Izikɛl 9 - Krio Fɔs Oli Baybul

Jerusɛlɛm Gɛt Pɔnishmɛnt

¹ Dɛn i kray lawd lawd wan na mi yes se, “Una drɔ kan nia, una we gɛt fɔ kil di pipul dɛn na di siti, ɔlman ol wetin dɛn kin tek kil nain an.

² A si siks man kɔmɔt na da pat we di get we de ɔpsay de, usay in fes tɔn nɔt; ɔlman ol wetin i go tek kil nain an, ɛn wan ɔda man we bin wɛr linin klos bin de wit dɛn siks man ya; ɛn wan kes we i de rayt pan, bin de bay in sayd. Ɛn dɛn ɔl kan insay ɛn tinap sayd di bras ɔlta.

³ Izrɛl dɛn Gɔd in glori bin dɔn kɔmɔt pan di chɛryubim we i bin rɛst pan, go na di os in domɔt, ɛn kɔl di man we bin wɛr di linin klos ɛn bin gɛt di kes we i de rayt pan, nain sayd.

⁴ Nain PAPA GƆD tɛl an se, “Go ɔlsay na Jerusɛlɛm, ɛn mak di man dɛn we de blo kan dɔŋ ɛn pini fɔseka ɔl dɛn bad bad tin we di pipul dɛn de du na di land, we PAPA GƆD nɔ lɛk.”

⁵ A yɛri we i tɛl di ɔdawan dɛn se, “Una go ɔlsay di siti biɛn am, ɛn kil; una saf yay nɔ fɔ luk dɛnsɛf ɛn una nɔ fɔ sɔri at ɔl;

⁶ kil ol man, yɔŋ man, yɔŋ gyal we nɔ no man yet, lili pikin ɛn uman dɛn, bɔt nɔ tɔch ɛni wan we get di mak. Una bigin na mi os.” So dɛn bin bigin wit di bigman dɛn we bin de bifo PAPA GƆD in os.

⁷ Dɛn i tɛl dɛn se, “Una mek di os dɔti na mi yay, ɛn ful di kɔt yad wit di wan dɛn we dɛn kil. Una go!” So dɛn go, ɛn kil di pipul dɛn na di siti.

⁸ We dɛn bin de kil di pipul dɛn, ɛn mi wangren bin lɛf, a fɔdɔm na grɔn wit mi fes na grɔn de kray se, “E PAPA GƆD! Yu go kil di balans we lɛf pan Izrɛl wit di vɛksteshɔn we yu de put pan Jerusɛlɛm?”

⁹ Nain PAPA GƆD tɛl mi se, “Izrɛl ɛn Juda dɛn sin dɔn pasmak; di land ful wit blɔd, ɛn so so advantej de na di siti; bikɔs dɛn de se, ‘PAPA GƆD dɔn tɔn in bak pan di land, ɛn so PAPA GƆD nɔ de si wetin di bi.’

¹⁰ As fɔ mi, mi safyay nɔ go luk sɛf ɛn a nɔ go sɔri at ɔl, a go mek dɛn pe bak fɔ ɔl di bad tin dɛn we dɛn dɔn du.”

¹¹ So di man we bin wɛr linin klos, ɛn we bin gɛt di kes bay in sayd we i de rayt pan, briŋ wɔd bak se, “A dɔn du wetin yu bin kɔmand mi fɔ du.”