Izikɛl 8 - Krio Fɔs Oli Baybul

Izikɛl In Sɛkɛn Vishɔn Bɔt PAPA GƆD ( 8:1–10:22 ) Dɛn Wɔship Lay Lay Gɔd Dɛn Na Jerusɛlɛm

¹ Di ia we mek siks, insay di nɔmba siks mɔnt, ɛn di de we mek fayv, as a bin sidɔm na mi os, ɛn di big wan dɛn na Juda sidɔm bifo mi, Papa Gɔd we na Gɔd kɔl mi.

² Dɛn a si sɔntin we tan lɛk mɔtalman; faya bin de ɔnda wetin tan lɛk in wes, ɛn wetin tan lɛk brayt layt, lɛk bras we de shayn, nain bin de pantap di wes.

³ I bin pul sɔntin na do we tan lɛkɛ an, ɛn es mi ɔp bay wan pan di dada na mi ed; ɛn di spirit kɛr mi go ɔp bitwin ath ɛn ɛvin, ɛn i briŋ mi insay PAPA GƆD in vishɔn dɛm kam na Jerusɛlɛm, usay fɔ pas go insay di get na di insay kɔt we tɔn to di nɔt, ɛn usay di imej we nem Jɛlɔs ɛn we de mek pipul dɛn jɛlɔs, sidɔm.

⁴ A si PAPA GƆD we na Izrɛl dɛn Gɔd, in glori de, lɛk di vishɔn we a bin si na di flat ples.

⁵ Nain I tɛl mi se, “mɔtalman, es yu yay ɛn luk to di nɔt.” So a es mi yay luk to di nɔt. Nain a si di imej ɔf jɛlɔsi na di nɔt pat na di ɔlta get fɔ kam insay.

⁶ Nain i tɛl mi se, “Mɔtalman, yu si wetin dɛn de du, di bad bad tin we a et we Izrɛl de du na ya, fɔ drɛb mi kɔmɔt na mi os go fa? Wet, yu go si mɔ bad bad tin dɛn we a et.

⁷ Ɛn i bin briŋ mi kam to di domɔt fɔ go insay di yad; ɛn wɛn a luk, a si wan ol na di wɔl.

⁸ Nain i tɛl mi se, “mɔtalman, dig di wɔl;” ɛn wɛn a bin dig di wɔl, domɔt bin de de.

⁹ Nain i tɛl mi se, go insay go luk di shemful bad bad tin we a et we dɛn de kɔmit na ya.”

¹⁰ So a go insay ɛn a si; ɛn dɛn bin drɔ ɔl kayn tin dɛn we de krip, nasti nasti bist dɛm, ɛn ɔl di Izrɛl pipul dɛn lay lay gɔd dɛm we dɛn de wɔship, rawnd di wɔl.

¹¹ Sɛvinti bigman na Izrɛl bin tinap bifo dɛn tin ya, ɛn Jeazanaya we na Shafan in bɔypikin, insɛf bin tinap de. Ɔlman bin ol wan smɔl pɔt nain an we i bin de bɔn insɛns, ɛn di insɛns in smok bin de go ɔp.

¹² Dɛn i tɛl mi se, “mɔtalman, yu si wetin di pipul dɛn na Izrɛl dɛn big wande du wɛn ples dak, ɔlman de nain yon smɔl rum wit in pikchɔ dɛm? Ɛn dɛn de se, PAPA GƆD nɔ de si wi, PAPA GƆD dɔn tɔn in bak pan di kɔntri?

¹³ I tɛl mi igen se, “yu go stil si mɔ ɛn mɔ bad bad tin dɛn we dɛn de du we a et.”

¹⁴ Dɛn i briŋ mi kam to di say we dɛn de pas go to di nɔt get na PAPA GƆD in os; na de uman dɛn sidɔm de kray bifo da lay lay gɔd we nem Tamuz.

¹⁵ Nain i tɛl mi se, “Mɔtalman, yu dɔn si dis ɛ? Yu go si mɔ bad bad tin dɛn we a et, we pas dɛnwanya.”

¹⁶ Nain i bin briŋ mi kam na di kɔtyad we de insay PAPA GƆD in os; we go rich di domɔt na PAPA GƆD in os, we de bitwin di pɔch ɛn di ɔlta, usay bɔt sɔm twɛnti-fayv man we tɔn dɛn bak gi PAPA GƆD in os, de luk na di ist de wɔship di san.

¹⁷ Nain i aks mi se, “Mɔtalman, yu dɔn si dis wande? I izi fɔ di pipul dɛn na Juda fɔ du dɛn kayn bad bad tin dɛn ya we dɛn de du na ya we a et, we mek dɛn mek fɛt fɛt rampant na di land, we go mek mi at wam. Luk, dɛn de put branch na dɛn nos.

¹⁸ Dat go mek a go trit dɛm wit vɛksteshɔn; mi saf yay nɔ go luk dɛnsɛf, ɛn a nɔ go sɔri fɔ dɛm atɔl. I lɛk dɛn ala de kray na mi yes, a nɔ go yɛri dɛm.