Izikɛl 40 - Krio Fɔs Oli Baybul

Dɛn Tek Izikɛl Go Jerusɛlɛm

¹ We di ia bigin, dat na fotin ia we dɛn bin kɔnka di siti, da vɛri de Insay di ia we mek twɛnti fayv we wi de ɛgzayl, di de we mek tɛn na di mɔnt de, PAPA GƆD in an bin de pan mi,

² ɛn I briŋ mi in Papa Gɔd in vishɔn kam insay Izrɛl, ɛn i put mi dɔŋ pan wan ay ay mawnten, we sɔm bildin de togɛda we tan lɛk siti bin de fesin mi.

³ Wɛn i bin briŋ mi de, una lisin, wan man bin de de we bin de shayn lɛk bras, ɛn i bin gɛt wan linin layn ɛn wan teprul nain an we i de tek mɛnshɔ ɛn i bin tinap to di kɔridɔ get.

⁴ ɛn di man bin se to mi ‘mɔtalman in bɔypikin, luk wit yu yay dɛm ɛn yɛri wit yu yes dɛm ɛn put na yu maynd ɔl wetin a go sho yu, fɔ dɛn briŋ yu kam ya so dat sɔntɛm, a go sho an to yu; ɛn anawns ɔl wetin yu si to di Izrɛl pipul.

Di Get Wa Di Bi

⁵ Ɛn, una lisin, wan wɔl bin de awtsay rawnd di tɛmpul ɛn di teprul na di man in an, we i bin de tek mɛnshɔ bin lɔŋ tri mita; ich wan bin lɔŋ af mita ɛn lɛk aw an brɔd; so i bin mɛnshɔ se di wɔl brɔd tri mita ɛn ay, tri mita.

⁶ Dɛn i bin go insay to di kɔridɔ in gɛt we fesin ist, ɛn as i de go ɔp di stɛp i mɛnshɔ di get in rayzin se i tri mita dip.

⁷ Ɛn di sayd rum dɛn bin bi tri mita lɔŋ ɛn tri mita wayd ɛn di spes we bin de bitwin di sayd rum dɛn bin bi tu ɛn af mita; ɛn di get in rayzin we bin de nia di get in pɔch we de na di lo pat insay, bin bi tri mita.

⁸ Dɛn i mɛnshɔ di get in pɔch ɛn i bi fo mita

⁹ Ɛn in jamb dɛn bin bi wan mita; ɛn di get in pɔch bin de na di insay pat.

¹⁰ Ɛn tri sayd rum bin de na wan pat na di ist get ɛn tri na di ɔda pat. Di tri tri rum bin gɛt di sem sayz, ɛn di jamb dɛn we de na di tu pat pan di get, na bin di sem sayz.

¹¹ Dɛn i mɛnshɔ se di ɛntrans pan di kɔridɔ in get bin wayd fayv mita; ɛn di get in kɔridɔ bin bi siks ɛn af mita.

¹² Wan baria bin de frɔnt di sayd rum dɛn, af mita pan di wan say ɛn af mita pan di ɔda say; ɛn di sayd rum dɛn bin bi tri mita wan say ɛn tri mita di ɔda say.

¹³ Dɛn i mɛnshɔ di get frɔm di bak pan wan sayd rum to di ɔda wan in bak ɛn i bin wayd twɛlv ɛn af mita frɔm wan do to di ɔda do.

¹⁴ I mɛnshɔ se di pɔch insɛf bi tɛn mita; ɛn di kɔt bin de ɔl rawnd di pɔch.

¹⁵ Na bin twɛnti fayv mita frɔm bifo di get we de na di say fɔ pas go insay, to usay di pɔch we de insay, tap.

¹⁶ Ɛn di get in kɔridɔ bin gɛt winda dɛm ɔlsay, ɛn dɛn jɛs de naro as dɛn de go. Insay pan dɛn jamb dɛn, na di sayd rum dɛn, ɛn sem we so di pɔch bin gɛt winda dɛn ɔl rawnd insay, ɛn pam tri dɛn bin de pan di jamb dɛn, wan, wan pan di tu say.

