Ɛzra 3 - Krio Fɔs Oli Baybul

Di Pipul Dɛn Bigin Wɔship PAPA GƆD Bak

¹ Insay di mɔnt we mek sɛvin na di ia, ɔl di Izrɛlayt dɛn bin dɔn sɛtul dɔŋ. Dɛn ɔl go gɛda lɛkɛ wan pɔsin na Jerusɛlɛm.

² Nain Jozadak in bɔypikin Jɛshwa wit in kɔmpin man dɛn we de mek sakrifays ɛn Shialtiɛl in bɔypikin Zɛrubabɛl ɛn in famili bigin fɔ bil Izrɛl dɛn PAPA GƆD in ɔlta fɔ lɛ dɛn go de bɔn animal as sakrifays to PAPA GƆD de, jɛs lɛkɛ aw di lɔ we PAPA GƆD gi Mozis bin se.

³ Ivin we di Izrɛlayt dɛn bin de fred di ɔda pipul dɛn we bin dɔn de na di eria, dat nɔ tap dɛn fɔ bil di ɔlta na di say we i bin de fɔs. As dɛn bil di ɔlta dɔn so, dɛn bigin fɔ mek dɛn sakrifays to PAPA GƆD mɔnin ɛn ivin.

⁴ Dɔn dɛn bigin fɔ sɛlibret di ‘Tabanakul Fɛstival’ Dɛn bin gɛt di nɔmba ɔf animal we dɛn bin de bɔn ɛvri de fɔ sakrifays bay wetin di lɔ we PAPA GƆD gi Mozis se. Dɛn fɔ du dis ɛvri de te di fɛstival dɔn.

⁵ Dɔn igen dɛn mek di yuzhwal sakrifays we dɛn kin mek, dat na fɔ bɔn animal as sakrifays na faya ɛn di nyu mun fɛstival in yon sakrifays. Bak igen dɛn bin mek di ɔda sakrifays dɛn we dɛn bin de du ɛvri ia. Tɛm kin de we dɛn kin jɛs gi sakrifays to PAPA GƆD ɛnitɛm we dɛn fil fɔ.

⁶ Di pipul dɛn bigin mek sakrifays to PAPA GƆD di fɔs de insay di sɛvin mɔnt na di ia, ivin we dɛn nɔ bin bigin le PAPA GƆD in os in fawndeshɔn yet.

Di Pipul Dɛn Bigin Fɔ Bil PAPA GƆD In Os

⁷ Di pipul dɛn aya mesna ɛn kapinta dɛn fɔ bil PAPA GƆD in os; ɛn dɛn pe di pipul dɛn we kɔmɔt Taya ɛn Saydɔn wit it, wayn ɛn ɔliv ɔyl fɔ kɔt sida timba na Libanɔn. Dɛn travul wit di timba we dɛn kɔt na di si te rich Jopa, ɛn na Kiŋ Sayrɔs na Pashia bin gi dɛn di ɔda fɔ du dat.

⁸ Dɛn bigin fɔ bil PAPA GƆD in os tu ia afta we dɛn bin dɔn tɔn bak na Jerusɛlɛm, ɛn nainsay di sɛkɛn mɔnt dɛn bigin fɔ bil am. Na Zɛrubabɛl, Shialtiɛl in bɔypikin, ɛn Jɛshwa, Jozadak in bɔypikin wit dɛn brɔda dɛn bigin fɔ bil PAPA GƆD in os. Di man we de mek sakrifays fɔ pipul sin ɛn di Livayt dɛnsɛf, ɛn ɔl dɛn wan we dɛn bin kapchɔ we tɔn bak na Jerusɛlɛm, dɛn ɔl put an fɔ bil PAPA GƆD in os. Dɛn mek ɔl dɛn Livayt we bin dɔn ol twɛnti ia ɛn dɛn wan we pas da ej de fɔ bi fɔman.

⁹ Jɛshwa wit in bɔypikin dɛn ɛn in fambul dɛn; Kadmiɛl ɛn insɛf yon bɔypikin dɛn ɛn in fambul dɛn ɔl bin de supavays fɔ bil PAPA GƆD in os. Ɔl dɛn pipul yaso na Odavaya in jɛnareshɔn dɛn. Ɛnadad insɛf ɛn in yon fambul dɛn we na Livayt bin jɔyn an fɔ supavays di wok.

¹⁰ We di bilda dɛn dɔn le PAPA GƆD in os in fawndeshɔn dɔn, di man dɛn we de mek sakrifays fɔ pipul sin dɛn wɛr dɛn rob ɛn tek dɛn pozishɔn fɔ blo dɛn trɔmpɛt. Dɔn di Livayt dɛn, dat na Esaf in jɛnareshɔn dɛn tek dɛn simbɔl. Dɛn ɔl ple myuzik fɔ prez PAPA GƆD fɔ dis sɛrimɔni lɛkɛ aw Kiŋ Devid bin se fɔ de du.

¹¹ Dɛn prez PAPA GƆD ɛn tɛl am tɛnki wit dis siŋ yaso: “PAPA GƆD gud, in lɔv fɔ Izrɛl go las sote go!” Ɔl di pipul dɛn ala lawd wande prez PAPA GƆD bikɔs na dɛn dɔn le di fawndeshɔn fɔ bil PAPA GƆD in os.

¹² Bɔt bɔku pan dɛn man we de mek sakrifays fɔ pipul sin we na olpa, ɛn dɛn Livayt dɛnsɛf we na opla, wit dɛn bigman dɛn we bin dɔn si di fɔs os bɔs big big kray we dɛn si dɛn le fawndeshɔn bak, bɔt di ɔda pipul dɛn bin gladi ɛn na so dɛn bin de ala.

¹³ Di nɔys bin so plɛnti dat pipul dɛn nɔ bin ebul fɔ tɛl udat de kray frɔm udat gladi. Dɛn wan dɛn we bin de fawe sɛf yɛri di nɔys.