Abakɔk 3 - Krio Fɔs Oli Baybul

Abakɔk In Prea

¹ Na di pre dis we Abakɔk pre:

² “PAPA GƆD, a dɔn yɛri bɔt wetin yu dɔn du, ɛn i ful mi mɔt ɛn mek a fred. Naw, we wi de so, du wetin yu bin dɔn du lɔntɛm; naw, we wi de so, lɛ ɔlman no bɔt wetin yu kin du. We yu vɛks sɛf, sɔri fɔ wi.

³ PAPA GƆD kɔmɔt Idɔm kam bak; di wan we oli de kɔmɔt na di il dɛn na Paran fɔ kam in brayt brayt layt de shayn na ɛvin ɛn ath, ɛn dat de mek ɔlman na wɔl wan fɔ prez am.

⁴ We i de kam so, di ples de brayt lɛk na laytin de flash, di laytin de flash pan in an ɔl, bikɔs na de i ayd in pawa.

⁵ I kin mek siknɛs lid am we i de go ɛn day fala am ɛnisay we i go.

⁶ I kin tek stand fɔ luk wetin de apin na wɔl; wɛn i luk, ɔl di pipul na wɔl de trimbul. Di mawnten dɛn we bin dɔn de frɔm tɛm kin skata; dɔn di il dɛnsɛf we bin dɔn de frɔm tɛm kin jɛs lɔs, na so i bin dɔn de du lɔntɛm.

⁷ A si we di pipul dɛn we de na Kush de sɔfa dɔn di Midianayt dɛn de trimbul wit fred.

⁸ PAPA GƆD, na di watasay dɛn yu vɛks pan so? Na di sɔlwata dɛn mek yu vɛks bad bad wan so? We yu de rayd ɔp na di klawd; na briz bin de kɛr yu go we yu kin sidɔm pan di chariɔt we dɔn de mek yu win.

⁹ Yu pul di klos we kɔba yu bo, ɛn rɛdi am fɔ shut di aro dɛn. Lɛk aw di laytin de flash, na so di grɔn de plit opin.

¹⁰ We di mawnten dɛn si wetin yu du, dɛn skyad; wata kɔmɔt ɔp klawd kam dɔŋ. Di wata we de ɔnda grɔn sɛf ala, ɛn bɔs kam pantap.

¹¹ Di san ɛn di mun nɔ gri fɔ shayn igen we dɛn si aw yu aro dɛn de flay, ɛn yu spia de shayn na di laytin.

¹² Yu jɛs de go ɔp ɛn dɔŋ pas di vɛks we yu vɛks; ɛn na di vɛksteshɔn yu de put pan di neshɔn dɛn.

¹³ Na fɔ pul yu pipul dɛn pan trɔbul, na dat mek yu kɔmɔt na do, mek di kiŋ we yu bin pik nɔ de pan trɔbul. Yu nyamanyama di bad wan dɛn edman ɛn pwɛl di wan dɛn we de biɛn am kpatakpata.

¹⁴ Yu yuz yu bo ɛn aro fɔ skata di sojaman dɛn edman di tɛm we dɛn bɔs lɛk briz pan mi; de gladi se dɛn go ebul du wetin dɛn want we pɔsin nɔ go si.

¹⁵ Yu bin dɔn mek yu ɔs dɛn waka midul wata, ɛn dat lɛ di wata mek frɔsh.

¹⁶ Wɛn a yɛri bɔt ɔl wetin yu du, mi bɔdi trimbul; a fred te a bɛt mi siti mi bɔdi ɔl brok wit fred, dat mek, a nɔ sabi waka igen a de sidɔm saful wet fɔ di de we trɔbul go mit dɛn wan we de ambɔg wi.

¹⁷ If ivin fig nɔ gro pan di fig tik, ɔ greps nɔ de na di vayn tik, ɔ di ɔliv tik nɔ bia natin, ɔ ivin if ɔl di tik dɛn na di fil nɔ bia igen, ɛn ɔl di ship ɛn got dɛn rɔnawe dɔn wan animal nɔ lɛf fɔ mɛn

¹⁸ dat nɔ du fɔ mek a givɔp. A go stil gladi fɔ we a gɛt PAPA GƆD, di PAPA GƆD we de pul mi pan trɔbul ɛn a go gladi bikɔs i de.

¹⁹ Na PAPA GƆD de gi mi trɛnk. I de mek mi fut dɛn trɔŋ na grɔn lɛk aw dia yon tan we kin mek i rɔn fast dɔn i de put mi ɔp na ay ples fɔ mek natin nɔ du mi. Dis na to di kwayamasta fɔ striŋ yuz instrumɛnt dɛn lɛk ap fɔ ple am.