Izikɛl 16 - Krio Fɔs Oli Baybul

Jerusɛlɛm We Nɔ Tret

¹ PAPA GƆD in wɔd kam to mi igen se;

² “mɔtalman, mek Jerusɛlɛm no bɔt di bad bad tin dɛn we i de du we a nɔ lɛk,

³ ɛn tɛl am se, na dis Papa Gɔd we na Gɔd de se to Jerusɛlɛm: usay una kɔmɔt ɛn usay una bɔn, na di Kenanayt dɛn land; Una papa na bin Amorayt ɛn una mama na bin Itayt.

⁴ As fɔ di de we una bin bɔn, dɛn nɔ bin kɔt una nebul striŋ, ɛn dɛn nɔ bin was una wit wata fɔ mek una klin, dɛn nɔ bin rɔb sɔl pan una ɔ rap una wit bebi pisis.

⁵ Nɔ bɔdi nɔ bin sɔri fɔ una fɔ du ɛni pan dɛn tin ya fɔ una bikɔs dɛn sɔri seka we dɛn sɔri fɔ una sɛf; bɔt dɛn bin trowe una na opin fil bikɔs dɛn bin et una, di de we una bin bɔn.

⁶ “Ɛn wɛn a bin pas, ɛn si aw una bin de twis twis insay una blɔd, a tɛl una we una de insay una blɔd se, una nɔ go day,

⁷ ‘una go gro ɔp, lɛk plant na di fam. Ɛn una bin gro big ɛn tɔl tɔn yɔŋ uman we dɔn ful yay; una bɔbi bin dɔn kɔmɔt ɛn una ia dɔn gro; bɔt una bin stil de nekɛd ɛn ɛmti bɔdi.

⁸ “Wɛn a bin pas nia una ɔda tɛm, ɛn luk una, a si se una dɔn du fɔ mek lɔv, so a kɔba una wit mi skat ɛn kɔba una nekɛdnɛs; yɛs, a bin prɔmis fɔ mared una ɛn a mek Kɔvinant wit una, ɛn una kam blant mi, na so Papa Gɔd we na Gɔd se.

⁹ Dɛn, a was una wit wata ɛn was di blɔd kɔmɔt pan una, ɛn anɔynt una wit ɔyl.

¹⁰ A wɛr klos we dɛn wok wit trɛd, pan una; ɛn wɛr lɛda sus na una fut, a rap una wit fayn linin ɛn kɔba una wit silk lapa.

¹¹ Ɛn a drɛs una wit trinkɛt; a put breslɛt na una an, ɛn chen na una nɛk.

¹² Ɛn a put riŋ na una nos, ɛn yerin na una yes, ɛn fayn fayn krawn na una ed.

¹³ Na so a drɛs una wit gold ɛn silva; ɛn una klos na bin fayn linin, ɛn silk, ɛn klos we dɛn wok wit trɛd; una bin de it fayn flawa, ɔni ɛn ɔyl, una bin fayn bad bad wan lɛk tin fɔ it, ɛn kan tan lɛk kwin.

¹⁴ Ɛn una bin femɔs ɛn gɛt rɛspɛkt ɔlsay na wɔl fɔseka di fayn we una bin fayn, ɛn una nɔ bin gɛt ɛni bɔt, fɔseka di fayn fayn we a bin mek una fayn we ɔlman de kɔle pan, na so Papa Gɔd we na Gɔd se.

¹⁵ “Bɔt una bin biliv pan una fayn we una fayn, ɛn biev lɛk rare gyal fɔseka di femɔs we una bin femɔs, ɛn sɛl unasɛf to ɛnibɔdi we bin de pas.

¹⁶ Una tek sɔm pan una klos dɛn ɛn bil fayn kɔla kɔla shrayn fɔ unasɛf, ɛn na pan dɛm una de du una rare biznɛs; di kayn we nɔ bin ɛva bi, ɛn we nɔ go ɛva bi igen.

