Izikɛl 10 - Krio Fɔs Oli Baybul

PAPA GƆD In Glori Kɔmɔt Na Di Tɛmpul

¹ Nain a luk ɛn a si sɔntin lɛk Dayamɔn apia na di skay we bin de oba di Chɛryubim in ed, ɛn i bin shep lɛk tron.

² Nain i tɛl di man we bin wɛr di linin klos se, “Go insay di wil dɛm we de tɔn wit spid ɔnda di Chɛryubim dɛm; ful yu an dɛn wit di faya kol dɛn we de kech bitwin di Chɛryubim dɛm, ɛn skata dɛn oba di big siti.” Ɛn a bin si am we i de go.

³ Di Chɛryubim dɛm bin tinap na di sawt pat na di os wɛn di man go insay; ɛn klawd bin ful di kɔt yad we de insay.

⁴ Nain PAPA GƆD in glori kɔmɔt pan di Chɛryubim dɛm go na di os in domɔt; di os bin ful wit klawd, ɛn di kɔt yad bin de shayn brayt brayt wan wit PAPA GƆD in glori.

⁵ Dɛn bin de yɛri di sawnd we di Chɛryubim dɛn wiŋ dɛn bin de mek, te rich na di kɔt yad we de na do, ɛn i bin tan lɛk we PAPA GƆD Ɔlmayti de tɔk.

⁶ Ɛn wɛn i bin kɔmand di man we wɛr di linin klos se, “tek faya kɔmɔt bitwin di wil dɛm we de tɔn wit spid ɛn we de bitwin di Chɛryubim dɛm,” i bin go insay go tinap sayd wan wil.

⁷ Ɛn wan Chɛryubim tret in an kɔmɔt bitwin di Chɛryubim dɛm to di faya we bin de bitwin di Chɛryubim dɛm, ɛn bin tek sɔm pan am ɛn put am na di man we bin wɛr linin klos, in an dɛn, we bin tek am ɛn go na do.

⁸ Di Chɛryubim dɛm bin luk lɛk se dɛn gɛt sɔntin lɛk wan mɔtalman an ɔnda dɛn wiŋ dɛm.

⁹ Ɛn a bin luk, ɛn si se di fo wil dɛm bin de bay di Chɛryubim dɛn sayd, wan wil de bay ich Chɛryubim in sayd, ɛn di wil dɛn bin luk lɛk dayamɔn we de glita.

¹⁰ Ɛn as fɔ aw di wil dɛn bin luk lɛk, dɛn fo bin fiba lɛkɛ se wan wil bin de insay di ɔda wil.

¹¹ Wɛn dɛn go, dɛn go ɛnisay ɛn nɔ tɔn rawnd, bɔt ɛnisay we di frɔnt wil go, di ɔda wan dɛnsɛf de fala ɛn nɔ tɔn rawnd;

¹² Ɛn dɛn rim dɛm, dɛn spoks dɛm, ɛn di wil dɛnsɛf, bin gɛt yay dɛn ɔl rawnd - dat na di wil dɛn we dɛn fo bin gɛt.

¹³ As fɔ di wil dɛm, a bin yɛri dɛn kɔl dɛm di wil dɛn we de tɔn wit spid.

¹⁴ Ɛn ich wan bin get fo fes; di fɔs fes na bin Chɛrɔb fes, di sɛkɛn fes na bin mɔtalman fes, di tɔd fes na bin layɔn fes, ɛn di las wan na bin igul fes.

¹⁵ Nain di Chɛryubim flay go ɔp. Dɛn na bin di krichɔ dɛn we gɛt layf we a bin si nia di Riva Chɛba.

¹⁶ Ɛn wɛn di Chɛryubim kin muf, di wil dɛnsɛf kin de bay dɛn sayd; ɛn wɛn di Chɛryubim kin es dɛn wiŋ dɛn ɔp fɔ flay kɔmɔt na di ath go, di wil dɛn nɔ kin tɔn kɔmɔt nia dɛn.

¹⁷ Wɛn dɛn kin tinap wanples, di wil dɛnsɛf kin tinap wanples, ɛn wɛn di Chɛryubim kin flay go ɔp, di wil dɛnsɛf kin go ɔp wit dɛn; bikɔs di layf krichɔ dɛn spirit bin de insay di wil dɛm.

¹⁸ Nain PAPA GƆD in glori bin muf kɔmɔt na di os in domɔt go tinap oba di Chɛryubim dɛm.

¹⁹ Ɛn di Chɛryubim dɛm bin es dɛn wiŋ dɛn ɔp ɛn flay kɔmɔt na di ath ɛn go ɔp as a bin de luk, ɛn di wil dɛn bin de bay dɛn sayd as dɛn de go; ɛn dɛn bin tinap na di do we bin de na di ist get na PAPA GƆD in os; ɛn Izrɛl dɛn Gɔd in glori bin de oba dɛm.

²⁰ Dɛnwanya na bin di krichɔ dɛm we gɛt layf we a bin si ɔnda Izrɛl dɛn Gɔd, nia Riva Chɛba; ɛn a bin no se dɛn na Chɛryubim dɛm.

²¹ Ich wan bin gɛt fo fes; ich wan gɛt fo wiŋ, ɛn ɔnda dɛn wiŋ, dɛn bin gɛt wetin tan lɛk mɔtalman an.

²² As fɔ aw dɛn fes dɛn bin luk lɛk, na bin di sem fes dɛn we a bin dɔn si fɔs nia Riva Chɛba. Dɛn ɔl bin de go tret bifo.