Izikɛl 11 - Krio Fɔs Oli Baybul

Dɛn Kɔndɛm Jerusɛlɛm

¹ Di Spirit es mi ɔp ɛn briŋ mi kam na di ist get na PAPA GƆD in os; dat na di get we tɔn ist. A si twɛnti fayv man tinap na di domɔt; ɛn a si Jeazanaya we na Ezɔ in bɔypikin, ɛn Pelatia we na Bɛnaya in bɔypikin, we na di pipul dɛn lida dɛm.

² Ɛn PAPA GƆD tɛl mi se, “mɔtalman, na di man dɛm dɛnwanya we de plan bad bad tin dɛn ɛn gi wikɛd advays na dis siti;

³ na dɛn de tɔk se, ‘Di tɛm nɔ kam nia yet fɔ bil os; dis siti na di big ayɛn pɔt ɛn wi na di bif.’

⁴ So, prɔfisay agens dɛm, yu mɔtalman, prɔfisay.

⁵ Nain PAPA GƆD in Spirit kam pan mi, ɛn tɛl mi se, “Tɛl dɛn se: na dis PAPA GƆD se; na dis una de tink, una di pipul dɛn na Izrɛl; bikɔs a no di tin dɛm we de kam insay una maynd.

⁶ Una dɔn ad pan di wan dɛn we una dɔn kil na dis siti, ɛn una dɔn ful di trit dɛn wit dedebɔdi.

⁷ Na dat mek na dis Papa Gɔd we na Gɔd se: Una pipul dɛn we una dɔn kil, we una dɔn lɛf midul di siti, na di bif, ɛn di siti na di big ayɛn pɔt; bɔt dɛn go pul una kɔmɔt midul de.

⁸ Papa Gɔd we na Gɔd se, una de fred sɔd; ɛn a go briŋ di sɔd kam pan una.

⁹ Ɛn a go pul una kɔmɔt de, ɛn a go gi una to fɔrina dɛn, ɛn kɛriawt jɔjmɛnt pan una.

¹⁰ Na wa una go day; a go jɔj una na Izrɛl bɔda, ɛn una go no se na mi na PAPA GƆD.

¹¹ Dis siti nɔ go bi una big ayɛn pɔt ɛn na so unasɛf nɔ go bi di bif insay de; a go jɔj una na Izrɛl bɔda.

¹² Ɛn una go no se na mi na PAPA GƆD; bikɔs una nɔ bin de du wetin mi lɔ dɛn se, ɛn una nɔ bin de du wetin a se, bɔt una bin de du wetin di neshɔn dɛn we de rawnd una, dɛn yon lɔ dɛn se.”

¹³ Ɛn i kam bi se, we a bin de prɔfisay, Pɛlataya we na Bɛnaya in bɔypikin, day. So a fɔdɔm wit mi fes ɛn ala lawd wan se, ‘E PAPA GƆD we na mi Gɔd! Yu go kil ɔl di balans pipul we lɛf pan di Izrɛlayt dɛn kpatakpata?’

PAPA GƆD In Prɔmis To Di Wan Dɛn Na Ɛgzayl

¹⁴ Ɛn PAPA GƆD in wɔd bin kam to mi se:

¹⁵ “Mɔtalman, yu brɔda dɛm, a se, yu yon yon brɔda dɛm, di wan dɛn we de na Ɛgzayl wit yu, di wanol Izrɛl pipul, na bɔt dɛn ɔl di wan dɛn we tap na Jerusɛlɛm dɔn se, ‘dɛn dɔn go fawe kɔmɔt nia PAPA GƆD; dɛn dɔn gi wi dis land fɔ wisɛf.’

¹⁶ So tɛl dɛn se, “Papa Gɔd we na Gɔd se: ɛn pan ɔl we a dɔn pul dɛn go fawe kɔmɔt nia dɛn neshɔn dɛm, ɛn pan ɔl we a dɔn skata dɛm na di difrɛn difrɛn kɔntri dɛm, a bin stil de wit dɛn fɔ lili wayl na di kɔntri dɛn we dɛn bin dɔn go.’

¹⁷ So tɛl dɛn se, “Papa Gɔd we na Gɔd se: A go gɛda una kɔmɔt to di difrɛn pipul dɛm, ɛn gɛda una kɔmɔt na di difrɛn kɔntri dɛm we una bin skata go, ɛn a go gi una di land ɔf Izrɛl.’

¹⁸ Ɛn wɛn dɛn go dɔn kam de, dɛn go pul ɔl di tin dɛm we PAPA GƆD et bad bad wan, ɛn ɔl di bad bad tin dɛn we PAPA GƆD nɔ lɛk.

¹⁹ Ɛn a go gi dɛm ɔl di sem maynd, ɛn put nyu spirit insay dɛm; ɛn a go pul di at we tan lɛk ston kɔmɔt insay dɛm, ɛn gi dɛm at we na flɛsh,

²⁰ so dat dɛn go de du wetin mi lɔ dɛn se, ɛn obe mi ɔda dɛm; ɛn dɛn go bi mi pipul, ɛn mi go bi dɛn Gɔd.

²¹ Bɔt as fɔ di wan we dɛn at de pan di tin dɛn we a et bad bad wan ɛn di bad bad tin dɛn we a nɔ lɛk, a go mek dɛn pe bak fɔ ɔl di bad tin dɛn we dɛn dɔn du. Na so PAPA GƆD se.

PAPA GƆD In Glori Lɛf Jerusɛlɛm

²² Nain di Chɛryubim dɛn es dɛn wiŋ ɔp, ɛn di wil dɛn bin de bay dɛn sayd; ɛn PAPA GƆD we na Izrɛl dɛn Gɔd, in glori bin de oba dɛm.

²³ Ɛn PAPA GƆD in glori, go ɔp kɔmɔt insay di siti, ɛn go tinap na di mawnten we de na di ist pat na di siti.

²⁴ Nain di Spirit es mi ɔp, ɛn insay di vishɔn we PAPA GƆD in Spirit bin de sho mi, i briŋ mi kam Chaldia to di wan dɛn we de ɛgzayl. Dɛn di vishɔn we a bin de si lɔs pan mi.

²⁵ Ɛn a tɛl di wan dɛn we de ɛgzayl ɔl di tin dɛn we PAPA GƆD bin sho mi.