Biblia Todo Logo
Bìoball air-loidhne

- Sanasan -

Izikɛl 5 - Krio Fɔs Oli Baybul


Izikɛl Kɔt In Ia

1 “Yu mɔtalman, tek wan shap sɔd, ɛn yuz am lɛk reza bled we baba dɛn kin yuz ɛn krep yu ed, ɛn yu bia bia; dɛn tek wan skel, we di ia ɛn sheb am.

2 Sheb di ia tri pat ɛn bɔn wan pat na faya midul di siti di de afta di blɔked dɔn; yu go tek di ɔda pat pan di tri pat ɛn nak nak am wit sɔd rawnd di siti; dɔn yu go skata di las wan na briz ɛn mi go pul di sɔd kɔmɔt nain kes de biɛn dɛm.

3 Yu go tek smɔl bit ɛn tay am bɔtɔm yu gawn,

4 ɛn yu go tek sɔm pan dis smɔl bit igen, ɛn trowe am na di faya ɛn bɔn am, na frɔm dis faya, wan faya go kɔmɔt go na ɔl di Izrɛlayt dɛn os.”

5 “Na dis Papa Gɔd we na Gɔd tɔk se: Dis na Jerusɛlɛm; a dɔn put am midul di neshɔn dɛm, wit bɔku kɔntri rawnd am.

6 Jerusɛlɛm dɔn wilful tɔn in bak pan mi ɔda dɛm we a gi dɛm, pas di ɔda neshɔn dɛnsɛf, ɛn pan mi lɔ dɛm, pas di kɔntri dɛn we de rawnd am, bikɔs dɛn trowe mi ɔda dɛn ɛn nɔ gri fɔ obe mi lɔ dɛm.

7 So, PAPA GƆD we na Gɔd se; bikɔs una ambɔg pas di neshɔn dɛm we de rawnd una ɛn una nɔ obe mi lɔ dɛm, una nɔ du wetin a se, bɔt una de du wetin di ɔda neshɔn dɛn we de rawnd una dɛn lɔ dɛn se;

8 so, PAPA GƆD se: Luk, mi, ivin misɛf sɛf, a de agens una; ɛn a go kɛri awt mi jɔjmɛnt midul una, frɔnt ɔl di neshɔn dɛn yay.

9 Ɛn bikɔs ɔf di bad bad tin dɛn we una de du we a nɔ lɛk, a go andul una aw a nɔ ɛva du bifo, ɛn wetin a nɔ go ɛva du igen

10 Ɛn na so di papa dɛn we de midul una go it dɛn bɔypikin dɛm ɛn dɛn bɔypikin go it dɛn papa dɛn; ɛn a go kɛriawt di jɔjmɛnt dɛm pan una ɛn ɛniwan pan una we nɔ day a go skata am ɔlsay we briz de blo.

11 Papa Gɔd we na Gɔd se, wans mi na Gɔd, mi de tɛl una se, fɔ tru tru, bikɔs una dɔn mek di ples we pipul dɛn de pre to mi, dɔti na mi yay, wit ɔl una swɛ swɛ tin dɛn ɛn di bad bad tin dɛn we PAPA GƆD nɔ lɛk, na so a go kil una, a nɔ go luk biɛn sɛf, ɛn a nɔ go sɔri sɛf fɔ una.

12 Wan tɔd pan una go day wit bad bad sik dɛn, ɛn na so una nɔ go gɛt it fɔ it at ɔl, ɛn una go day; na chap dɛn go chap chap di sɛkɛn pat dɛn wit sɔd ɔlsay; dɛn a go skata di las pat ɔlsay we briz de blo, ɛn mi go pul di sɔd kɔmɔt nain kes de biɛn dɛm.

13 “Na so a go ebul fɔ kol mi at fɔ di vɛks we a vɛks. Ɛn a go put mi vɛksteshɔn pan dɛm ɛn satisfay misɛf; ɛn dɛn go no se na mi PAPA GƆD dɔn tɔk, bikɔs ɔf di jɛlɔs we a de jɛlɔs fɔ dɛm, afta mi vɛksteshɔn go dɔn fɔdɔm pan dɛm.

14 Pantap dat, a go mek yu ɛmti, ɛn dɛn go laf ɛn sɔktit pan yu ɔlsay na di neshɔn dɛm we de rawnd yu, ɛn di wan dɛn we de si yu.

15 Yu go bi tin we dɛn de sɔktit pan, provok ɛn laf, yu go bi wɔnin ɛn tin we go mek pipul fred bad bad wan, to di neshɔn dɛn we de rawnd yu, wɛn a go kɛriawt mi jɔjmɛnt dɛn pan yu, bikɔs ɔf di vɛks we a vɛks bad bad wan, ɛn wit at at pɔnishmɛnt dɛn. Na mi PAPA GƆD dɔn tɔk so.

16 Wɛn a go lus mi bad bad aro dɛm pan una, we de mek it nɔ de atɔl, aro dɛn fɔ nyakanyaka, we a go tek dɔn una kpatakpata, ɛn wɛn a mek mɔ aŋri mit una ɛn tap di men tin we una de it.

17 A go sɛn bad bad aŋri pan una ɛn dɛn wayl animal dɛn pan una, ɛn dɛn go tek una pikin dɛm; una go gɛt bad bad sik dɛm, ɛn blɔd go de kɔmɔt pan una; ɛn a go mek wa de mit una. Na mi PAPA GƆD dɔn tɔk am.”

Krio Bible © The Bible Society of Sierra Leone, 2013.

Bible Society in Sierra Leone
Lean sinn:



Sanasan