Izikɛl 25 - Krio Fɔs Oli Baybul

Prɔfisi Agens Amɔn

¹ PAPA GƆD in wɔd kam to mi se:

² “Mɔtalman, tɔn yu fes to di Amonayt dɛm ɛn prɔfisay to dɛm.

³ Tɛl di Amonayt dɛn se, una lisin to wetin Papa Gɔd we na Gɔd se: na dis Papa Gɔd we na Gɔd se, Bikɔs yu bin shumɔ pan mi ples we dɛn de pre to mi wɛn dɛn bin dɔti am; ɛn pan di Izrɛl wɛn i bin pwɛl kpatakpata natin nɔ de, ɛn pan Juda wɛn dɛn bin de ɛgzayl;

⁴ fɔseka dat, A gi una to di pipul dɛn na di ist as dɛn yon, ɛn dɛn go bil dɛn kamp wit una ɛn bil dɛn os dɛn insay una kɔntri; dɛn go it una frut dɛm ɛn drink una milk.

⁵ A go mek Raba bi say we kamɛl dɛn de kam it gras, ɛn di Amonayt dɛn siti dɛn go bi ples we ship dɛn go de slip. Na da tɛm de una go no se na mi na PAPA GƆD.

⁶ Bikɔs na dis Papa Gɔd we na Gɔd se; Bikɔs una dɔn klap una an dɛm ɛn stamp una fut de gladi, wit ɔl di malis we de insay una fɔ Izrɛl,

⁷ a de tɛl una, a dɔn rɛdi fɔ dil wit una, ɛn gi una lɛk prɛzɛnt to ɔda neshɔn dɛm; ɛn a go pul una kɔmɔt pan di pipul dɛn, ɛn mek una day kɔmɔt lɛf di ɔda kɔntri dɛm; a go dɔnawe wit una. Na da tɛm de una go no se na mi na PAPA GƆD.

Prɔfisi Agens Moab

⁸ “Na dis Papa Gɔd we na Gɔd se: Bikɔs Moab in se Juda dɛn tan lɛkɛ ɔl di ɔda neshɔn dɛm,

⁹ fɔseka dat, a go mek dɛn atak Bet Jɛshimɔt, Beal Meɔn ɛn Kiriataim, we na di siti dɛn we de kɔba di bɔda dɛn na Moab ɛn we dɛn de tek blɔf.

¹⁰ A go gi am togɛda wit di Amonayt dɛn, to di pipul dɛn na di ist, fɔ mek i blant dɛm so dat dɛn nɔ go mɛmba dɛm igen igen na di wɔl,

¹¹ ɛn a go keri awt jɔjmɛnt pan Moab. Na da tɛm de dɛn go no se, na mi na PAPA GƆD.

Prɔfisi Agens Idɔm

¹² “Na dis Papa Gɔd we na Gɔd se: Bikɔs Idɔm bin akt wit rivɛnj pan Juda ɛn dɔn ɔfɛnd bad bad wan fɔ we i rivɛnj pan dɛm,

¹³ na so Papa Gɔd we na Gɔd se fɔseka dat: a go tret mi an pan Idɔm, ɛn kil ɔl di mɔtalman dɛn, ɛn ɔl di animal dɛnsɛf; ɛn a go so mek am, dat i go ɛmti ɛn nɔbɔdi nɔ go tap de; frɔm Timan te rich Dedan, na sɔd go kil dɛm ɔl.

¹⁴ Ɛn a go rivɛnj pan Idɔm tru mi pipul we na Izrɛl; ɛn dɛn go dil wit dɛm bay aw a vɛks ɛn aw mi at wam. Na so Papa Gɔd we na Gɔd se.

Prɔfisi Agens Filistia

¹⁵ “Na dis Papa Gɔd we na Gɔd se: Bikɔs di filistin dɛn bin akt wit rivɛnj ɛn bin tek rivɛnj wit malis na dɛn at fɔ pwɛl kpatakpata we, we nɔ de ɛva dɔn;

¹⁶ fɔseka dat, na dis Papa Gɔd we na Gɔd se: una lisin, a go tret mi an pan di Filistin dɛm, ɛn a go kil di Chɛrɛtayt dɛm ɛn pwɛl di balans we lɛf pan di si kos dɛm.

¹⁷ A go kɛriawt big big rivɛnj pan dɛm wit bad bad vɛksteshɔn ɛn pɔnishmɛnt. Dɔn dɛn go no se na mi na PAPA GƆD, wɛn a go rivɛnj pan dɛm.”