Di Jɔj Dɛm 1 - Krio Fɔs Oli Baybul

Di Juda Ɛn Saymɔn Fambul Kapchɔ Adɔnaybɛzɛk

¹ Afta Jɔshwa day, di Izrɛlayt dɛn aks PAPA GƆD se uswan pan di fambul dɛn fɔs fɔ go atak di Kenanayt dɛn.

² PAPA GƆD ansa dɛn se na di Juda fambul fɔs fɔ go atak di kenanayt dɛn. I se in go mek dɛn kapchɔ di land.

³ So di Juda fambul kɔl di Saymɔn fambul fɔ go ɛp dɛn fɛt di kenanayt dɛn ɛn kapchɔ dɛn yon pat na di land, ɛn dɛnsɛf go go ɛp di Saymɔn fambul fɛt ɛn kapchɔ dɛn yon. Di Saymɔn fambul go wit dɛn.

⁴ So dɛn go fɛt dɛn. PAPA GƆD mek dɛn bit di Kenanayt dɛn ɛn di Pɛrizayt dɛn. Dɛn kil tɛn tawzin pan dɛn na Bɛzɛk.

⁵ Dɛn go brakɛt Adonaybɛzɛk na Bɛzɛk, so dɛn atak am ɛn fɛt am. Dɛn bit di Kenanayt ɛn di Pɛrizayt dɛn.

⁶ Adɔnaybɛzɛk wan rɔnawe, bɔt dɛn rɔnata am, kech am, ɛn kɔt in tu big fiŋa ɛn in tu big to.

⁷ Nain Adɔnaybɛzɛk tɔk se na sɛvinti kiŋ we dɛn big fiŋa ɛn big to dɛn kɔt kɔmɔt, de pik pik di tin dɛn we de fɔdɔm ɔnda di tebul we i bin de it; wetin i bin du dɛn, nain PAPA GƆD dɔn tɔn gi an bak so. Dɛn kɛr an go Jerusɛlɛm usay i go day.

⁸ Di man dɛn na Juda bin atak Jerusɛlɛm, kil kil ɔlman ɛn bɔn di siti.

⁹ Afta dat, dɛn go fɛt di kenanayt dɛn we de na di mawnten, di wan dɛn na di dray ples ɛn di wan dɛn we de na di flat grɔn.

¹⁰ Afta dat, dɛn go fɛt di wan dɛn we de na Ɛbrɔn usay dɛn bin de kɔl, Kiriath Aba. Dɛn bit Shɛshay, Ayman ɛn Talmay.

Ɔthniɛl Kapchɔ Dɛbir Siti

¹¹ We dɛn kɔmɔt ɔl de, dɛn go fɔ go atak di pipul dɛn na Dɛbir, we datɛnde bin nem Kiriat Sɛfa.

¹² Nain Kelɛb se di pɔsin we go de bifo fɔ kapchɔ Kirith Sɛfa, in go gi am in gyal pikin, Aksa, fɔ mared.

¹³ Na Ɔthniɛl, we na Kelɛb in smɔl brɔda, Kɛnaz, in pikin bin de bifo fɔ kapchɔ di land. So Kelɛb mek Ɔthniɛl mared in gyal pikin we nem Aksa.

¹⁴ Di de we dɛn mared, Ɔthniɛl fos Aksa fɔ aks in papa fɔ land. So Aksa kan dɔŋ di dɔŋki. We Kelɛb si an, i aks an wetin i want.

¹⁵ Aksa tɛl in papa se i want lɛ i gi am prɛzɛnt. I se bikɔs na ɔt ɛn dray ples i bin dɔn gi am, lɛ i gi am ples dɛn we wata de kɔmɔt ɔnda grɔn. Kelɛb gi am di ples dɛn we wata de ɔnda grɔn we de ɔp say ɛn di wan dɛn we de dɔŋ say.

Di Win Dɛn We Di Juda Ɛn Bɛnjamin Fambul Dɛn Win

¹⁶ Di Kɛnayt dɛn, we na Mozis in fadɛnlɔ in jɛnareshɔn, fala di Juda fambul kɔmɔt Jɛriko, we dɛn kin kɔl Pam Tri Siti, go tap na di ɛmti ples we de na di ɔt ɛn dray ples nia Arad na Juda. Dɛn tap de wit di pipul dɛn we dɛn mit de.

¹⁷ Di Juda fambul fala di Saymɔn fambul go fɛt ɛn bit di Kenanayt dɛn we tap na Zɛpath. Dɛn nyakanyaka di wanol siti ɛn chenj in nem to Ɔma.

