Izikɛl 22 - Krio Fɔs Oli Baybul

Jerusɛlɛm In Kraym Dɛm

¹ Pantap dat, PAPA GƆD in wɔd kam to mi ɛn i se,

² “Yu mɔtalman, yu go jɔj? Yu go jɔj di siti we ful wit blɔd? Wɛl, tɛl am ɔl di bad bad tin dɛn we PAPA GƆD nɔ lɛk we i de du.

³ Yu go tɛl am se, Na dis Papa Gɔd we na Gɔd se: di siti we de shɛd blɔd insay am, so dat in tɛm go kam, ɛn de mek lay lay gɔd dɛm fɔ dɔti insɛf na PAPA GƆD in yay!

⁴ Yu gilti bikɔs ɔf di blɔd we yu dɔn shɛd, ɛn dɔn dɔti yusɛf na PAPA GƆD in yay wit di lay lay gɔd dɛn we yu dɔn mek; ɛn yu dɔn mek yu de dɔn kam nia, di tɛm we yu kɔp fɔ ful. So a dɔn mek una bi tin fɔ laf na dɛn neshɔn dɛm ɛn pipul dɛn fɔ provok na ɔl di ɔda kɔntri dɛm.

⁵ Dɛn wan dɛn we de nia una, ɛn dɛn wan dɛn we de fawe, go mɔk una, una dɛn wikɛd tin dɛm ya, we ful wit so so plaba.

⁶ Biliv mi, di Izrɛl bigman dɛm we tap insay yu, bikɔs ɔf dɛn pawa, de shɛd blɔd.

⁷ Dɛn de luk dɔŋ pan di dadi ɛn mami we de wit una; una de tek mɔni dɛm bay pawa na di trenja dɛm we kan tap wit una, dɛn an; una de rɔŋ dɛn wan dɛm we dɛn dadi dɛm dɔn day, ɛn dɛn uman dɛn we dɛn man dɛn dɔn day.

⁸ Una dɔn luk dɔŋ pan mi oli tin dɛm ɛn nɔ rɛspɛkt mi de fɔ blo ɛn rɛst.

⁹ Sɔm man dɛn de de we de tɔk bad tin dɛm bɔt pɔsin dɛm, ɛn pwɛl dɛm so dat dɛn go kil dɛm; ɔda man dɛn de we de mek sakrifays na dɛn mawnten; sɔm man dɛn de rud midul una.

¹⁰ Sɔm man dɛn de lidɔm wit dɛn dadi dɛn wɛf dɛm; sɔm de lidɔm wit uman dɛn we de ɔp.

¹¹ Dɛn de du bad bad tin we Papa Gɔd nɔ lɛk wit dɛn neba wɛf; ɔda wan dɛn de we dɔti na Papa Gɔd in yay; ɔda dɛn de we de dɔti dɛn sista, we na dɛn dadi in gyal pikin.

¹² Sɔm man de we de tek brayb fɔ kil; una de tek intrɛs ɛn ad mɔ pan di mɔni ɛn mek prɔfit na una neba dɛn ed bay pawa; ɛn una dɔn fɔgɛt bɔt mi, Na so Papa Gɔd we na Gɔd se.

¹³ Fɔseka dat, a go klap mi an fɔseka di tif tif prɔfit we una dɔn mek, ɛn fɔseka di blɔd we una dɔn wes na Izrɛl.

¹⁴ Una go ebul bia fɔ lɔŋ? Ɔ una go stil gɛt trɛnk we a go dɔn dil wit una? Na Mi PAPA GƆD dɔn tɔk am, ɛn a go du am.

¹⁵ A go skata una na dɛn difrɛn neshɔn dɛm ɛn sheb sheb una na difrɛn difrɛn kɔntri dɛm, ɛn a go bɔn di dɔti kɔmɔt pan una kpatakpata.

¹⁶ Ɛn dɛn go tɔk bad bɔt mi nem fɔseka una, ɛn una go no se na mi na PAPA GƆD.