Di Kɔtyad We De Awtsay

¹⁷ Dɛn i briŋ mi kam insay di kɔt we de awtsay, ɛn una lisin, rum dɛn wit pevmɛnt bin de rawnd ɔlsay di yad; tati rum dɛn nain bin de frɔnt di pevmɛnt.

¹⁸ Ɛn di pevmɛnt bin de rawnd pan di get dɛn say dɛm, ɛn i bin bi di sem lɛk aw di get dɛn lɔŋ; dis na bin di pevmɛnt we de bɔtɔm.

¹⁹ Dɛn i mɛnshɔ se di frɔnt pat pan di get we de bɔtɔm de fifti mita frɔm di frɔnt pat we de awtsay na di insay kɔt.

Di Get We De na Di Nɔth

²⁰ Dɛn i bin go bifo mi to di nɔt, ɛn una lisin, i bin mɛnshɔ aw lɔŋ ɛn aw wayd wan get bin bi ɛn we bin blant di kɔt ɛn bin tɔn to di nɔt

²¹ ɛn sayd rum dɛn, tri tri pan di tu say, ɛn in jamb dɛn wan na di fɔs get; i bin lɔŋ twɛnti fayv mita ɛn wayd twɛlv ɛn af mita.

²² Ɛn in winda dɛm, in pɔch ɛn in pamtri dɛn bin bi di sem sayz lɛk di wan dɛm we de na di get we tɔn to di ist, ɛn sɛvin stɛp bin de fɔ go ɔp to am; ɛn in pɔch bin de insay.

²³ Ɛn fesin di get we de na di nɔt, lɛk di ist, wan get bin de fɔ go na di insay yad; ɛn i mɛnshɔ fifti mita frɔm wan get to di ɔda wan.

Di Get We De na Di Sawt

²⁴ Ɛn i bin lid mi go to di sawt, ɛn luk, wan get bin de na di sawt, ɛn i bin mɛnshɔ in jamb dɛm, ɛn in pɔch, ɛn dɛn bin bi di sem sayz lɛk di ɔda wan dɛm.

²⁵ Winda dɛn bin de rawnd am ɛn rawnd di pɔch, lɛk di ɔdawan dɛn winda dɛn; i bin 25 mita lɔŋ ɛn 12:5 mita lɔŋ.

²⁶ Na sɛvin stɛp bin de fɔ klem go ɔp de, ɛn in pɔch bin de insay; pamtri dɛn bin de pan di tu say na di insay wɔl dɛn.

²⁷ Get bin de na di sawt pat fɔ go na di insay yad; we i mɛzhɔ frɔm get to get fɔ go na di sawt pat, na bin 50 mita.

²⁸ Nain i briŋ mi kam na di insay yad to di sawt get ɛn mɛzhɔ di sawt get; in ɛn di ɔda wan dɛn na bin di sem sayz.

²⁹ Ɔl in sayd rum dɛn, di wɔl dɛn we de insay, ɛn di pɔch dɛn na bin di sem sayz lɛk di ɔda wan dɛn; winda dɛn bin de ɔl rawnd am ɛn in pɔch; i bin 25 mita lɔŋ ɛn 12:5 mita wayd.

³⁰ I bin gɛt pɔch dɛn ɔlrawnd we bin 25 mita lɔŋ ɛn 12:5 mita wayd.

³¹ Di pɔch bin de ɔpozit di kɔt yad ɛn pam tri dɛn bin de na di wɔl dɛn. I bin gɛt et stɛp fɔ go klem go de.

Di Kɔt We De Insay: Di Ist Get

³² Nain i briŋ mi kam na di insay yad we na di ist say ɛn i mɛzhɔ di get. In ɛn di ɔda wan dɛn na bin di sem sayz.

³³ In sayd rum dɛn, di insay wɔl dɛn ɛn in pɔch dɛn ɔl na bin di sem sayz lɛk di ɔda wan dɛn. Winda dɛn bin de ɔl rawnd in ɛn in pɔch; i bin 25 mita lɔŋ ɛn 12:5 mita wayd.

