in go gi dɛn wan wan linin klos ɛn wan wan fɛstival klos.

¹³ I se if dɛn nɔ ebul tɛl am wetin di parebul min, na dɛn go gi am tati linin klos ɛn tati fɛstival klos. Nain dɛn tɛl am se mek i gi dɛn di parebul lɛ dɛn yɛri am.

¹⁴ Samsin se di parebul na, Sɔntin fɔ it kɔmɔt pan di wan we kin it; Swit tin kɔmɔt pan di wan we gɛt trɛnk. Tri de pas, dɛn nɔ ebul tɛl am wetin di parebul min.

¹⁵ Di de we mek fo, di yɔŋman dɛn go mit Samsin in wɛf ɛn trɛtin am se if i nɔ bɛl in man lɛ i tɛl am wetin di parebul min, mek in go tɛl dɛn, dɛn go bɔn in ɛn im mama ɛn papa, ɛn in brɔda ɛn sista dɛn na faya, bikɔs i luk lɛk se dɛn kɔl dɛn go de fɔ go pul ɔl dɛn klos dɛn na dɛn an bay kɔni.

¹⁶ So Samsin in wɛf go kray to am de tɛl am se, aw i et am, i nɔ lɛk am wit ɔl in at; bikɔs i gi in kɔntriman dɛn parebul ɛn nɔ tɛl am di minin. Nain Samsin tɛl am se, we i nɔ tɛl in mama ɛn papa, if na im i go tɛl.

¹⁷ Ɔl di balans de dɛn we bin lɛf fɔ di pati, Samsin in wɛf bin de kray mek i tɛl am di parebul in minin. Di de we mek sɛvin, Samsin insɛf tɛl am bikɔs i dɔn mɔna am tumɔs. Nain i go tɛl in kɔntriman dɛn.

¹⁸ Bifo san go dɔŋ da sem de de, di yɔŋman dɛn go mit Samsin ɛn tɛl am se di minin na, Wetin swit pas ɔni. Wetin gɛt trɛnk pas Layɔn. Nain Samsin tɛl dɛn se, if dɛn nɔ bin ebul gɛt in yon pɔsin fɔ tɛl dɛn, dɛn nɔ bin fɔ ebul tɛl am wetin di parebul min.

¹⁹ Nain PAPA GƆD in spirit go pan Samsin ebi ebi wan; nain i go dɔŋ Ashkɛlɔn go kil tati man na di siti, tek dɛn tinks dɛn go gi di tati yɔŋman we i bin gi di parebul. Na di vɛksteshɔn i tek go bak nain papa in os.

²⁰ Dɛn bin tek Samsin in wɛf gi to in kɔmpin we na bin in bɛsman.