Ɛzra 5 - Krio Fɔs Oli Baybul

¹ Di tɛm we Prɔfɛt Agay ɛn prɔfɛt Zɛkaraya we na Ido in bɔypikin bigin fɔ prɔfisay to di Ju pipul dɛn na Juda ɛn Jɛrusɛlɛm insay PAPA GƆD in nem;

² Zɛrubabɛl, dat na Shialtiɛl in bɔypikin ɛn Jɛshwa, dat na Jozadak in yon bɔypikin, bin lisin to wetin di prɔfɛt dɛn bin de se, so dɛn bigin fɔ bil PAPA GƆD in os bak na Jerusɛlɛm. PAPA GƆD in prɔfɛt dɛn bin de wit dɛn fɔ de ɛp dɛn.

³ Da tɛm de, Gɔvna Tatɛnay we na gɔvna fɔ di wɛst pat na Riva Yufretis ɛn Shɛta-bozɛnay ɛn di ɔda ɔfisa dɛn rich na Jɛrusɛlɛm ɛn aks udat gi dɛn pamishɔn fɔ bil PAPA GƆD in os,

⁴ ɛn udat na di bilda dɛn.

⁵ Bɔt bikɔs PAPA GƆD in yay bin de oba dɛn, dat nɔ bin tap di Ju lida dɛn fɔ kɛri ɔn wit di wok na PAPA GƆD in os. So di pipul dɛn go ripɔt to Kiŋ Dariɔs, ɛn Dariɔs insɛf sɛn in riplay.

⁶ Dis na di lɛta we Gɔvna Tatɛnay, Shɛta-bozɛnay ɛn di ɔda ɔfisa dɛn na di wɛst pat na Riva Yufretis rayt to Kiŋ Dariɔs:

⁷ “Kiŋ Dariɔs, wi de tɛl yu adu sa.

⁸ “Wi de ripɔt to yu se we wi go na Juda, wi mit di pipul dɛn de bil di Gret PAPA GƆD in os wit big big ston dɛn ɛn na timba dɛn dɛn bin de put insay di wɔl. Dis wok yaso sa, de go ɔn fast ɛn di pipul dɛn de du am wit ɔl dɛn trɛnk ɛn sabi.

⁹ We wi aks di bigman dɛn udat gi dɛn pamishɔn fɔ bil PAPA GƆD in os,

¹⁰ ɛn lɛ dɛn tɛl wi udat na di pipul dɛn we de du di wok fɔ lɛ wi go tɛl yu sa.

¹¹ Dɛn tɛl wi se, dɛn na di wokman dɛn fɔ di GƆD fɔ ɛvin ɛn ath, ɛn dɛn de bil PAPA GƆD in os we bin de trade. Dɛn se, na wan pawaful Kiŋ na Izrɛl bin bil am da tɛm de.

¹² Bɔt bikɔs dɛn fɔstɛm-papa dɛn bin ambɔg di GƆD fɔ ɛvin, i sɛl dɛn gi Kiŋ Nɛbyukadnɛza, di kiŋ in advaysa dɛn na Babilɔn. I bin brok PAPA GƆD in os ɛn kɛr di pipul dɛn go na Babilɔn.

¹³ Dɛn se di fɔs ia we Sayrɔs bi Kiŋ na Babilɔn, Kiŋ Sayrɔs gi ɔda fɔ lɛ dɛn bil PAPA GƆD in os bak.

¹⁴ Kiŋ Sayrɔs bin tek ɔl di gold ɛn silva tiŋs dɛn we bin de na Kiŋ Nɛbyukadnɛza in os na Babilɔn, kɛr dɛn go bak na PAPA GƆD in os na Jerusɛlɛm, bikɔs na de Kiŋ Nɛbyukadnɛza bin pul dɛn. Kiŋ Sayrɔs an ova ɔl dɛn tiŋs yaso to Shɛshbaza fɔ kip, dat na di man we i mek gɔvna na Juda.

¹⁵ Di Kiŋ gi am ɔda se i fɔ mek shɔ se i kɛr ɔl di tiŋs dɛn na PAPA GƆD in os na Jerusɛlɛm go bak ɛn mek shɔ se dɛn bil PAPA GƆD in os nain rayt ples.

¹⁶ So Shɛshbaza insɛf go Jerusɛlɛm ɛn le di fawndeshɔn fɔ PAPA GƆD in os. Frɔm di tɛm we di pipul dɛn bigin di wok te di tɛm we dɛn de gi wi ansa, di wok nɔ dɔn yet.

¹⁷ So if i want sa, lɛ i gi ɔda mek dɛn luk na Babilɔn na di say we dɛn de kip dɛn istri buk bɔt dɛn kiŋ ɛn dɛn wok, fɔ fɛnɔt wɛda Kiŋ Sayrɔs bin ɛva pas lɔ se dɛn fɔ bil PAPA GƆD in os bak na Jerusɛlɛm. Afta dat tɛl wi wetin yu mekɔp fɔ du.