Izikɛl 17 - Krio Fɔs Oli Baybul

Di Parebul Bɔt Di Tu Igul Ɛn Di Greps

¹ PAPA GƆD in wɔd kam to mi se:

² “Mɔtalman, pul wan stori we gɛt minin, to di Izrɛlayt dɛn.

³ Tɛl dɛn se na dis Papa Gɔd we na Gɔd se; wan big big igul wit big big wiŋ dɛm ɛn laŋa laŋa feda, we in fɛda dɛn gɛt bɔku bɔku difrɛn kɔla, bin kam na Libanɔn ɛn tinap pantap di Sida tik;

⁴ i brok brok di yɔŋ tik dɛn we de pantap pantap di sida tik ɛn kɛr am go na wan kɔntri we dɛn biznɛs na tredin, ɛn put am na wan siti we biznɛs man dɛn plɛnti.

⁵ Dɛn i tek pan di sid na di land ɛn plant am na dɔti we tin de gro fayn pan; i put am nia say we gɛt bɔku bɔku wata. I plant am lɛk smɔl Wilo tik,

⁶ ɛn i gro ɛn tɔn to wan shɔt greps tik we de prɛd, ɛn in branch dɛn bin tɔn to di Igul, ɛn in rut tinap usay i bin de. So i bi ful greps tik, ɛn pul an dɛm ɛn bɔku lif.

⁷ Bɔt wan ɔda bibig Igul bin de we gɛt big big wiŋ dɛm ɛn bɔku bɔku fɛda; ɛn i kan bi se dis greps tik bɛn in rut to dis Igul ɛn sɛn in an dɛm to am so dat i go wata am. Di igul pul di greps tik na di bed we dɛn bin plant am,

⁸ ɛn kɛr an go plant am bak na di gud dɔti usay bɔku bɔku wata de, so dat i go pul bɔku an dɛn ɛn bia frut, ɛn tɔn gud kwaliti greps tik.

⁹ Mɔtalman, tɛl dɛn se, na dis Papa Gɔd we na Gɔd aks se: i go bɛtɛ? Di Igul nɔ go rut am kɔmɔt ɛn kɔt kɔt ɔl in an dɛm, so dat ɔl in frɛsh lif dɛn we de gro, go wida? I nɔ nid trɛnk ɔ bɔku pipul dɛn fɔ rut an kɔmɔt.

¹⁰ If dɛn rut am kɔmɔt kɛr go plant am ɔda say, i go bɛtɛ? I nɔ go wida ɔltogɛda wɛn briz we kin kɔmɔt na di ist, blo am - i nɔ go wida ɔltogɛda na di bed we i de gro?

Dɛn Ɛksplen Di Parebul

¹¹ Nain PAPA GƆD in wɔd kan to mi se:

¹² “Tɛl dɛn pipul dɛn we nɔ de yɛri wɔd se, Una nɔ no wetin dɛn tin ya min? Tɛl dɛn se kiŋ na di Babilɔn bin kam na Jerusɛlɛm, ɛn tek in kiŋ ɛn in bigman dɛn kɛr dɛn go to insɛf na Babilɔn.

¹³ Ɛn i tek wan pan di kiŋ in sid ɛn mek Kɔvinant wit am ɛn mek i swɛ. (Na di bigman dɛn na di land i bin dɔn kɛr go,

¹⁴ so dat di kindɔm go de dɔŋ ɛn nɔ go ebul tɔk na pɔblik, bɔt na we dɛn du wetin di Kɔvinant se, di Kɔvinant go ebul fɔ tinap.)

¹⁵ Bɔt i tɔn agens am we i sɛn pɔsin dɛn fɔ go tinap fɔ am na Ijipt, so dat dɛn go gi am ɔs dɛn ɛn wan big ami. I go sɔksid? Ɛnibɔdi we du dɛn kayn tin ya go ebul go fri? I go ebul brok di Kɔvinant ɛn stil go fri?

¹⁶ Papa Gɔd we na Gɔd se, wans a de, fɔ tru tru, na usay di kiŋ we mek am kiŋ tap, di wan we i nɔ luk biɛn fɔ di swɛ we dɛn bin dɔn swɛ, di wan we nain Kɔvinant i brok, na Babilɔn i go day.

¹⁷ Fero wit in pawaful ami ɛn in bɔku bɔku sojaman dɛn, nɔ go ebul fɔ ɛp am na wa, wɛn dɛn go dɔn payl bɔku ay ay dɔti dɛn, ɛn dɛn dɔn mek blɔked wɔl dɛn fɔ kil bɔku pipul.

¹⁸ Bikɔs i bin luk dɔŋ pan di swɛ we i bin swɛ, ɛn brok di Kɔvinant, ɛn bikɔs i bin dɔn gri bɔt stil du ɔl dɛn tin de, i nɔ go go fri.

¹⁹ Fɔseka dat, na dis PAPA GƆD se: wans a de, fɔ tru tru, fɔseka mi swɛ we a swɛ we i nɔ tek mek natin, ɛn mi Kɔvinant we i brok, a go mek dɛn pe.

²⁰ A go prɛd mi nɛt oba am ɛn mi trap go kech am; ɛn a go briŋ am kam Babilɔn, ɛn jɔj am de, fɔseka di trizin we i dɔn kɔmit agens mi.

²¹ Ɛn ɔl in spɛshal ami man dɛn go day; ɛn di wan dɛn we nɔ day go skata ɔlsay na wɔl; ɛn una go no se na mi PAPA GƆD dɔn tɔk.

PAPA GƆD In Prɔmis Fɔ Abop

²² Na dis PAPA GƆD se: “Misɛf sɛf go tek wan tik wit lif dɛn pan am, kɔmɔt pan di ay ay sida in ed, ɛn a go plant am; a go brok wan wik wan kɔmɔt pan di yɔŋ yɔŋ wan dɛn we de ay pas ɔl, ɛn misɛf sɛf go plant am na wan ay ay mawnten.

²³ A go plant am na di ay mawnten na Izrɛl, so dat i go pul bɔku an ɛn bia frut, ɛn i go bi wan gud kwaliti sida. Ɛn ɔl kayn animal go tap ɔnda de; ɛn ɔl kayn bɔd go bil dɛn os na di shed we di branch dɛn mek.

²⁴ Ɛn ɔl di tik dɛn na bush go no se na mi PAPA GƆD, de briŋ di ay tik kan dɔŋ, ɛn kɛr di tik we de dɔŋ go ɔp. Na mi de mek rɔ tik day, ɛn mek di dray tik frɛsh bak. Na mi PAPA GƆD dɔn tɔk am, ɛn a go du wetin a se.