Izikɛl 12 - Krio Fɔs Oli Baybul

Di Prɔfɛt Tɔn Rɛfyuji

¹ PAPA GƆD tɛl mi se:

² “Mɔtalman, yu tap wit pipul dɛn we nɔ de gri fɔ yɛri wɔd, we gɛt yay fɔ si bɔt nɔ de si, we gɛt yes fɔ yɛri bɔt nɔ de yɛri;

³ bikɔs dɛn na pipul dɛn we nɔ de gri fɔ yɛri wɔd. So mɔtalman, pak tin dɛn we pɔsin we de go ɛgzayl kin pak fɔ yusɛf ɛn go ɛgzayl santɛm we dɛn go si yu; yu fɔ go lɛk pɔsin we de go ɛgzayl, kɔmɔt na yu ples go ɔda say we dɛn de si yu. Sɔntɛnde, dɛn go ɔndastand, ivin do dɛn na pipul dɛn we nɔ de gri yɛri wɔd.

⁴ Yu fɔ briŋ yu lod kan na do santɛm we dɛn go si am lɛk lod we dɛn pak fɔ go ɛgzayl; ɛn yu fɔ kɔmɔt go ivintɛm we ɔlman de si yu, lɛk we pipul dɛn we fɔ go ɛgzayl kin du.

⁵ Dig ol na di wɔl bifo dɛn yay ɛn pas de go na do.

⁶ We dɛn de luk, yu go es di lod ɛn put an na yu sholda, ɛn tek am go na do wɛn di ples dak; yu go kɔba yu fes, so dat yu nɔ go si di land; bikɔs a dɔn mek yu fɔ bi wɔnin fɔ Izrɛl.

⁷ Ɛn a bin du lɛk aw PAPA GƆD bin kɔmand mi. A bin briŋ mi lod kan na do santɛm, lɛkɛ lod fɔ go ɛgzayl, ɛn ivintɛm a dig ol na di wɔl wit mi yon an dɛn; ɛn as dɛn bin de luk, a kɔmɔt ɛn tot ɔl mi tiŋs dɛn na mi sholda ɛn go we ples dɔn dak.

⁸ Wɛn do klin, PAPA GƆD tɛl mi se:

⁹ “Mɔtalman, di Izrɛlayt dɛn, dɛn pipul dɛn we nɔ de gri yɛri wɔd nɔ dɔn aks yu se, ‘wetin yu de du?’

¹⁰ Tel dɛn se, ‘Na dis Papa Gɔd we na Gɔd se: dis mesej na fɔ di lida dɛn na Jerusɛlɛm ɛn ɔl di Izrɛlayt dɛn we de de.’

¹¹ Tɛl dɛn se, ‘mi na wɔnin fɔ una: lɛk aw a bin dɔn du na so i go bi fɔ dɛnsɛf; dɛn go go ɛgzayl ɛn dɛn go tek dɛn mek slev.

¹² Ɛn di lida we de wit dɛn go tot in lod nain sholda we ples dak ɛn go; i go dig ol na di wɔl ɛn go pas de go; i go kɔba in fes so dat i nɔ go si di land wit in yay.-

¹³ Ɛn a go prɛd mi nɛt oba am ɛn mi trap go kech am; ɛn a go briŋ am kam Babilɔn, na di Babilonian dɛn land, ɛn stil i nɔ go si am; ɛn i go day de.

¹⁴ Ɛn a go skata ɔl di wan dɛn we de rawnd am, di wan dɛn we de ɛp am ɛn ɔl in sojaman dɛn ɔlɔbɔt usay briz de blo; ɛn a go pul di sɔd kɔmɔt nain kes pan dɛn.

¹⁵ Ɛn dɛn go no se na mi na PAPA GƆD, wɛn a go dɔn sheb dɛn na di difrɛn neshɔn dɛn ɛn skata dɛn na di difrɛn kɔntri dɛn.

¹⁶ Bɔt a go mek tu tri pan dɛn nɔ day na wa, ɔ wit bad bad aŋri ɔ wit dɛn bad bad sik, so dat dɛn go kɔnfɛs di bad tin dɛn we dɛn bin dɔn du, to di difrɛn neshɔn we dɛn go go, ɛn dɛn go no se na mi na di PAPA GƆD.

We Di Prɔfɛt Trimbul Na Sayn

¹⁷ Pantap dat, PAPA GƆD in wɔd kam to mi se:

¹⁸ “mɔtalman, de trimbul we yu de it yu bred ɛn de shek wit bad bad fred we yu de drink wata;

¹⁹ ɛn tɔk bɔt di pipul dɛn na di land se, Na so Papa Gɔd we na Gɔd se bɔt di pipul dɛn we tap na Jerusɛlɛm na Izrɛl; dɛn go it dɛn bred wit fred fred, ɛn dɛn go drink wata wit pwɛl at, bikɔs dɛn go tek klia ɔltin kɔmɔt na di kɔntri, fɔseka ɔl di fɛt fɛt we di wan dɛn we tap de, de fɛt.

²⁰ Ɛn siti dɛn we pipul dɛn tap, nɔbɔdi nɔ go tap de igen, ɛn di kɔntri go ɛmti; ɛn una go no se na mi na PAPA GƆD.’

Wan Parebul We Pipul Lɛk Ɛn Wan Mesej We Pipul Nɔ Lɛk

²¹ PAPA GƆD in wɔd kam to mi se:

²² “mɔtalman, uskayn parebul dis we yu gɛt bɔt Izrɛl, we se, ‘Tɛm de go ɛn ɔl di vishɔn dɛn nɔ min natin”?

²³ So tɛl dɛn se, “Na dis PAPA GƆD we na Gɔd se: A go mek dɛn tap dis parebul ya, ɛn dɛn nɔ go yuz am as parebul igen na Izrɛl!’ Bɔt tɛl dɛn se, di tɛm dɔn kam nia ɛn ɔl di vishɔn fɔ bi.

²⁴ Bikɔs nɔn laylay vishɔn ɔ ipokrit prɔfisi nɔ go de igen na Izrɛl.

²⁵ Bɔt mi we na PAPA GƆD go tɔk di wɔd we a go tɔk, ɛn i go bi. PAPA GƆD se, ‘i nɔ go te igen, bɔt na una tɛm, una dɛn pipul dɛn we nɔ de gri yɛri wɔd, a go tɔk di wɔd ɛn du am.’

²⁶ PAPA GƆD in wɔd kam bak to mi se:

²⁷ “mɔtalman, di pipul dɛn na Izrɛl se, ‘di vishɔn we i de si nɔto fɔ jis nɔ, ɛn i de prɔfisay bɔt tɛm we de fawe fɔs.’

²⁸ So tɛl dɛn se, Na so Papa Gɔd we na Gɔd se: nɔn mi wɔd dɛn nɔ go te igen, bɔt di wɔd we a tɔk, go bi, na so Papa Gɔd we na Gɔd se.’