Izikɛl 41 - Krio Fɔs Oli Baybul

¹ Dɛn i bin briŋ mi kam na di nev, ɛn i mɛnshɔ di jamb dɛn; di jamb dɛn bin wayd tri mita pan ich say.

² Ɛn di ɛntrans bin wayd fayv mita; ɛn di ɛntrans ɛn sayd wɔl dɛn bin wayd tu ɛn af mita pan ich say; ɛn i mɛnshɔ di nev we bin lɔŋ twɛnti mita ɛn wayd tɛn mita.

³ Dɛn i go na di insay rum ɛn mɛnshɔ di ɛntrans in jamb dɛn we na bin wan mita; ɛn di ɛntrans wayd tri mita; ɛn di ɛntrans in sayd wɔl dɛm bin bi tru ɛn af mita.

⁴ Ɛn i mɛnshɔ se di rum lɔŋ tɛn mita, ɛn wayd tɛn mita go pas di nev. Ɛn i tɛl mi se, dis na di ples we oli pas ɔl.

Di Rum Dɛn We Bil Pan Di Tɛmpul Wɔl Dɛm

⁵ Dɛn i mɛnshɔ se di tɛmpul wɔl tik tri mita. Ɛn di sayd rum dɛn bin wayd tu mita ɔlrawnd di tɛmpul.

⁶ Ɛn di sayd rum dɛm bin de pam tri stori, wan pantap in kɔmpin, tati pan ich stori. Ɔfsɛt dɛn bin de ɔl rawnd di tɛmpul in wɔl fɔ sɔpɔt di sayd rum dɛn, so dat nɔto di tɛmpul wɔl go sɔpɔt dɛm.

⁷ Ɛn di sayd rum dɛn bin de wayd mɔ ɛn mɔ as dɛn de go frɔm wan stori to di ɔda wan, ɛn dɛn bin ikwal to aw di ɔfsɛt bin de big frɔm wan stori to di ɔda wan ɔl rawnd di tɛmpul; wan stiakes bin go ɔp, pan wan di tɛmpul say; ɛn so pɔsin bin de go ɔp frɔm di flo we de dɔŋ tru di midul flo dɛm te rich di wan we de rayt ɔp.

⁸ Sɛf a bin si se di tɛmpul bin gɛt ɔlrawnd wan platfɔm we bil kam ɔp; di sayd rum dɛn fawndeshɔn dɛm bin mɛnshɔ di wanol teprul, tri mita lɔŋ.

⁹ Di awtsay wɔl we de pan di sayd rum dɛn bin tik tu ɛn af mita, ɛn di pat pan di platfɔm we bin lɛf ɛmti na bin tu ɛn af mita. Bitwin di tɛmpul in platfɔm.

¹⁰ Ɛn di kɔt in rum dɛm, bin wayd tɛn mita ɔl rawnd di tɛmpul, pan ɔlsay.

¹¹ Ɛn di sayd rum dɛn do dɛm bin opin na di pat we di platfɔm bin lɛf ɛmti; wan do opin to di nɔt, ɔda wan to di sawt; ɛn di say we bin lɛf ɛmti bin wayd tu ɛn af mita ɔl rawnd.

Di Bildin Dɛn Na Di Wɛst

¹² Di bildin we fesin di tɛmpul in yad pan di wɛst bin wayd tati fayv mita; ɛn di bildin in wɔl bin tik tu ɛn af mita ɔl rawnd ɛn i bin lɔŋ fɔti fayv mita.

Ɔl Di Mɛzɔmɛnt Na Di Tɛmpul

¹³ Dɛn i mɛnshɔ di tɛmpul ɛn i bin lɔŋ fifti mita; ɛn di yad wit di bildin ɛn in wɔl bin lɔŋ fifti mita;

¹⁴ na so sem we, di ist frɔnt say pan di tɛmpul ɛn di yad bin lɔŋ fifti mita.

¹⁵ Dɛn i mɛnshɔ se di bildin fesin di yad na di wɛst ɛn in wɔl dɛm pan di tu say, bin bi fifti mita. Dɛn bin panɛl di say fɔ pas go insay di tɛmpul ɛn di insay rum ɛn di pɔch we de na do.

Wetin Ɛn Wetin De Pan Di Tɛmpul Bildin

¹⁶ Dɛn ɔl tri bin gɛt winda dɛn we bin shub go insay di wɔl ɛn we bin gɛt risɛs frem dɛn. Dɛn bin panɛl ɔl rawnd di ɔp say pan di frem fɔ go insay di tɛmpul wit bod; frɔm dɔŋ te go ɔp di winda dɛn (dɛn bin kɔba di winda dɛn)

¹⁷ to di spes we de pantap di do, ɛn sɛf to di insay rum, ɛn pan di awtsay; ɛn ɔl rawnd di wɔl

¹⁸ Dɛn bin kav Chɛryubim ɛn pam tri dɛn imej, wan pam tri bitwin wan Chɛrɔb ɛn ɔda wan

¹⁹ ɛvri Chɛrɔb bin gɛt tu fes; wan say gɛt mɔtalman fes we tɔn to di pam tri, ɛn pan di ɔda say wan yɔŋ layɔn fes we tɔn to di pam tri in ɔda say. Dɛn bin kav dɛm ɔl rawnd di wanol tɛmpul.

²⁰ Frɔm di flo to pantap di do, dɛn bin kav Chɛryubim ɛn pam tri dɛm pan di wɔl.

²¹ Di nev in dopost dɛn bin skwaya

Di Ɔlta We Dɛn Bil Wit Bod

²² Wan ɛn af mita ay, wan mita lɔŋ ɛn wan mita wayd, in kɔna dɛm, in bes ɛn in wɔl dɛm bin mek wit wud. I tɛl mi se, “dis na di tebul we de bifo PAPA GƆD.”

Di Do Dɛm

²³ Ɔl tu di nev ɛn di oli ples bin gɛt dɔbul do.

²⁴ Di do dɛm bin gɛt tu lif ich, tu lif dɛn we de swiŋ fɔ ich do.

²⁵ Ɛn pan di nev in do dɛm, dɛn bin kav Chɛryubim ɛn pam tri dɛn lɛk di wan dɛm we dɛn bin kav pan di wɔl dɛm; ɛn wan kanopi we mek wit wud bin de frɔnt di awtsayd pɔch.

²⁶ Ɛn risɛs winda ɛn pam tri dɛm bin de pan di tu say, pan di pɔch in sayd wɔl dɛm.