Lɛta Fɔ Galeshya 5 - Krio Fɔs Oli Baybul

Una Nɔ Put Unasɛf pan Slev Layf Igen

¹ Wi fri bikɔs Krays dɔn mek wi fri; so lɛ wi tray fɔ sho se wi na pipul we fri we Krays dɔn sev. Una nɔ put unasɛf pan slev layf igen.

² Mi, Pɔl, de tɛl una se, if una gri mek dɛn sakɔmsayz una, dat sho se Krays nɔ ebul fɔ ɛp una. Una yɛri?

³ A de wɔn una igen se, ɛnibɔdi we gri fɔ mek dɛn sakɔmsayz am, mɔs du ɔl wetin di Ju Lɔ se.

⁴ Una we fil se na wɛn una du wetin di Ju Lɔ se, nain ɔltin go rayt bitwin una ɛn Gɔd, una dɔn lɛf fɔ mek Krays rul una. Una dɔn tɔn una bak pan di gud we Gɔd want du fɔ una.

⁵ Fɔ wi yon pat, wi no se Gɔd go mek ɔltin rayt bitwin wi ɛn Gɔd. Wi abop fɔseka wetin Gɔd in Spirit bin dɔn du ɛn bikɔs wi biliv pan Krays.

⁶ Wans wi gɛt wanwɔd wit Krays, if wi sakɔmsayz ɔ wi nɔ sakɔmsayz, dat nɔ min natin. Bɔt di tin we gud pas ɔl nain dis: pipul fɔ no se wi biliv pan Krays bay aw wi lɛk wi kɔmpin mɔtalman.

⁷ Una bin de du wɛl we una bin de biliv pan Krays mɔ ɛn mɔ; udat mek una lɛf fɔ du dɛn tru tin we Gɔd tɛl una fɔ du? Wetin di pɔsin du fɔ chenj una at?

⁸ Gɔd we kɔl una kam to insɛf nɔ bin chenj una at.

⁹ Pipul kin pul wan parebul we se, “Na lili yist nɔmɔ pɔsin de tek mek big bred.”

¹⁰ Bikɔs wi gɛt wanwɔd wit Krays, a biliv se una nɔ go tek wetin ɔda pipul de tɛl una, pas wetin a dɔn tɛl una, ɛn Gɔd go jɔj di pɔsin we de ambɔg una, ilɛk udat i bi.

¹¹ Mi Kristiɛn pipul dɛn, una luk mi yon trɔbul, if a de tɛl pipul fɔ sakɔmsayz, wetindu dɛn stil de mek a sɔfa? If na so a de du, pipul nɔ fɔ vɛks wɛn a tɛl dɛn bɔt di day we Krays day na di krɔs.

¹² A de abop se di pipul dɛn we de mek una at wam go kɔmɔt biɛn una, ɛn lɛf una to unasɛf.

¹³ Mi kɔmpin Kristiɛn dɛn, Krays dɔn kɔl una fɔ mek una fri. Una tek tɛm mek una nɔ bigin du wetin una at tɛl una fɔ du, bikɔs una dɔn fri naw. Bifo dat, una fɔ de ɛp una kɔmpin bikɔs una lɛk dɛn.

¹⁴ Ɔl di Ju Lɔ tay insay wan lɔ we se: “Pɔsin fɔ lɛk in kɔmpin mɔtalman lɛkɛ aw i lɛk insɛf.”

¹⁵ If una de lɛkɛ dɛn bif na bush we de fɛt ɛn wund dɛn kɔmpin, wɛl, una tek tɛm, if nɔ so, una go pwɛl una Kristiɛn grup ɔltogɛda.

Una fɔ Du Wetin Gɔd In Spirit Tɛl Una fɔ Du

¹⁶ A de tray fɔ tɛl una se: una fɔ du wetin Gɔd in Spirit tɛl una fɔ du, nɔto wetin una at tɛl una fɔ du.

¹⁷ Wetin mɔtalman want, nɔto wetin Gɔd in Spirit want. Wetin Gɔd in Spirit want, nɔto wetin mɔtalman want. Wetin mɔtalman want ɛn wetin Gɔd in Spirit want na tu difrɛn tin, so una nɔ go du wetin una want fɔ du.

¹⁸ If una du wetin Gɔd in Spirit tɛl una, dat sho se di Ju Lɔ nɔ de rul una.

¹⁹ I nɔ at fɔ si wetin mɔtalman lɛk fɔ du: mɔtalman lɛk fɔ liv fri ɛn bad layf,

²⁰ mɔtalman lɛk fɔ pre to dɛn tin we pipul de mek fɔ pre to, ɛn dɛn lɛk fɔ swɛ dɛn kɔmpin. Mɔtalman nɔ lɛk dɛn kɔmpin, ɛn dɛn de fɛt dɛn kɔmpin; dɛn de jɛlɔs dɛn kɔmpin, dɛn de vɛks pan dɛn kɔmpin, ɛn dɛn de put dɛnsɛf bifo dɛn kɔmpin mɔtalman. Dɛn lɛk fɔ de bay grup ɛn dɛn nɔ de si wit dɛn kɔmpin;

²¹ dɛn nɔ want mek bɛtɛ fala dɛn kɔmpin, dɛn de drɔnk, ɛn dɛn de mek dɛn wayl pati, ɛn dɛn de du plɛnti ɔda bad tin dɛn lɛkɛ dɛn wan ya. A de wɔn una lɛkɛ aw a bin dɔn wɔn una fɔs se: dɛn pipul we de pan dis kayn layf nɔ go de ɔnda Gɔd in rul.

²² Bɔt Gɔd in Spirit go mek pipul lɛk dɛn kɔmpin, i go mek dɛn gladi, i go mek dɛn nɔ de mek plaba, i go mek dɛn ebul bia trɔbul, ɛn i go mek dɛn de ɛp dɛn kɔmpin mɔtalman, i go mek dɛn de du gud to ɔda pipul, i go mek dɛn tru to dɛn kɔmpin,

²³ i go mek pipul put dɛn yay dɔŋ ɛn i go mek dɛn nɔ jɛs de du wetin dɛn at gi dɛn fɔ du. Nɔ lɔ nɔ de we tɔk bɔt dɛn tin ya.

²⁴ Ɛn dɛn pipul we na Krays Jizɔs yon nɔ de du dɛn bad tin we dɛn at gi dɛn fɔ du. Ɔlman gɛt dɛn kayn bad tin dɛn ya na dɛn at ɛn dɛn lɛk fɔ du dɛn.

²⁵ Gɔd in Spirit dɔn gi wi layf ɛn i fɔ rul wi layf.

²⁶ Wi nɔ fɔ tɔk big tɔk, wi nɔ fɔ mek ɔda pipul vɛks ɛn wi nɔ fɔ jɛlɔs ɔda pipul.