Biblia Todo Logo
Bìoball air-loidhne

- Sanasan -

Di Jɔj Dɛm 13 - Krio Fɔs Oli Baybul


Samsin Bɔn Kam Na Di Wɔl

1 Di Izrɛlayt dɛn du bad bad tin dɛn bak we PAPA GƆD nɔ lɛk, nain PAPA GƆD mek di Filistin dɛn kapchɔ dɛn ɛn kɔntrol dɛn fɔ fɔti ia.

2 Wan man bin de we kɔmɔt na di Dan fambul na Zora. I bin nem Manoa. In wɛf nɔ bin de bɔn ɛn i nɔ gɛt pikin.

3 Nain wande, PAPA GƆD in enjɛl apia to am ɛn tɛl am se, in na uman we nɔ de bɔn ɛn i nɔ gɛt pikin, bɔt i go gɛt bɛlɛ ɛn bɔn wan bɔypikin.

4 So i fɔ tek tɛm; i nɔ fɔ drink wayn ɔ ɛni traŋa rɔm, ɛn i nɔ fɔ it dɛn tin dɛn we PAPA GƆD dɔn se nɔ klin fɔ it,

5 bikɔs i go gɛt bɛlɛ ɛn bɔn wan bɔypikin. Di enjɛl se dɛn nɔ fɔ krep in ia nain ed bikɔs frɔm di de we i bɔn, ɛn i go bi Nazirayt to PAPA GƆD. I se nain go bigin pul Izrɛl na di Filistin dɛn an.

6 So di uman tɛl in man se wan man we de tɔk bɔt PAPA GƆD bin go to am bɔt i luk difrɛn frɔm mɔtalman; i se i biev lɛk PAPA GƆD in enjɛl ɛn i bin fiaful. I se in nɔ aks am usay i kɔmɔt ɛn in nɔ tɛl am in nem.

7 Di uman se di enjɛl tɛl am se, in go bɔn wan bɔypikin, so i nɔ fɔ drink wayn ɔ rɔm, ɔ it di tin dɛn we PAPA GƆD dɔn se nɔ klin fɔ it, bikɔs i go bi Nazirayt frɔm we i bɔn te i day.

8 Nain Manoa pre to PAPA GƆD se lɛ i sɛn di enjɛl we i bin sɛn go bak to dɛn go tich dɛn aw dɛn go mɛn di bɔbɔ we i go bɔn.

9 PAPA GƆD yɛri Manoa in prea; PAPA GƆD in enjɛl go bak go mit di uman we i bin de na fam, bɔt in man Manoa, nɔ bin de de.

10 Di uman rɔn kwik kwik go tɛl in man se da man we bin go to am trade, dɔn kam to am bak.

11 Manoa de biɛn in wɛf tigi tigi de go mit di man ɛn aks am se if nain na di man we bin tɔk to in wɛf. Di man ansa am se yɛs na im.

12 Nain Manoa aks am se, us kayn layf di bɔbɔ fɔ liv na dis wɔl, we wetin in di enjɛl se, bi.

13 Nain PAPA GƆD in enjɛl tɛl am se mek in wɛf jɛs mek shɔ se i du ɔl wetin in bin dɔn tɛl am.

14 Dat na, dat i nɔ fɔ it ɛnitin we kɔmɔt na di greps tik we dɛn de tek mek wayn. I nɔ fɔ drink wayn ɔ rɔm, ɛn i nɔ fɔ it ɛnitin we PAPA GƆD bin dɔn se nɔ klin nain yay fɔ pɔsin fɔ it. Di enjɛl se lɛ i jɛs du ɔl wetin in tɛl am nɔmɔ.

15 Nain Manoa tɛl PAPA GƆD in enjɛl se duya, lɛ i wet lilibit lɛ dɛn kuk wan yɔŋ got fɔ am we i go it.

16 Nain PAPA GƆD in enjɛl tɛl Manoa se, i lɛk sɛf dɛn nɔ mek in go datɛnde, in nɔ go it dɛn it. I se if dɛn wan mek it fɔ am, mek dɛn mek sakrifays we dɛn de bɔn na faya. (Manoa nɔ bin no se na PAPA GƆD in enjɛl)

17 So Manoa aks di enjɛl se wetin nain nem. I se dɛn wan no in nem so dat we di pikin bɔn, dɛn go mɛmba am.

18 Bɔt di enjɛl aks Manoa bak se wetindu i wan no in nem. I se i lɛk i tɛl am, i nɔ go ɔndastand.

19 Manoa tek di yɔŋ got wit di sid ɔfrin ɛn ɔfa am pantap di ston ɔlta to PAPA GƆD we de wok wɔnda.

20 We di faya na di ɔlta de kech go ɔp, PAPA GƆD in enjɛl jɛs wɛr insay di faya ɛn go ɔp. Datɛnde, Manoa ɛn in wɛf bin de luk. Nain dɛn fɔdɔm wit dɛn fes na grɔn.

21 PAPA GƆD in enjɛl nɔ go to Manoa ɛn in wɛf igen. Na da tɛm de Manoa no se na PAPA GƆD in enjɛl, bin kam to dɛn.

22 Nain Manoa tɛl in wɛf se, dɛn go mɔs day bikɔs dɛn dɔn si PAPA GƆD.

23 Bɔt in wɛf se in nɔ tink so; i se if PAPA GƆD bin wan kil dɛn, i nɔ bin fɔ tek dɛn ɔfrin we dɛn bɔn na faya ɛn dɛn sid ɔfrin, ɔ sho dɛn di tin dɛn we i sho dɛn ɔ tɛl dɛn ɔl wetin i tɛl dɛn.

24 So di uman bɔn di bɔypikin ɛn gi am nem Samsin. Di pikin gro ɛn PAPA GƆD blɛs am.

25 PAPA GƆD in spirit bigin gi an trɛnk we i bin tap bitwin Zora ɛn Ɛshtaɔl.

Krio Bible © The Bible Society of Sierra Leone, 2013.

Bible Society in Sierra Leone
Lean sinn:



Sanasan