¹⁸ Di Juda fambul kapchɔ Gaza, Ashkɛlɔn ɛn Ɛkrɔn wit ɔl dɛn siti ɛn vilej dɛn.

¹⁹ PAPA GƆD bin de wit di Juda fambul, so dɛn bin ebul kapchɔ di kɔntri dɛn we de na di mawnten. Bɔt dɛn nɔ bin ebul drɛb di pipul dɛn we de na di flat grɔn bikɔs dɛn karej dɛn na bin ayɛn.

²⁰ Dɛn gi Kelɛb Ɛbrɔn Siti jɛs lɛk wetin Mozis bin dɔn se. So Kelɛb drɛb tri Anak in jɛnareshɔn kɔmɔt na di land.

²¹ Bɔt di Bɛnjamin fambul nɔ bin drɛb di Jɛbyusayt dɛn kɔmɔt Jerusɛlɛm; na dat mek di Jɛbyusayt dɛn de wit di Bɛnjamin fambul na Jerusɛlɛm te tide.

Di Ifrem Ɛn Manasɛ Fambul Kapchɔ Bɛthɛl

²² Josɛf in jɛnareshɔn sɛf bin go atak Bɛthɛl ɛn PAPA GƆD bin de wit dɛn.

²³ Dɛn sɛn pipul dɛn fɔ go wach Bɛthɛl we bin nem Luz.

²⁴ We dɛn go de, dɛn si wan man de kɔmɔt na di siti. Nain dɛn tɛl an se if i sho dɛn aw fɔ go insay di siti, dɛn nɔ go du am natin.

²⁵ Di man sho dɛn di rod fɔ go insay di siti. Di Ifrem ɛn Manasɛ fambul dɛn kil ɔlman na di siti, bɔt dɛn lɛf di man we bin sho dɛn di rod, ɛn in famili.

²⁶ So di man we bin sho dɛn di rod go na dɛn Itayt dɛn land go bil wan siti we i gi nem, Luz. Na da nem de i gɛt te tide.

²⁷ Di Manasɛ fambul nɔ bin drɛb di pipul dɛn we bin de na Bɛth Shan, Taanak, Dɔ, Iblɛam, Mɛgido ɛn dɛn vilej dɛn; di Kenanayt dɛn bin stil de na di land.

²⁸ We di Izrɛlayt dɛn dɔn plɛnti ɛn dɔn gɛt pawa, dɛn mek di Kenanayt dɛn wok fɔ dɛn bay fos, bɔt dɛn nɔ bin drɛb dɛn.

²⁹ Di Ifrem fambul sɛf nɔ bin drɛb di Kenanayt dɛn we bin de na Gɛza; dɛn ɔl bin de togɛda.

³⁰ Di Zɛbyulɔn fambul sɛf nɔ bin drɛb di Kenanayt dɛn we bin de na Kitrɔn ɛn Naalɔl; dɛn ɔl bin de togɛda bɔt dɛn bin mek dɛn wok fɔ dɛn bay fos.

³¹ Di Asha fambul sɛf nɔ bin drɛb di pipul dɛn we bin tap na Ako, Saydɔn, Alab, Akzib, Ɛlba, Afɛka ɛn Riɔb.

³² Di Ashɛrayt dɛn bin tap wit di Kenanayt dɛn we gɛt di land bikɔs dɛn nɔ bin drɛb dɛn kɔmɔt na dɛn land.

³³ Di Naftali fambul nɔ bin drɛb di pipul dɛn na Bɛth Shɛmɛsh ɛn Bɛthanath kɔmɔt na dɛn land; bifo dat, dɛn ɔl bin tap togɛda, bɔt di Naftali fambul bin mek di Kenanayt dɛn wok fɔ dɛn bay fos.

³⁴ Di Amɔrayt dɛn bin push di Dan fambul go bak na di mawnten ɛn nɔ gri lɛ dɛn kam dɔŋ na di flat grɔn.

³⁵ Di Amɔrayt dɛn bin stil tap na Aijalɔn, Shaalbim ɛn Mawnt Ɛrɛs, bɔt di Ifrem ɛn Manasɛ fambul, fɛt dɛn te dɛn win dɛn ɛn fos dɛn fɔ de wok fɔ dɛn.

³⁶ Di Amɔrayt dɛn bɔda kɔmɔt Salɛ te rich Akabim Mawnten ɛn go ɔp.