¹⁷ Sɛf, una tek una fayn fayn gold ɛn silva trinkɛt dɛn we a bin dɔn gi una, ɛn bil mɔtalman imej dɛn fɔ unasɛf ɛn tek dɛn de rare;

¹⁸ ɛn una tek una klos we dɛn wok wit trɛd, kɔba dɛn, ɛn put mi ɔyl ɛn mi insɛns bifo dɛn.

¹⁹ Ɛn mi bred we a gi una - a fid una wit fayn flawa, ɔyl ɛn ɔni - una sɛt tebul bifo dɛn fɔ mek i go smɛl fayn.

²⁰ Ɛn una tek una bɔy ɛn gyal pikin dɛn, we una bɔn fɔ mi ɛn sakrifays dɛn to dɛn gɔd ya fɔ mek dɛn it dɛn. Una rare nɔ bin min natin

²¹ we mek una kil mi pikin dɛn ɛn sakrifays dɛn na faya to dɛn?

²² Ɛn pan ɔl di bad bad tin dɛn we una de du we a nɔ lɛk, ɛn ɔl una rare layf, una nɔ bin mɛmba di tɛm we una bin yɔŋ, we una bin nekɛd, nɔ gɛt natin, ɛn una bin de twis na una blɔd.

Jerusɛlɛm In Rare Layf

²³ “Ɛn afta ɔl di bad bad tin we una dɔn du, (swɛ, swɛ go fɔdɔm pan una, na so Papa Gɔd we na Gɔd se),

²⁴ una bil rum we nɔ gɛt winda fɔ unasɛf ɛn mek ay ay ples na ɔl dɛn skwaya dɛn;

²⁵ una bil big ɛn ay ples ɔp ɔl dɛn trit ɛn sɛl una fayn, de sɛl unasɛf to ɛnibɔdi we de pas, ɛn rare mɔ ɛn mɔ.

²⁶ Una rare to dɛn Ijipshian dɛn, una neba dɛn we want uman ɔltɛm, we mek una de rare mɔ ɛn mɔ, we de mek a vɛks bad bad wan.

²⁷ So, na dat mek a bin dil wit una, ɛn nɔ gi una di land we a bin gi una igen, ɛn gi una to una ɛnimi dɛn mek dɛn satisfay dɛnsɛf pan una, dat na dɛn filistin dɛn gyal pikin dɛn, we bin shem fɔ di rud we, we una bin de biev.

²⁸ Una bin rare to dɛn Asirian dɛnsɛf, bikɔs una nɔ bin de satisfay. Yɛs, una bin rare to dɛn, ɛn stil nɔ bin satisfay.

²⁹ Una bin ad mɔ ɛn mɔ pan una rare layf we una bin rare to di pipul dɛn na Chaldia, we dɛn de du tredin; pan ɔl dat una nɔ bin satisfay.

³⁰ “PAPA GƆD aks dɛn se, aw una lɛkman so, bikɔs luk di kayn tin dɛn we una du; di tin dɛn we rare gyal we nɔ gɛt shem igen, kin du;

³¹ una de bil una rum we nɔ gɛt winda ɔp ɔl dɛn trit, ɛn mek ay ay ples na ɔl dɛn skwaya. Bɔt una nɔ bin tan lɛk rare gyal bikɔs una nɔ bin de aks fɔ mɔni.

³² Lɛkɛ mared uman we de lidɔm wit trenja dɛn ɛn nɔ de gri fɔ in mared man.

³³ Dɛn man dɛn de gi prɛzɛnt dɛn to ɔl dɛn rare gyal, bɔt na una de gi prɛzɛnt to ɔl una switat dɛn. Una de brayb dɛn fɔ kan to una kɔmɔt ɔl usay una de rare.

³⁴ So una bin difrɛn pas ɔda uman dɛn we de rare; nɔbɔdi nɔ bin beg una fɔ rare; ɛn una bin gi unasɛf fri wan we nɔbɔdi nɔ aya una; na dat mek una difrɛn.

