Izikɛl 2 - Krio Fɔs Oli Baybul

PAPA GƆD Kɔl Izikɛl Fɔ Bi Prɔfɛt

¹ PAPA GƆD tɛl mi se “Mɔtalman, grap tinap, ɛn a go tɔk to yu.”

² Wɛn PAPA GƆD tɔk to mi, di spirit kam insay mi ɛn es mi ɔp ɛn mek a tinap; ɛn a yɛri PAPA GƆD de tɔk to mi.

³ I tɛl mi se, “mɔtalman, a de sɛn yu to di pipul dɛn na Izrɛl, we na neshɔn we dɛn ɔl traŋayes, ɛn dɛn dɔn tɔn dɛn bak pan mi; dɛn ɛn dɛn fɔstɛmpapa dɛm dɔn du bad bad tin dɛm to mi frɔm datɛnde, te tide.

⁴ “Pantap dat, di pipul dɛn rud ɛn traŋayes: a de sɛn yu to dɛm; ɛn yu go tɛl dɛn se, ‘na so Papa Gɔd we na Gɔd se,’

⁵ “wɛda dɛn yɛri ɔ dɛn nɔ gri fɔ lisin (bikɔs dɛn na pipul dɛn we nɔ de yɛri wɔd) dɛn go stil no se wan man we na prɔfɛt bin tap wit dɛm.

⁶ “Ɛn yu, mɔtalman, nɔ fred dɛm o, ɛn nɔ fred wetin dɛn go de tɔk se, ivin if chuk chuk plant ɛn chuk chuk sɛf tap wit yu, ɛn yu sidɔm pan skɔpiɔn dɛm, nɔ fred di wɔd we dɛn go tɔk, nɔ pwɛl at if dɛn de luk yu bad yay sɛf, bikɔs dɛn na pipul we de ribɛl.

⁷ “Yu go tɛl dɛm wetin a se, wɛda dɛn gri fɔ lisin ɔ nɔt; bikɔs dɛn na traŋayes pipul dɛn.

⁸ “Bɔt yu mɔtalman, lisin wetin a de tɛl yu; nɔ traŋayes lɛk dɛn rebɛl dɛn; opin yu mɔt ɛn it wetin a de gi yu.”

⁹ Ɛn wɛn a luk, nain a si wan an tret to mi, ɛn i ol wan skrol we dɛn rayt pan;

¹⁰ ɛn i opin am bifo mi; ɛn dɛn rayt biɛn ɛn bifo, ɛn na sɔri sɔri tin dɛn, tin dɛn bɔt bɛrin ɛn swɛ.