Ɛzra 9 - Krio Fɔs Oli Baybul

Ɛzra Yɛri Se Di Ju Dɛn Mared Fɔrina

¹ We wi dɔn du ɔltin dɔn, di Ju lida dɛn kam to mi kam tɛl mi se di Izrɛlayt dɛn, ɛn ivin di man dɛn we de mek sakrifays fɔ pipul sin wit di Livayt dɛn nɔ de kip to dɛnsɛf. Dɛn se dɛn de miks wit di ɔda pipul dɛn we tap na di siti. Dɛn dɔn kɔpi di bad abit we di Kenanayt dɛn, di Itayt dɛn, di Pɛrizayt dɛn, di Jɛbyusayt dɛn, di Amonayt dɛn, di Moabayt dɛn, di Ijipshian dɛn ɛn di Amɔrayt dɛn gɛt.

² Dɛn se di Ju pipul dɛn de mared dɛn fɔrina ya dɛn gyal pikin dɛn, ɛn sɛf dɛn de mek dɛn bɔypikin dɛnsɛf mared di fɔrina dɛn gyal pikin dɛn. Dɛn we se dɛn gɔdli ɛn oli na dɛn dɔn miksɔp ɛn dɔti dɛnsɛf wit dɛn kaynaba tin ya. Infakt fɔ mek tin wɔs na di lida dɛn ɛn di bigman dɛn de bifo pan dis kaynaba dɔti gem.

³ We a yɛri dis kayn tin, a chɛr chɛr mi klos na mi bɔdi ɛn drɔ mi ia na mi ed ɛn mi biabia wit shem ɛn pwɛl at.

⁴ Usay a yɛri di wɔd na de a sidɔm wit pwɛl at te ivintɛm rich fɔ mek sakrifays. Ɔl dɛn wan dɛn we fred PAPA GƆD ɛn wetin I se kam gɛda rawnd mi bikɔs ɔf wetin di pipul dɛn we kam bak bin de du.

⁵ We di tɛm rich fɔ mek di ivintɛm sakrifays, a grap na di say we a bin sidɔm wit pwɛl at ɛn mi chɛr chɛr klos, nildɔŋ na grɔn, es mi an ɔp ɛn pre to PAPA GƆD.

⁶ A pre se, “E mi GƆD, a de shem pan yu. A nɔ fit fɔ luk ɔp usay yu de bikɔs wi sin bɔku. I ay pas wi ed te rich ɔp usay yu de.

⁷ Frɔm di tɛm we wi grampa dɛn de na wɔl te tide, wi we se wi na yu pipul dɛn jɛs de du bad nɔmɔ. Ɛn bikɔs ɔf wi sin, wi o, wi kiŋ dɛn o, ɛn wi man dɛn we de mek sakrifays fɔ pipul sin dɛn fɔdɔm na dɛn pegan kiŋ dɛn trap. Dɛn kil wi, dɛn tif wi, dɛn kapchɔ wi, ɛn kɛr wi go trit wi lɛkɛ jelman. Dɛn disgres wi ɛn na da disgres de de pan wi te tide.

⁸ Fɔ dis shɔt tɛm nɔmɔ PAPA GƆD, yu dɔn sho wi se yu gud we yu mek sɔm pan wi kɔmɔt pan da slev layf de kam na ya na dis oli ples usay wan kɔt at nɔ de. Yu dɔn mek wi stat wi layf bak igen

⁹ We wi na bin slev, yu nɔ bin fɔgɛt wi da tɛm de. Yu mek di kiŋ dɛn na Pashia trit wi fayn. Yu gi wi nyu zil fɔ bil yu os ɛn fɔ mek ɔl wetin bin dɔn pwɛl bak. Yu gi wi wɔl rawnd Juda ɛn Jerusɛlɛm fɔ protɛkt wi.

¹⁰ PAPA GƆD, wetin wi go tɔk naw afta we ɔl dɛn tin yaso dɔn bi to wi? Wi dɔn brok di Lɔ dɛn.

¹¹ Dɛn prɔfɛt dɛn we na bin yu savant dɛn bin de wɔn wi trade se, yu se, di land we wi de go fɔ go tek fɔ bi wi yon, ful wit soso kɔrɔpshɔn: di pipul dɛn we de de, de du ɔlkayn bad tin we nɔ fit fɔ lɛ mɔtalman si ɔ yɛri. Ɔlɔbɔt di wanol ples, na soso wikɛdnɛs ɛn bad tin de apin de. Dɛn dɔn nasti di ples.

¹² So, wi nɔ fɔ mek dɛn mared wi gyal pikin dɛn, ɛn wisɛf yon bɔypikin dɛn nɔ fɔ mared dɛn yon gyal pikin dɛn; ɛn wi nɔ fɔ ɛp dɛn pan natin. Dɛn se yu bin dɔn prɔmis se if wi avɔyd dɛn pipul ya ɛn du wetin yu se, bɛtɛ go fala wi ɛn wi go ɛnjɔy di gud tin dɛn we de kɔmɔt na di land. Dɛn se, yu se, wi pikin dɛnsɛf go lɛf biɛn de ɛnjɔy.

¹³ Naw wi de sɔfa bikɔs ɔf wi wikɛdnɛs ɛn wi dɔn sin. Di pɔnishmɛnt we wi de gɛt smɔl pas di bad we wi dɔn du, bɔt pan ɔl dat PAPA GƆD, yu mek we fɔ sɔm pan wi fɔ tɔn bak.

¹⁴ Yu nɔ want lɛ wi tɔn bak go brok yu lɔ igen ɛn mared dɛn pipul ya we de du ɔlkayn bad tin ɛn. Yu go vɛks pan wi if wi du dat ɛn dɔnawe wit wi we nɔn pan wi nɔ go lɛf.

¹⁵ E PAPA GƆD, Izrɛl dɛn GƆD, yu raychɔs! Wi ɔl de bifo yu naw gilti gilti wan, ɛn if nɔto fɔ yu masi, nɔn pan wi nɔ fit fɔ tinap bifo yu.”