PAPA GƆD In Jɔjmɛnt pan Jerusɛlɛm

³⁵ “So yu rare gyal! Yɛri PAPA GƆD in Wɔd:

³⁶ Na dis PAPA GƆD se: Bikɔs una dɔn opin unasɛf na pɔblik gbara-gbara wan ɛn una bin dɔn pul klos de nekɛd wit una switat dɛn, ɛn fɔseka ɔl una laylay gɔd dɛn, ɛn fɔseka una pikin dɛn blɔd we una gi to dɛn,

³⁷ a go gɛda ɔl una switat, di wan dɛn we una bin de ɛnjɔy wit, ɔl di wan dɛn we una bin lɛk ɛn ɔl di wan dɛn we una bin de ɔlsay wit, ɛn a go pul una klos ɛn nekɛd una bifo dɛn, so dat ɔl man go si una nekɛdnɛs.

³⁸ Ɛn a jɔj una lɛk aw dɛn kin jɔj uman dɛn we pwɛl mared, ɛn di wan we kil pɔsin, ɛn a go briŋ vɛksteshɔn ɛn jɛlɔs blɔd kan pan una.

³⁹ Ɛn a go put una na una switat dɛn an, ɛn dɛn go brok una rum dɛn we nɔ gɛt winda, una big ɛn ay ples dɛn; dɛn go pul ɔl una klos kɔmɔt pan una ɛn tek una fayn fayn trinkɛt dɛn, ɛn lɛf una nekɛd ɛn ɛmti.

⁴⁰ Dɛn go briŋ bɔku bɔku pipul dɛn kan fɛt una, ɛn dɛn go ston una ɛn chap chap una pis pis wit dɛn sɔd.

⁴¹ Ɛn dɛn go bɔn una os dɛn ɛn kɛriawt jɔjmɛnt pan una bifo bɔku uman dɛn yay. A go mek una tap fɔ wok lɛk rare gyal ɛn una nɔ go sɛl unasɛf igen igen

⁴² Na so a go pul mi wamat pan una ɛn a nɔ go jɛlɔs fɔ una igen. Mi at go kol ɛn a nɔ go vɛks pan una igen igen.

⁴³ Bikɔs una nɔ mɛmba di tɛm we una bin yɔŋ, bɔt una dɔn mek a vɛks bad fɔ ɔl dɛn tin ya; so, a go pe una bak fɔ ɔl di bad tin dɛn we una dɔn du, na so Papa Gɔd we na Gɔd se. Una nɔ dɔn kɔmit bay we una liv lus layf miks wit di bad bad tin dɛn we una de du we PAPA GƆD nɔ lɛk?

Lek Mami, Lek Pikin

⁴⁴ Una lisin, ɛnibɔdi we wan pul parebul, go pul parebul bɔt una, ‘lɛk mami, lɛk pikin.”

⁴⁵ Yu na yu mami in gyal pikin, yu mami we et in man ɛn pikin dɛn; ɛn yu na yu sista dɛn sista, we et dɛn man ɛn dɛn pikin dɛn. Una mama na bin Itayt ɛn una papa na bin Amorayt.

⁴⁶ Ɛn Sameria na yu big sista, we bin tap wit in gyal pikin dɛn, na di nɔt pat to una, ɛn Sɔdɔm na yu smɔl sista, we in ɛn in gyal pikin dɛn de na di sawt pat to una.

⁴⁷ Pan ɔl dat, una nɔ bin satisfay fɔ du lɛk aw dɛn bin de du, ɔ du di kayn bad tin dɛn we dɛn bin de du we PAPA GƆD nɔ lɛk; bɔt insay smɔl tɛm nɔmɔ, una dɔn kɔrɔpt pas dɛn pan ɔl tin we dɛn de du.

⁴⁸ PAPA GƆD se, wans a de, yu sista sɔdɔm ɛn in gyal pikin dɛn nɔ dɔn du wetin yu ɛn yu gyal pikin dɛn dɔn du.

⁴⁹ Na dis yu sista Sɔdɔm gilti bɔt; in ɛn in gyal pikin dɛn bin prawd, dɛn bin gɛt tumɔs fɔ it ɛn bin gɛt alafia, bɔt dɛn nɔ bin ɛp di po wan dɛn ɛn di wan dɛm we kin want sɔntin bad bad wan na layf.