PAPA GƆD In Big Ovin We De Klin Tin Dɛm

¹⁷ PAPA GƆD in wɔd kam to mi se:

¹⁸ “Mɔtalman in bɔypikin, Izrɛl dɔn wɔtlɛs to mi; dɛn ɔl, silva, bras ɛn tin ɛn ayɛn ɛn lɛd we de insay di big ovin, ɔl dɛn wɔtlɛs.

¹⁹ Fɔseka dat, na dis Papa Gɔd we na Gɔd se: bikɔs una ɔl dɔn wɔtlɛs, a go gɛda una na Jerusɛlɛm.

²⁰ Lɛk aw mɔtalman dɛn de gɛda silva ɛn bras ɛn ayɛn ɛn lɛd ɛn tin put na di big ovin, ɛn blo faya pan am fɔ mɛlt am; na so a go gɛda una wit vɛksteshɔn ɛn wamat, ɛn a go put unainsay di big ovin ɛn mɛlt una.

²¹ A go gɛda una ɛn blo di faya we de pan mi vɛksteshɔn pan una, ɛn unasɛf go mɛlt insay de.

²² Lɛk we silva de mɛlt insay big ovin, na so unasɛf go mɛlt insay de; ɛn una go no se na mi PAPA GƆD dɔn put mi vɛksteshɔn pan una.

Izrɛl Dɛn Lida Dɛn Sin Dɛm

²³ PAPA GƆD in wɔd bin kam to mi se: “Mɔtalman tɛl am se:

²⁴ yu na land we nɔ klin, ɔ we ren nɔ bin fɔdɔm pan vɛksteshɔn de.

²⁵ Di bigman na di kɔntri, tan lɛk we layɔn de ala we i de chɛr chɛr wetin i kech fɔ it; dɛn pwɛl mɔtalman dɛn layf; dɛn dɔn tek dɛn jɛntri ɛn dia dia tin dɛm; dɛn dɔn mek bɔku uman tɔn, dɛn we dɛn man dɛn dɔn day, insay de.

²⁶ Di man dɛn we de mek sakrifays fɔ pipul sin dɔn trit mi lɔ dɛn wit fityay, ɛn nɔ gɛt rɛspɛkt fɔ mi oli tin dɛm. Dɛn nɔ gɛt nɔn difrɛn bitwin wetin oli ɛn wetin na ɔl man yon, ɛn na so dɛn nɔ tich pipul wetin difrɛn pan wetin klin ɛn wetin nɔ klin, dɔn, dɛn nɔ de tek mi de fɔ blo ɛn rɛst mek natin, we min se dɛn nɔ rɛspɛkt mi.

²⁷ Dɛn bigman dɛn we de de, tan lɛk wulf we de chɛr di tin we i kech fɔ it, dɛn de kil pipul ɛn nyakanyaka pipul dɛn layf fɔseka jɛntri we nɔ klin na Gɔd yay;

²⁸ Ɛn in prɔfɛt dɛn dɔn dab dab wayt wɔsh fɔ dɛm; dɛn de si lay lay vishɔn dɛm we nɔ tru ɛn de gi laylay mɛsej dɛm se, ‘Na dis Papa Gɔd we na Gɔd se,’ wɛn PAPA GƆD nɔ bin tɔk atɔl.

²⁹ Di pipul dɛn na di land, dɔn praktis fɔ tek tin bay fos ɛn fɔ tif ɛn kil; dɛn dɔn sɔprɛs dɛn po pipul, ɛn dɛn dɔn tek tin bay pawa kɔmɔt na trenja an ɛn natin nɔ de kɔmɔt biɛn.

³⁰ Ɛn a bin luk fɔ wan man pan dɛn, we go bil di wɔl ɛn tinap na di gap bifo mi fɔ di land, so a nɔ go nyakanyaka am; bɔt a nɔ fɛn nɔbɔdi.

³¹ Fɔseka dat, a dɔn put mi vɛksteshɔn pan dɛm; a dɔn kil dɛm wit mi wamat in faya; a dɔn pe dɛn bak bay aw dɛn biev. Na dis Papa Gɔd we na Gɔd tɔk se.”