Di Jɔj Dɛm 10 - Krio Fɔs Oli Baybul

Tola

¹ We Abimɛlɛk day, nain Tola we na Pua in pikin ɛn Dɔdɔ in grampikin kam fɔ fri Izrɛl. I kɔmɔt na di Isaka fambul ɛn i bin tap na Shamir na di Mawnten na Ifrem.

² Na bin lida na Izrɛl fɔ twɛnti tri ia bifo i day. We i day, dɛn bɛr am na Shamir.

³ Afta dat, na Jair we kɔmɔt Giliad bi lida na Izrɛl. I bi lida fɔ twɛnti tu ia.

⁴ I bin gɛt tati pikin ɛn dɛn ɔl bin de rayd wan wan dɔŋki. Dɛn bin gɛt tati siti na Giliad we te to dis de, dɛn de kɔl dɛn Jair vilej.

⁵ We Jair day, dɛn bɛr am na Kamɔn.

Jɛftha

⁶ Di Izrɛlayt dɛn du di bad bad tin dɛn bak we PAPA GƆD nɔ lɛk; dɛn butu to dɛn Baal dɛn ɛn Astasis, dɛn Sirian dɛn gɔd dɛn, di gɔd dɛn na Saydɔn ɛn Moab, ɛn di Amonayt ɛn di Filistin dɛn gɔd dɛn. Dɛn kɔmɔt biɛn PAPA GƆD ɛn lɛf fɔ wɔship am.

⁷ Dat mek PAPA GƆD vɛks pan dɛn ɛn mek di Filistin ɛn di Amonayt dɛn kapchɔ dɛn,

⁸ ɛn datɛnde, dɛn sho di Izrɛlayt dɛn pɛpɛ; dɛn trit ɔl di Izrɛlayt dɛn we bin de oba riva Jɔdan na di Amɔrayt dɛn kɔntri na Giliad, bad bad wan fɔ etin ia.

⁹ Di Amonayt dɛn bin ivin krɔs Riva Jɔdan go fɛt di Juda, di Bɛnjamin ɛn di Ifrem fambul dɛn. Dɛn bin de mɔna di Izrɛlayt dɛn bad bad wan.

¹⁰ So di Izrɛlayt dɛn beg PAPA GƆD fɔ ɛp dɛn. Dɛn se dɛn dɔn kɔmit sin bikɔs dɛn bin dɔn kɔmɔt biɛn PAPA GƆD go wɔship Beal.

¹¹ Nain PAPA GƆD aks di Izrɛlayt dɛn se if in nɔ bin dɔn pul dɛn na di Ijipshian, di Amɔrayt, di Amonayt ɛn di Filistin dɛn an.

¹² PAPA GƆD tɛl dɛn se we dɛn bin kray to am, in bin pul dɛn na di Sidonian, di Amalɛkayt ɛn di Maonayt dɛn an we dɛn bin de trit dɛn bad.

¹³ I se pan ɔl dat dɛn kɔmɔt biɛn am, so in nɔ de fɛt fɔ dɛn igen

¹⁴ I tɛl dɛn se lɛ dɛn go kray to di gɔd dɛn we dɛn bin dɔn pik, lɛ dɛn fɛt fɔ dɛn we dɛn de pan trɔbul.

¹⁵ Nain di Izrɛlayt dɛn tɛl PAPA GƆD se dɛn gri se dɛn dɔn kɔmit sin, so lɛ i du dɛn ɛni ɔda tin, bɔt duya, lɛ i pul dɛn kɔmɔt pan trɔbul da de de.

¹⁶ So di Izrɛlayt dɛn trowe di fɔrin gɔd dɛn ɛn bigin wɔship PAPA GƆD, ɛn PAPA GƆD vɛks fɔ di we we i si dɛn de sɔfa.

¹⁷ Nain di Amonayt dɛn gɛda fɔ fɛt; dɛn go kamp na Giliad. Di Izrɛlayt dɛnsɛf bin gɛda fɔ fɛt ɛn dɛn bin kamp na Mizpa.

¹⁸ Bɔt di pipul dɛn ɛn di bigman dɛn na Giliad bin de wɔnda se udat na di pɔsin we go de bifo Izrɛl fɔ fɛt di Amonayt dɛn. Dɛn se na da pɔsin de go bi lida fɔ ɔlman na Giliad.