³⁴ In pɔch bin de ɔpozit di yad na do, ɛn bin gɛt pamtri dɛn na di wɔl; wan na di lɛft ɛn wan na di rayt. I bin gɛt et stɛp fɔ klem go ɔp.

³⁵ Nain i briŋ mi kam na di nɔt get ɛn i mɛzhɔ am; in ɛn di ɔda wan dɛn na bin di sem sayz.

³⁶ I sayd rum dɛn, di wɔl dɛn ɛn in pɔch dɛn ɛn di ɔda wan dɛn yon na bin di sem sayz. I bin gɛt winda dɛn ɔl rawnd; i bin 25 mita lɔŋ ɛn 12:5 mita wayd.

³⁷ In pɔch bin de ɔpozit di yad na do, ɛn i bin gɛt pam tri dɛn na di wɔl; wan na di lɛft ɛn wan na di rayt. I bin gɛt et stɛp fɔ go ɔp.

Di Bildin Dɛn Nia Di Nɔt Get

³⁸ Wan rum bin de na di get in pɔch usay dɛn bin fɔ de wan bɔn sakrifays.

³⁹ Tu tebul bin de na di tu say dɛn na di pɔch na di get we na pan dɛn dɛn fɔ kil di bɔn sakrifays, sin ɔfrin ɛn di ɔfrin we yu fɔ mek lɛ yu nɔ sɔfa.

⁴⁰ We yu go na do na di pɔch bay usay fɔ pas kam insay di nɔt get, tu tebul bin de na di pɔch we na di get in sayd.

⁴¹ Fo tebul bin de insay ɛn fo tebul bin de na do nia di get. Na bin et tebul bin de fɔ kil di animal we fɔ sakrifays.

⁴² Fo mɔ tebul we dɛn kɔt ston mek; dɛn na fɔ dɛn bɔn sakrifays. Dɛn bin fifti sɛntimita ay ɛn ɔntɔp na bin sɛvinti fayv sɛntimita na ɔl di fo kɔna dɛn. Na dɛn tebul dɛn ya dɛn fɔ put di nɛf ɛn kɔtlas dɛn we dɛn kin tek kil di animal dɛn fɔ mek bɔn sakrifays ɛn ɔda sakrifays dɛn.

⁴³ Dɛn put put uk dɛn we wan na bin bɔt sɛvinti fayv milimita wayd, rawnd di tebul dɛn ɛj dɛn. Na ɔntɔp di tebul dɛn, dɛn fɔ le di animal we dɛn fɔ sakrifays.

⁴⁴ Nain i tek mi kɔmɔt na do kam insay. A bin si tu rum; wan bin de sayd di nɔt get we yu de luk sawt, ɛn di ɔda wan bin de sayd di sawt get we yu de luk nɔt.

⁴⁵ Nain i tɛl mi se di rum we de luk sawt na fɔ di man dɛn we de mek sakrifays fɔ pipul sin we de inchaj ɔf di tɛmpul,

⁴⁶ ɛn di rum we de luk nɔt na fɔ di man dɛn we de mek sakrifays fɔ pipul sin we de inchaj ɔf di ɔlta. Dɛn na Zedɔk in bɔypikin dɛn, ɛn na dɛn nɔmɔ pan bɔypikin dɛn we kɔmɔt na Livay in layn fɔ go nia PAPA GƆD fɔ go minista to am.

⁴⁷ Nain i mɛzhɔ di yad. Na bin fifti mita skwaya ɛn di ɔlta bin de frɔnt di tɛmpul.

⁴⁸ Nain i briŋ mi kam na di pɔch na di tɛmpul. I mɛzhɔ di wɔl dɛn na di pɔch. I bin tu ɛn af mita na di tu say dɛn, ɛn di get bin sɛvin mita wayd. Di sayd wɔl dɛn na di get na bin wan ɛn af mita wayd na di tu say dɛn.

⁴⁹ Di pɔch bin tɛn mita lɔŋ ɛn siks mita wayd, ɛn na tɛn stɛp bin de fɔ klem go ɔp de; pila dɛn bin de na di wɔl na di tu say dɛn.