Ɛzra 6 - Krio Fɔs Oli Baybul

Di Pipul Dɛn Fɛnɔt bɔt Kiŋ Sayrɔs In Ɔda

¹ Kiŋ Dariɔs gi ɔda fɔ mek dɛn luk na di say we dɛn de kip dɛn istri buk dɛn ɛn dɛn impɔtant tin dɛn na Babilɔn.

² Na Ɛkbatana we de na di Mɛdia Prɔvins na de dɛn go fɛn wan skrol we dɛn bin rayt pan, we se: Mɛmorandɔm:

³ “Di fɔs ia we Kiŋ Sayrɔs bigin fɔ rul as Kiŋ, i mek wan lɔ we tɔk bɔt PAPA GƆD in os na Jerusɛlɛm. I se lɛ dɛn bil PAPA GƆD in os bak fɔ lɛ pipul dɛn go de ɔfa dɛn sakrifays de, ɛn lɛ dɛn bil am na di say we PAPA GƆD in os bin de fɔs. I fɔ bi naynti fut ay, naynti fut wayd.

⁴ Fɔ ɛvri tri blɔk we dɛn put fɔ mek di wɔl, dɛn fɔ put wan bod pantap de, ɛn na di gɔvmɛnt mɔni dɛn fɔ yuz fɔ du dis.

⁵ Ɔl di gold ɛn silva tiŋs dɛn we Kiŋ Nɛbyukadnɛza bin pul kɔmɔt na PAPA GƆD in os na Jerusɛlɛm ɛn briŋ kam na Babilɔn, fɔ go bak na Jerusɛlɛm na PAPA GƆD in os.”

Kiŋ Dariɔs Gi Ɔda Fɔ Lɛ Di Wok Kɔntinyu

⁶ “Tatɛnay, yu we na, gɔvna fɔ di wɛst pat na Riva Yufretis, ɛn Shɛta-bozɛnay ɛn di ɔda ɔfisa dɛn na Riva Yufretis eria. Una nɔ fɔ ambɔg di wok.

⁷ Una nɔ intafia pan di wok we dɛn de du na PAPA GƆD in os. Lɛ di Ju gɔvna ɛn dɛn lida dɛn bil PAPA GƆD in os bak usay i bin de fɔs.

⁸ Wit ɔl dis, a de tɛl una wetin una fɔ du fɔ di Ju bigman we dɛn de bil PAPA GƆD in os. Ɔl di mɔni fɔ di wok we dɛn de du fɔ kɔmɔt pan di taks mɔni we dɛn de kɔlɛkt na di wɛst pat na Riva Yufretis so di wok nɔ go stɔp.

⁹ Ɛvri de una fɔ gi di man dɛn we de mek sakrifays fɔ pipul sin na Jerusɛlɛm wetin dɛn aks fɔ lɛkɛ yɔŋ man kaw, man ship ɔ dɛn yɔŋ ship fɔ bɔn as sakrifays to PAPA GƆD na ɛvin; wit, sɔl, wayn ɛn ɔyl fɔ lɛ in at go de kol.

¹⁰ Ɔl dis na fɔ lɛ dɛn go mek sakrifays to di GƆD na ɛvin we go mek i gladi ɛn dɛn go pre fɔ mi ɛn mi bɔypikin dɛn to di GƆD na ɛvin.

¹¹ Dɛn igen a de tɛl una se if ɛnibɔdi chenj wetin a dɔn se so, dɛn fɔ pul wan bod kɔmɔt pan in os, shap am lɛkɛ nɛf ɛn chuk chuk in bɔdi wit am. Dɔn dɛn fɔ brok in os.

¹² Mek PAPA GƆD we dɔn pik Jerusɛlɛm fɔ bi di ples we dɛn fɔ de kɔl in nem ovatro ɛni kiŋ ɔ kɔntri we go chenj dis lɔ ɔ pwɛl PAPA GƆD in os na Jerusɛlɛm. Na mi Dariɔs de sayn mi nem ɛn ɔlman fɔ mek shɔ se i go bay am.”

Di Pipul Dɛn Dɛdiket Di os

¹³ Gɔvna Tatɛnay, gɔvna fɔ di wɛst pat na Riva Yufretis, ɛn Shɛta-bozɛnay wit di ɔda ɔfisa dɛn du wetin Kiŋ Dariɔs se.

¹⁴ Di Ju bigman dɛn kɔntinyu fɔ du di wok lɛkɛ aw prɔfɛt Agay ɛn prɔfɛt Zɛkaraya, Ido in bɔypikin dɛn advays dɛn. Dɛn bil PAPA GƆD in os dɔn jɛs lɛkɛ aw Izrɛl dɛn PAPA GƆD bin se fɔ bil am ɛn aw Kiŋ Sayrɔs, Kiŋ Dariɔs ɛn Kiŋ Atazaksis, di kiŋ dɛn na Pashia bin se.

¹⁵ Dɛn bil PAPA GƆD in os dɔn di tɔd de insay Ada mɔnt, di tɛm we Kiŋ Dariɔs bin dɔn bi Kiŋ fɔ siks ia.

¹⁶ Dɔn di Izrɛlayt dɛn, di man we de mek sakrifays fɔ pipul sin dɛn, di Livayt dɛn, ɛn ɔl di ɔda pipul dɛn we bin dɔn tɔn bak we kɔmɔt na Babilɔn dɛdiket PAPA GƆD in os, ɛn na so dɛn bin gladi.

¹⁷ Fɔ di dɛdikeshɔn sɛrimɔni, dɛn kil wan ɔndrɛd man kaw, tu ɔndrɛd man ship ɛn fo ɔndrɛd yɔŋ man ship. Dɔn dɛn kil twɛlv man got fɔ mek sakrifays fɔ dɛn sin, wan got fɔ ich fambul na Izrɛl.

¹⁸ Dɔn dɛn put di man dɛn we de mek sakrifays fɔ pipul sin ɛn di Livayt dɛn na difrɛn difrɛn grup ɛn tɛl dɛn ustɛm fɔ du dɛn wok na PAPA GƆD in os na Jerusɛlɛm. Dɛn du ɔl dɛn tin ya lɛkɛ to wetin rayt insay Mozis in buk.

Dɛn Sɛlibret Pasova Fɛstival

¹⁹ Di pipul dɛn sɛlibret pasova di de we mek fotin na di fɔs mɔnt di ɔda ia.

²⁰ Da tɛm de di man dɛn we de mek sakrifays fɔ pipul sin ɛn di Livayt dɛn bin dɔn pyurifay dɛnsɛf, dɛn ɔl bin klin bay wetin di lɔ se. Na di Livayt dɛn kil di ship fɔ di pasova fɔ ɔl dɛn wan we kɔmɔt Babilɔn kam bak, dɛn brɔda dɛn we na man dɛn we de mek sakrifays fɔ pipul sin ɛn fɔ dɛnsɛf.

²¹ Di wan dɛn we it pan di pasova sakrifays na di Izrɛlayt dɛn we tɔn bak ɛn di ɔda wan dɛn we bin dɔn de na di siti we bin dɔn chenj dɛn atityud, ɛn we bin want fɔ wɔship PAPA GƆD, Izrɛl dɛn GƆD.

²² Di pipul dɛn bin sɛlibret di pasova fɛstival fɔ sɛvin de ɛn it bred we nɔ gɛt yist. Di wanol siti bin mek big big sɛlibreshɔn bikɔs PAPA GƆD chenj di Kiŋ na Asiria in atityud ɛn mek i ɛp dɛn pan di wok na PAPA GƆD, Izrɛl dɛn GƆD in os.