Abakɔk 1 - Krio Fɔs Oli Baybul

¹ Na di wɔd dis we PAPA GƆD gi to Prɔfɛt Abakɔk

Abakɔk Kɔmplen Bɔt Aw Fia Ple Nɔ De

² “PAPA GƆD, Aw lɔŋ a go de kɔmplen ɛn bifo yu go yɛri ɛn tap bad fɔ mit wi?

³ Ɔ na wes a de westɛm se trɔbul de we yu de mek se yu nɔ no? Ɔltin dɔn tɔnoba na di ples. Na soso fɛt ɛn plaba de ɔlsay.

⁴ Lɔ nɔ de igen As fɔ fia ple, nɔ fɔ tɔk. Na di bad pipul bɔku pas udat de du tin tret so fia ple nɔ de”.

Wetin PAPA GƆD Ansa Se

⁵ PAPA GƆD ansa am se, mek i jɛs luk di ɔda neshɔn dɛn ɛn si PAPA GƆD wɔnda. I se dɛn nɔn nɔ go biliv if dɛn tɛl dɛn wetin i du.

⁶ I se in go mek di Babilonian dɛn we rɔf lɛk wetin, tek ova bɔku siti dɛn we nɔto dɛn yon.

⁷ I se dɛn na bad bad pipul we ɔlman de fred. Aw dɛn nɔ gɛt kɔntrol, na so dɛn nɔ gɛt lɔ; dɛn de du wetin dɛn want.

⁸ Dɛn ɔs dɛn de rɔn pas lɛpɛt ɛn dɛn de biev lɛk aŋri wulf; dɛn man dɛn de rayd dɛn ɔs kɔmɔt fawe wit spid lɛk igul fɔ kam pwɛl wetin dɛn ebul.

⁹ Ɔlman de trimbul wit fred we dɛn si dɛn bikɔs dɛn bad ɛn dɛn kin de kech pipul dɛn plɛnti plɛnti lɛk sansan.

¹⁰ Dɛn nɔ bisin sɛf udat yu bi. Dɛn de provok di bigman dɛn ɛn trit di kiŋ dɛn bad. I lɛk aw di wɔl we de rawnd di siti ay, dɛn de brok am kam dɔŋ ɛn siz am.

¹¹ Dɛn de du wetin dɛn fil fɔ du as dɛn fil se bikɔs dɛn gɛt pawa, dɛn na PAPA GƆD.

Abakɔk Le Kɔmplen To PAPA GƆD Bak

¹² Abakɔk aks PAPA GƆD se if nɔto in na PAPA GƆD frɔm tɛm. Di PAPA GƆD we oli. I se in no se dɛn nɔ go day as na PAPA GƆD pik di Babilonian dɛn fɔ pɔnish dɛn.

¹³ I se in no se PAPA GƆD in yay tu gud fɔ de luk ɔl di bad we dɛn de du so wetin fɔ mek i de luk di Babilonian dɛn naw we dɛn de pas am pan dɛn, aftaɔl dɛn de du wetin rayt pas di Babilonian dɛn.

¹⁴ I se PAPA GƆD mek dɛn fiba fish ɔ ɛni ɔda kayn flay ɔ mut mut we nɔ gɛt bɔs fɔ sɔri fɔ dɛn.

¹⁵ We dɛn sɛn bet fɔ fish, we di bet kech di fish, nɔbɔdi nɔ de tɔk fɔ di fish. Abakɔk se na so PAPA GƆD de mek dɛn fiba bikɔs di Babilonian dɛn de gladi we dɛn de pas am pan dɛn.

¹⁶ We di Babilonian dɛn dɔn kech dɛn lɛk fish, dɛn kin mek sakrifays to dɛn nɛt dɛn, ɛn bɔn insɛns to di uk, bikɔs na di nɛt dɛn de mek dɛn liv gud, ɛn it gud it.

¹⁷ Abakɔk aks PAPA GƆD if na so i go lɛf di Babilonian dɛn fɔ de biev te go, fɔ lɛ dɛn de pas ɛn dil wit neshɔn dɛn aw dɛn fil fɔ ɛn nɔ de sɔri fɔ dɛn.