Di Jɔj Dɛm 12 - Krio Fɔs Oli Baybul

Jɛftha Ɛn Di Ifremayt Dɛm

¹ Di man dɛn na Ifrem rɛdi dɛnsɛf fɔ go fɛt; dɛn krɔs go Zafɔn go mit Jɛftha ɛn aks se wetindu i nɔ bin kɔl dɛn fɔ go ɛp am we i bin wan go fɛt di Amonayt dɛn. Dɛn se bikɔs i nɔ kɔl dɛn, dɛn go bɔn in os.

² Nain Jɛftha tɛl dɛn se in ɛn in pipul bin gɛt big big plaba wit di Amonayt dɛn. Bɔt wɛn i bin kɔl dɛn di Ifremayt dɛn, dɛn nɔ bin go ɛp dɛn.

³ Jɛftha se we in si se dɛn nɔ kam fɔ ɛp am, i risk in layf ɛn krɔs go oba go mit di Amonayt dɛm ɛn PAPA GƆD mek dɛn win. So wetindu dɛn di Ifremayt dɛn kam fɔ kam fɛt am naw?

⁴ Jɛftha insɛf gɛda ɔl in man dɛn ɛn fɛt di Ifremayt dɛn; di Giliad man dɛn kil di Ifremayt dɛn bikɔs di Ifremayt dɛn bin de tɔk se, na rɔnawe di Giliad man dɛn we de na Ifrem ɛn Manasɛ bin rɔnawe kɔmɔt Ifrem.

⁵ Di Giliad man dɛn kapchɔ ɔl di say dɛn we pipul kin krɔs Riva Jɔdan so dat di Ifremayt dɛn nɔ go rɔnawe. We ɛni pan di Ifremayt dɛn we de rɔnawe go fɔ go krɔs Riva Jɔdan, di Giliad man dɛn kin aks dɛn if na Ifrem dɛn kɔmɔt.

⁶ Ɛni wan we se nɔ, dɛn kin aks am fɔ tɔk se, Shibolɛt, bɔt dɛn kin se Sibolɛt bikɔs dɛn nɔ sabi tɔk am gud. Datɛnde dɛn kin kech am kil am na di ples de. Na so dɛn tek kil fɔti tu tawzin pan di Ifremayt dɛn.

⁷ Jɛftha bin bi lida na Izrɛl fɔ siks ia bifo i day. Dɛn bin bɛr am na Giliad Siti.

Ibzan, Ilɔn Ɛn Abdɔn

⁸ Afta Jɛftha, na Ibzan we kɔmɔt Bɛtliɛm bi lida na Izrɛl.

⁹ In bin gɛt tati bɔypikin ɛn tati gyal pikin. I gri lɛ ɔda pipul dɛn we i nɔ fambul to, mared in gyal pikin dɛn. Dɔn i mared tati gyal pikin we i nɔ fambul to, fɔ in bɔypikin dɛn. In bi lida na Izrɛl fɔ sɛvin ia.

¹⁰ We Ibzan day, dɛn bɛr am na Bɛtliɛm.

¹¹ Afta Ibzan, na Ilɔn we kɔmɔt Zɛbyulɔn bi lida na Izrɛl. In bi lida fɔ tɛn ia.

¹² We Ilɔn we kɔmɔt Zɛbyulɔn day, dɛn bɛr am na Aijalɔn na Zɛbyulɔn.

¹³ Afta Ilɔn, na Abdɔn we na Ilɛl we na Pirathɔnayt, in bɔypikin bi lida na Izrɛl.

¹⁴ I bin gɛt fɔti bɔypikin ɛn tati gran pikin we na bɔypikin. Di pikin dɛn ɛn gran pikin dɛn bin de rayd sɛvinti dɔŋki. In bi lida na Izrɛl fɔ et ia.

¹⁵ We Abdɔn we na Ilɛl we na Pirathɔnayt in bɔypikin day, dɛn bɛr am na Pirathɔn insay Ifrem, di Amalɛkayt dɛn kɔntri na di mawnten.