⁵⁰ Dɛn bin de mek lɛk dɛn bɛtɛ pas ɔlman, ɛn bin de du di bad bad tin dɛn we a nɔ lɛk na mi yay.

⁵¹ Sameria nɔ kɔmit af di sin dɛn we yu kɔmit; yu dɔn du mɔ bad bad tin dɛn we a nɔ lɛk, pas dɛm, ɛn yu dɔn mek yu sista luk lɛk udat de waka tret wit mi fɔseka ɔl di bad bad tin dɛn we yu du we a nɔ lɛk.

⁵² Tot yu disgres yu sɛf sɛf, bikɔs yu dɔn mek yu sista gɛt masi na jɔjmɛnt; bikɔs ɔf di kayn sin we yu kɔmit, we pas yu sista dɛn yon fafawe, dɛn dɔn gɛt rayt pas yu. So yu fɔ shem. Yu sɛf sɛf tot yu disgres so, bikɔs yu dɔn mek yu sista dɛn luk lɛk udat de waka tret wit mi PAPA GƆD.

Sɔdɔm Ɛn Sameria Go De Lɛk Aw Dɛn Bin De

⁵³ “A go gi dɛn ɔl dɛn jɛntri bak, ɔl wetin Sɔdɔm ɛn in gyal pikin dɛn bin gɛt, ɛn ɔl wetin Sameria ɛn in gyal pikin dɛn bin gɛt, ɛn a go gi dɛn ɔl wetin una fɔ gɛt,

⁵⁴ bikɔs una go tot una disgres ɛn fil shem fɔ ɔl wetin una dɔn du, una go mek dɛn fil bɛtɛ.

⁵⁵ As fɔ una sista dɛn, Sɔdɔm ɛn in gyal pikin dɛn go de lɛk aw dɛn bin de bifo, ɛn Sameria ɛn in gyal pikin dɛn go de lɛk aw dɛn bin de bifo; ɛn una ɛn una gyal pikin dɛn go de lɛk aw dɛn bin de.

⁵⁶ Sɔdɔm we na yu sista, nɔto bin yu chɔ stik di tɛm we yu bin de yu de,

⁵⁷ bifo di wikɛd we yu de du kɔmɔt na do? Naw yu dɔn tɔn lɛk am, yu dɔn tɔn tin fɔ laf fɔ Idɔm in gyal pikin dɛm ɛn ɔl una neba dɛm, ɛn fɔ dɛn Filistin dɛn gyal pikin dɛn, ɛn dɛn wan dɛn we de rawnd una we de luk dɔŋ pan yu.

⁵⁸ PAPA GƆD se, yu de bia di pe fɔ una lus layf ɛn ɔl di bad bad tin dɛn we una bin du we a nɔ lɛk.

Di Kɔvinant We Go De So Te Go

⁵⁹ “Yɛs, na dis Papa Gɔd we na Gɔd se: a go dil wit una bay aw una bin du, una we dɔn kɔmɔt biɛn di swɛ we una bin swɛ ɛn brok di Kɔvinant,

⁶⁰ pan ɔl dat a go stil mɛmba mi Kɔvinant wit una dat na di tɛm we una bin yɔŋ, ɛn a go mek Kɔvinant wit una we go de so te go.

⁶¹ Da tɛn de, una go mɛmba aw una bin de du, ɛn fil shem wɛn a go tek una sista dɛn, una big wan ɛn smɔl wan dɛn, ɛn gi dɛn to una as una gyal pikin dɛn, bɔt nɔto fɔseka di Kɔvinant we a mek wit una.

⁶² A go mek Kɔvinant wit una, ɛn una go no se, na mi na PAPA GƆD,

⁶³ so dat una go mɛmba ɛn kɔle, ɛn nɔ ɛva ebul se natin igen, bikɔs una go shem, we a go fɔgiv una fɔ ɔl wetin una bin dɔn du, na so Papa Gɔd we na Gɔd se.”