Ɛzra 7 - Krio Fɔs Oli Baybul

Ɛzra Rich Na Jerusɛlɛm

¹ Naw, lɔŋ afta ɔl dɛn tin ya dɔn pas, di tɛm we Atazaksis na bin Kiŋ na Pashia, wan man bin de we nem Ɛzra. I tres in jɛnareshɔn dɛn go bak to Erɔn, di bigman we de mek sakrifays fɔ pipul sin. Na Sɛraya bɔn Ɛzra, dɔn Azaraya in bɔn Sɛraya, dɔn Ilkaya bɔn Azaraya,

² Shalum bɔn Ilkaya, Zedɔk bɔn Shalum, Aitɔb bɔn Zedɔk,

³ Amaraya bɔn Aitɔb, Azaraya bɔn Amaraya, Mɛrayɔth bɔn Azaraya,

⁴ Zɛraaya bɔn Mɛrayɔth, Uzi bɔn Zɛraaya, Buki bɔn Uzi,

⁵ Abishua bɔn Buki, Finɛas bɔn Abishua, Ɛliaza bɔn Finɛas, dɔn Erɔn in bɔn Ɛliaza. Erɔn na bin di edman fɔ dɛn man dɛn we de mek sakrifays fɔ pipul sin.

⁶ Dis Ɛzra na bin gud bukman. I sabi Mozis in lɔ gud gud wan, dat na di lɔ we PAPA GƆD, Izrɛl dɛn GƆD bin gi di Izrɛlayt dɛn. Ɛzra kɔmɔt Babilɔn go Jerusɛlɛm. Bikɔs PAPA GƆD bin de wit Ɛzra, ɛnitin we i tɛl di kiŋ fɔ du nain i kin du.

⁷ Sɔm pan di Izrɛlayt dɛn bin fala Ɛzra go Jerusɛlɛm, ɛn dɛn pipul ya na bin dɛn man we de mek sakrifays fɔ pipul sin dɛn, di kwaya, getman dɛn na PAPA GƆD in os ɛn ɔda wokman dɛn. Ɔl dɛn pipul yaso lɛf Babilɔn fɔ go Jerusɛlɛm wit Ɛzra di ia we mek Kiŋ Atazaksis sɛvin ia we i bin dɔn de rul as Kiŋ.

⁸ Ɛzra rich na Jerusɛlɛm di mɔnt we mek fayv da sem ia de.

⁹ I lɛf Babilɔn di fɔs de insay di fɔs mɔnt ɛn rich Jerusɛlɛm di fɔs de na di mɔnt we mek fayv, ɛn PAPA GƆD bin de wit am.

¹⁰ Ɛzra bin de sɔksid bikɔs i bin mekɔp in maynd fɔ stɔdi PAPA GƆD in lɔ ɛn go bay wetin i se; i bin de tich di lɔ dɛn ɛn wetin dɛn min to di Izrɛlayt dɛn.

Kiŋ Atazaksis Gi Lɛta To Ɛzra

¹¹ Dis na di lɛta we Kiŋ Atazaksis gi Ɛzra, da man we de mek sakrifays fɔ pipul sin ɛn bukman, man we sabi wetin di lɔ ɛn kɔmand we PAPA GƆD gi Izrɛl se:

¹² “Frɔm Kiŋ Atazaksis, di kiŋ fɔ dɛn ɔda kiŋ dɛn. To Ɛzra di man we de mek sakrifays fɔ pipul sin, ticha fɔ di GƆD na ɛvin in Lɔ. A de tɛl yu adu.

¹³ A de gi ɔda naw se ɔl di Izrɛlayt dɛn na mi kindɔm, ɛn dɛn man we de mek sakrifays fɔ pipul sin ɛn Livayt dɛn, we want fɔ go Jerusɛlɛm wit yu, kin go.

¹⁴ Mi ɛn mi sɛvin advaysa gi yu ɔda fɔ fɛnɔt aw tiŋs de kɛri ɔn na Jerusɛlɛm ɛn Juda, ɛn aw di pipul dɛn de obe yu GƆD in lɔ we i gi yu.

