Izikɛl 7 - Krio Fɔs Oli Baybul

Izrɛl In Ɛnd Don Nia

¹ PAPA GƆD in wɔd kan to mi se:

² “Yu mɔtalman, na dis Papa Gɔd we na Gɔd de se to Izrɛl: Di tɛm dɔn dɔn! Di tɛm dɔn dɔn fɔ di fo kɔna dɛn na di land.

³ Naw di tɛm dɔn dɔn fɔ una, ɛn a go lɛgo mi vɛksteshɔn pan una, ɛn a go jɔj una bay aw una de biev; ɛn a go pɔnish una fɔ ɔl di bad bad tin dɛm we una de du we a et.

⁴ Ɛn mi saf yay nɔ go luk una sɛf, ɛn a nɔ go sɔri fɔ una atɔl; bɔt a go pɔnish una fɔ aw una de biev we una de du dɛn bad bad tin dɛn we a et. Na datɛnde una go no se, na mi na PAPA GƆD.

⁵ “Na dis Papa Gɔd we na Gɔd se: bad bad trɔbul ɛn sɔfrin pan bad bad trɔbul ɛn sɔfrin! I dɔn bi.

⁶ Una dɔn rich una watalo. Ɔltin dɔn dɔn. Trɔbul dɔn mit una. I dɔn bi fɔ tru.

⁷ Una we tap na di land, una day dɔn kam to una; di tɛm dɔn kam, di de dɔn kam nia, di de we kɔnfyushɔn ɛn bɔku bɔku ala go bi, ɛn nɔto gladi ala sɛf go de na di mawnten dɛm.

⁸ Naw, i nɔ go te sɛf, a go tɔn mi bad bad vɛksteshɔn pan una, ɛn put ɔl mi wamat pan una, ɛn jɔj una bay aw una de biev; ɛn a go pɔnish una fɔ ɔl di bad bad tin dɛm we a et we una de du.

⁹ Ɛn mi saf yay nɔ go luk una sɛf, ɛn a nɔ go sɔri fɔ una atɔl, a go pɔnish una bay aw una de biev, we una de du dɛn bad bad tin dɛn we a et. Dɛn una gɔ no se na mi na di PAPA GƆD we de kil.

¹⁰ “Luk o, di de! Luk, i dɔn kam! Una day dɔn kam, advantej dɔn pul flawa, bigat dɔn mek bɔd.

¹¹ Vayolɛns dɔn bɔku te i dɔn kɔmɔn. Nɔn pan dɛn nɔ go lɛf. Dɛn bɔku bɔku tin dɛn we dɛn gɛt nɔ go lɛf. Ɔl dɛn jɛntri sɛf nɔ go lɛf; ɛn na so ‘ɔl tɛm na mi fɔs,’ nɔ go de pan dɛm.

¹² Di tɛm dɔn kam, di de dɔn kam nia. Lɛ dɛn wan dɛn we de bay nɔ gladi, ɛn lɛ di wan dɛn we de sɛl nɔ fil sɔri, bikɔs big big waala dɔn mit ɔl dɛn pipul dɛn.

¹³ Nɔto bikɔs treda de alayv min se i kin tɔn bak go tek wetin i bin dɔn sɛl. Bikɔs big big waala dɔn mit ɔl dɛn pipul dɛn; dat nɔ go chenj; ɛn nɔbɔdi we de du bad nɔ go ebul fɔ kip in layf bikɔs ɔf di bad bad tin dɛn we i bin dɔn du.

¹⁴ “Dɛn dɔn blo di trɔmpɛt ɛn dɛn dɔn rɛdi ɔl tin; bɔt nɔbɔdi nɔ go go fɛt wa, bikɔs a vɛks pan ɔl di pipul dɛn bad bad wan.

Di Pɔnishmɛnt Fɔ Izrɛl Dɛn Sin Dɛn

¹⁵ Wa go kil pipul na do, siknɛs ɛn aŋri de kil pipul dɛn insay. Na sɔd go kil di wan we de na fil; as fɔ di wan dɛn we de na di siti, na aŋri ɛn siknɛs go kil dɛn.

¹⁶ If ɛnibɔdi ɛskep i nɔ bin day, dɛn go de na di mawnten dɛm, lɛk dɔv dɛm we de na di vali dɛm, dɛn ɔl de pini, dɛn ɔl, fɔ in wikɛdnɛs.

¹⁷ Ɔl di an dɛn dɔn wik ɛn ɔl di ni dɛn wik lɛk wata.

¹⁸ Dɛn tay rɛsbag rawnd dɛn wes, ɛn bad bad fred fred kɔba dɛm; shem de pan dɛn ɔl fes ɛn dɛn ɔl gɛt bɔl ed.

¹⁹ Dɛn trowe dɛn silva na trit, ɛn dɛn gold tan lɛk tin we nɔ klin na PAPA GƆD in yay; dɛn silva ɛn dɛn gol nɔ go ebul fɔ sev dɛm, di de we PAPA GƆD in bad bad vɛksteshɔn go fɔdɔm pan dɛm; dɛn nɔ go ebul satisfay di aŋri we go de kech dɛm, ɔ ful dɛm bɛlɛ sɛf, bikɔs na dɛn silva ɛn gol ya bin tɔn stɔmblin blɔk pan di pipul ɛn mek dɛn de du bad bad wikɛd tin dɛn.

²⁰ Dɛn de tek dɛn fayn fayn dɛkɔreshɔn fɔ mek dɛn fil prawd bɔt dɛnsɛf, ɛn mek laylay gɔd dɛn we PAPA GƆD nɔ lɛk, ɛn di tin dɛn we PAPA GƆD et bad bad wan; so a go mek am tin we nɔ klin na mi yay.

²¹ A go mek fɔrina dɛn rɔnata am fɔ kil am, ɛn a go mek di wikɛd pipul dɛn na di wɔl kapchɔ am; ɛn dɛn go pwɛl ɛn nɔ gɛt nɔn rɛspɛkt fɔ am.

²² A go tɔn mi bak pan dɛn so dat dɛn go mek mi prɛshɔs ples nɔ gɛt rɛspɛkt igen; tifman dɛn go go insay de ɛn mek i lɔs rɛspɛkt,

²³ ɛn mek i ɛmti. “Bikɔs di land ful wit kraym dɛm we gɛt fɔ du wit blɔd ɛn na so so fɛt fɛt de na di siti,

²⁴ a go briŋ di neshɔn dɛn we bad pas ɔl fɔ tek ɔl dɛn os dɛm; a go tap ɔl dɛn pawa we mek dɛn de mek prawd, ɛn dɛn oli ples dɛm nɔ go gɛt nɔn rɛspɛkt.

²⁵ Wɛn bad bad sɔfrin go kam, dɛn go luk fɔ pis, bɔt dɛn nɔ go gɛt am.

²⁶ Bad bad trɔbul ɛn sɔfrin pan bad bad trɔbul ɛn sɔfrin, dɛn se, go fala dɛn se; dɛn de aks di prɔfɛt fɔ vishɔn, bɔt di lɔ day bikɔs di man we de mek sakrifays fɔ pipul sin, nɔ de tich di pipul dɛn, ɛn di bigman dɛn nɔ de advays.

²⁷ Di kiŋ de munin, di prins in at pwɛl bad bad wan, ɛn di pipul dɛn na di land dɛn bɔdi shek wit fred. Na bay aw dɛn tan a go du dɛn, ɛn na bay aw dɛn si tin a go jɔj dɛn; ɛn dɛn go no se na mi na PAPA GƆD.”