Ɛzra 1 - Krio Fɔs Oli Baybul

Kiŋ Sayrɔs Kɔmand Di Ju Dɛn Fɔ Go Bak Na Dɛn Kɔntri

¹ Di fɔs ia we Kiŋ Sayrɔs bi kiŋ na Pashia, fɔ lɛ wetin PAPA GƆD bin mek Prɔfɛt Jɛrimaya bin tɔk bi, PAPA GƆD mek Kiŋ Sayrɔs mek lɔ, ɛn mek dɛn rayt am dɔŋ na pepa sɛn am go ɔlɔbɔt nain kindɔm.

² “Dis na wetin Kiŋ Sayrɔs na Pashia tɔk: ‘PAPA GƆD we na GƆD na ɛvin dɔn gi mi ɔl di kindɔm dɛn na di wɔl fɔ rul, ɛn i dɔn gi mi ɔda fɔ bil os fɔ am insay Jerusɛlɛm na Juda.

³ Mek PAPA GƆD de wit una we nain pipul dɛn; una fɔ go na Jerusɛlɛm fɔ go bil PAPA GƆD in os, PAPA GƆD we na Izrɛl dɛn GƆD we de na Jerusɛlɛm.

⁴ Ɔl dɛn pipul dɛn we tap usay dɛn Ju pipul dɛn we dɛn bin kech briŋ kam na ya fɔ kɔntribyut; dɛn fɔ gi gold, silva, provishɔn fɔ di patrol, animal ɛn prɛzɛnt dɛn fɔ PAPA GƆD in os na Jerusɛlɛm.’”

⁵ Dɛn PAPA GƆD tɔch di edman dɛn fɔ Juda ɛn Bɛnjamin fambul dɛn at, ɛn di man we de mek sakrifays fɔ pipul sin ɛn di Livayt dɛnsɛf yon at fɔ lɛ dɛn go go na Jerusɛlɛm fɔ go bil in os.

⁶ Di Ju dɛn neba we nɔto Ju gi dɛnsɛf yon kɔntribyushɔn; dɛn gi gold, silva tiŋs dɛn, provishɔn fɔ di patrol ɛn animal dɛn.

⁷ Kiŋ Sayrɔs gi di Ju dɛn bak ɔl wetin Kiŋ Nɛbyukadnɛza bin dɔn pul kɔmɔt na PAPA GƆD in os na Jerusɛlɛm we i kɛr go put nain yon gɔd dɛn os.

⁸ Di Kiŋ an ova ɔltin gi Mithrɛdath we na bin di trɛzhɔra, dɔn Mithrɛdath ol wetin dɛn gi am ɛn rayt am dɔŋ na pepa so dat Shɛshbaza, di man we fɔ bi gɔvna na Juda go si am.

⁹ Na dɛn tin dɛn yaso Kiŋ Sayrɔs bin an ova gi Mithrɛdath: gold dish 30 silva dish 1,000 ɔda kayn dish dɛn 29

¹⁰ gold bol 30 silva bol 410 ɔda tiŋs dɛn 1,000

¹¹ Ɔl ɛn ɔl na fayv tawzin, fo ɔndrɛd (5,400) gold ɛn silva tiŋs dɛn Shɛshbaza bin kɛr go na Jerusɛlɛm we i bin de go wit dɛn Ju we dɛn bin kech kɛr go na Babilɔn.