¹⁵ Yu fɔ kɛr di gold ɛn di silva we di kiŋ ɛn in advaysa dɛn gi fri wan to Izrɛl dɛn GƆD we de na Jerusɛlɛm.

¹⁶ Dɛn igen yu fɔ kɛr ɛni silva ɛn gold we yu kɔlɛkt na di Izrɛlayt dɛn an na Babilɔn wit di tiŋs dɛn we di pipul ɛn di man dɛn we de mek sakrifays fɔ pipul sin dɛn gi fri wan fɔ dɛn GƆD in os na Jerusɛlɛm.

¹⁷ Yu fɔ yuz dis mɔni fɔ bay man kaw, man ship, yɔŋ man ship, it ɛn wayn ɛn tek dɛn mek sakrifays to PAPA GƆD na di ɔlta na una GƆD in os na Jerusɛlɛm.

¹⁸ Yu ɛn yu brɔda Ju man brɔda dɛn kin du ɛnitin we una fil fɔ du wit di balans silva ɛn gold, lɛkɛ aw una GƆD se nɔmɔ fɔ du.

¹⁹ Di tiŋs dɛn we wi gi yu we fɔ de na PAPA GƆD in os, mɔs gi ɔl to una GƆD nain os na Jerusɛlɛm.

²⁰ Ɛn ɛnitin we yu go want fɔ yu PAPA GƆD in os we yu nɔ gɛt, go na di gɔvmɛnt in amawnt go tek mɔni de.

²¹ Mi, Kiŋ Atazaksis de gi ɔda to ɔl di trɛzhɔra dɛn na di wɛst pat na Riva Yufretis fɔ sɔplay ɛnitin we Ɛzra di man we de mek sakrifays fɔ pipul sin ɛn bukman, we no PAPA GƆD na ɛvin in Lɔ, want witawt dile.

²² Una fɔ gi am ɔp to sɛvin tawzin, fayv ɔndrɛd pawns silva, fayv ɔndrɛd bushɛl wit, fayv ɔndrɛd ɛn fifti galɔn wayn, fayv ɔndrɛd ɛn fifti galɔn ɔliv ɔyl ɛn ɔmɔs sɔl nɔmɔ i want.

²³ Una mek shɔ se una provayd ɛnitin we di GƆD na ɛvin want fɔ in os, bikɔs nɔn rizin nɔ de fɔ mek PAPA GƆD vɛks pan di kiŋ we de rul ɛn in bɔypikin dɛn.

²⁴ A de gi ɔda bak se, nɔn man we de mek sakrifays fɔ pipul sin, dɛn Livayt, dɛn wan we de siŋ, dɛn os getman na PAPA GƆD in os ɔ ɛni ɔda wokman na PAPA GƆD in os nɔ fɔ pe taks.

²⁵ Ɛn yusɛf Ɛzra fɔ yuz di sɛns we PAPA GƆD gi yu fɔ pik magistret ɛn jɔj dɛn; man dɛn we sabi PAPA GƆD in lɔ fɔ de jɔj kes ɛn rul di pipul dɛn na di wɛst pat na Riva Yufretis. If ɛnibɔdi de we nɔ sabi di lɔ yu fɔ tich am.

²⁶ Ɛnibɔdi we nɔ gri fɔ obe yu PAPA GƆD in lɔ ɛn di kiŋ in lɔ fɔ day, ɔ dɛn fɔ ban am lɛ in nɔ tap na di kɔntri, ɔ dɛn siz ɔl in prɔpati ɔ dɛn jel am.”

Ɛzra Prez PAPA GƆD

²⁷ Ɛzra prez PAPA GƆD. I se, “Prez PAPA GƆD, wi papa dɛn GƆD we mek di kiŋ mek PAPA GƆD in os na Jerusɛlɛm luk fayn!

²⁸ A de prez PAPA GƆD fɔ we i mek di kiŋ lɛk mi, ɛn ɔl di kiŋ in advaysa dɛn ɛn in pawaful wokman dɛnsɛf lɛk mi. PAPA GƆD, mi GƆD gi mi kɔrej bikɔs i de wit mi. I mek a ebul fɔ gɛda sɔm pan di bigman dɛn na Izrɛl ɛn koks dɛn mek dɛn fala mi go Jerusɛlɛm.”