Izikɛl 1 - Krio Fɔs Oli Baybul

IZIKƐL IN FƆS VISHƆN WE I SI PAPA GƆD (1:1–7:27) PAPA GƆD In Tron

¹ Di ia we mek tati, insay di nɔmba fo mɔnt ɛn di de we mek fayv, as a bin de wit di wan dɛn we bin de na ɛgzayl, nia Riva Chɛba, di klawd bin opin ɛn a si bɔku vishɔn bɔt PAPA GƆD.

² Di nɔmba fayv de insay di mɔnt (dat nainsay di ia we mek fayv we kiŋ Jɛoaykin bin dɔn de na ɛgzayl),

³ PAPA GƆD bin tɔk to Izikɛl, we na bin Buzay in bɔypikin, ɛn we na bin man we de mek sakrifays fɔ pipul sin ɛn bin tap na di Babilonian dɛn kɔntri, we bin de nia di Riva Chɛba; ɛn PAPA GƆD in an bin de pan am na da ples de.

⁴ As a bin de luk, wantɛm, tinada blo kɔmɔt na di nɔt, ɛn wan bibig klawd we bin brayt rawnd. Faya bin jɛs de flash kɔmɔt pan am, ɛn i tan lɛk brayt shayn shayn bras de midul di faya.

⁵ Fo tin we tan lɛk krichɔ we gɛt layf, bin kɔmɔt midul di faya. Ɛn we yu luk dɛm, dɛn bin fiba mɔtalman,

⁶ bɔt ich wan pan dɛm gɛt fo fes, ɛn fo wiŋ.

⁷ Dɛn fut dɛn bin tret tret, ɛn dɛn ɔnda fut bin tan lɛk kaw pikin ɔnda fut; ɛn dɛn bin de glita lɛk bras we dɛn dɔn pɔlish.

⁸ Ɔnda di wiŋ dɛn we bin de pan dɛn fo sayd dɛm, gɛt mɔtalman an. Na so dɛn fo fes ɛn wiŋ bin tan:

⁹ dɛn wiŋ dɛn bin de tɔch dɛn kɔmpin yon; ɛn ich wan bin de go tret bifo, ɛn dɛn nɔ de tɔn ɛnisay we dɛn de go.

¹⁰ As fɔ aw dɛn fes fiba, ich wan bin gɛt mɔtalman fes frɔnt am. Dɛn gɛt layɔn fes na dɛn rayt say, man kaw fes na dɛn lɛf say ɛn igul fes na dɛn bak.

¹¹ Na so dɛn fes bin tan. Dɛn wiŋ dɛn bin opin big wan pantap; ich krichɔ bin gɛt tu wiŋ ɛn ich wiŋ bin de tɔch in kɔmpin yon, ɛn ich wan bin de kɔba in bɔdi wit di ɔda tu wiŋ we lɛf pan di fo wiŋ we ich wan gɛt.

¹² Ɛn ich wan bin de go tret bifo ɛnisay we di spirit wan go, dɛn de go ɛn nɔ de tɔn ɛnisay we dɛn de go.

¹³ Midul dɛn krichɔ dɛn ya we de layf layf wan, tin bin de we tan lɛk faya kol dɛn we de kech, lɛk tɔchlayt de pas pas ɔp ɛn dɔŋ bitwin dɛn krichɔ dɛn ya we gɛt layf; ɛn di faya bin brayt ɛn laytin bin de kɔmɔt pan am.

¹⁴ Ɛn dɛn krichɔ dɛn ya we de layf layf wan, bin de pas pas ɔp ɛn dɔŋ lɛk we laytin de flash.

¹⁵ As a bin luk dɛn krichɔ ya we gɛt layf, a si wan wil we de na grɔn nia di krichɔ dɛn we gɛt layf, ɛn ich krichɔ gɛt wan wil.

¹⁶ We yu si di wil dɛn ɛn aw dɛn mek dɛm, dɛn bin de shayn lɛk dayamɔn; ɛn dɛn ɔl fo wil tan di sem, ɛn bay aw dɛn mek dɛm, i tan lɛk se di wil dɛn de insay dɛn kɔmpin.

¹⁷ Wɛn dɛn de rol dɛn de go na ɛni ɔf di fo dayrɛkshɔn, dɛn nɔ tɔn rawnd at ɔl.

¹⁸ Di fo wil dɛn gɛt rim ɛn spoks; di rim dɛn gɛt bɔku yay ɔl rawnd dɛm.

¹⁹ We di krichɔ dɛn we gɛt layf de go, di wil dɛnsɛf de go wit dɛm; wɛn dɛn krichɔ ya we gɛt layf wan grap na grɔn, di wil dɛnsɛf de grap.

²⁰ Ɛnisay we di spirit go, di krichɔ dɛnsɛf de go, ɛn di wil dɛn de grap go wit dɛm; bikɔs di krichɔ dɛn we de layf, dɛn spirit bin de insay di wil dɛn.

²¹ Wɛn dɛn krichɔ ya we gɛt layf muf, di wil dɛnsɛf de muf; wɛn dɛn tinap, di wil dɛnsɛf de tinap; ɛn wɛn dɛn grap na grɔn, di wil dɛnsɛf de grap wit dɛm; bikɔs dɛn krichɔ ya we gɛt layf, dɛn spirit bin de insay di wil dɛn.

²² Oba dɛn krichɔ dɛn ya we gɛt layf dɛn ed, wan tin we tan lɛk skay ɛn de shayn lɛk dayamɔn, bin prɛd oba de,

²³ ɛn ɔnda di skay ɔl di krichɔ dɛn wiŋ bin de tret wan to dɛn kɔmpin yon, wan to in kɔmpin; ɛn ich krichɔ bin gɛt tu wiŋ we de kɔba in bɔdi.

²⁴ Ɛn wɛn dɛn bin de go, a de yɛri di sawnd we di wiŋ dɛn bin de mek, i tan lɛk di nɔys we bɔku wata kin mek; lɛk PAPA GƆD in tɛnda, lɛk di nɔys we krawd kin mek; wɛn di krichɔ dɛn tinap wamples dɛn kin put dɛn wiŋ dɛn dɔŋ.

²⁵ Nain wan vɔys kɔmɔt ɔp klawd oba dɛn ed; we dɛn tinap wanples, dɛn put dɛn wiŋ dɛn dɔŋ.

²⁶ Ɔp na di klawd oba dɛn ed, sɔntin bin de de lɛk tron we fiba dayamɔn, ɛn sɔntin we tan lɛk mɔtalman bin sidɔm na di tin we tan lɛk tron.

²⁷ Ɛn frɔm wetin luk lɛk se nain wes te go ɔp, a bin si tin we de shayn lɛk bras we dɛn pɔlish, lɛk se faya de rawnd am ɛn ɔlsay bin brayt; ɛn frɔm in wes go dɔŋ bin tan lɛk faya ɛn ɔlsay bin brayt rawnd am.

²⁸ Di braytnɛs we bin de rawnd am bin tan lɛk rembo we kin de na di klawd we ren kɔt. Na so i fiba lɛk we PAPA GƆD in glori kin apia. We a si am, a butu na grɔn, ɛn a yɛri vɔys de tɔk.