Ɛksodɔs 7 - Krio Fɔs Oli Baybul

¹ PAPA GƆD tɛl Mozis se, “A go mek yu lɛkɛ PAPA GƆD to di kiŋ. Yu brɔda Erɔn go bi yu prɔfɛt ɛn i go de tɔk fɔ yu.

² Tɛl Erɔn ɔl wetin a tɛl yu dɔn in go tɛl di kiŋ, mek i lɛf di Izrɛlayt dɛn fɔ kɔmɔt na di kɔntri.

³ Bɔt a go mek di kiŋ mek at traŋa so dat pan ɔl we a go du ɔlkayn mirekul dɛn na Ijipt nɔ go lisin.

⁴ A go briŋ waala na di kɔntri ɛn pul di Izrɛlayt dɛn, we na mi pipul dɛn, kɔmɔt de.

⁵ Da tɛm de, di Ijipshian dɛn go no fɔ tru se mi na PAPA GƆD wɛn a go dɔn wit dɛn ɛn pul mi pipul dɛn kɔmɔt na di kɔntri.”

⁶ Mozis ɛn Erɔn du wetin PAPA GƆD tɛl dɛn fɔ du.

⁷ Mozis bin ol eti ia ɛn Erɔn bin ol eti tri ia di tɛm we dɛn bin go tɔk to di kiŋ.

Erɔn In Wɔkinstik Tɔn Snek

⁸ PAPA GƆD tɛl Mozis ɛn Erɔn se,

⁹ “We di kiŋ aks una fɔ pafɔm, Mozis, yu fɔ tɛl Erɔn se mek i trowe in tik, bifo di kiŋ na grɔn, ɛn i go tɔn to snek.”

¹⁰ So Mozis ɛn Erɔn go to di kiŋ ɛn du wetin PAPA GƆD ɔda dɛn fɔ du. Erɔn trowe wɔkinstik bifo di kiŋ ɛn in ɔfisa dɛn, dɔn di tik tɔn to snek.

¹¹ So di kiŋ insɛf sɛn kɔl i sɛnsman dɛn, in lukgrɔn man dɛn, ɛn in majikman dɛn na Ijipt. Dɛn yuz dɛn yon pawa fɔ du di sem tin.

¹² Dɛn trowe dɛn yon tik dɛn na grɔn ɛn di tik dɛn tɔn to snek dɛn. Bɔt Erɔn in yon snek swɛla di ɔda snek dɛn.

¹³ Pan ɔl dis, di kiŋ stil mek traŋayes ɛn nɔ lisin to Mozis ɛn Erɔn lɛkɛ aw PAPA GƆD bin se.

Trɔbul Fɔdɔm Na Ijipt Blɔd Bɔs Ɔlsay

¹⁴ PAPA GƆD tɔk to Mozis. I se, “Di kiŋ gɛt traŋa at. I nɔ go gri fɔ mek di pipul dɛn go.

¹⁵ So go mit am na mɔnin we i de go na riva Nayl. Wet fɔ am nia di wata, ɛn nɔ fɔgɛt fɔ tek yu tik we bin tɔn to snek.

¹⁶ Tɛl di kiŋ se, di PAPA GƆD we di Ibru pipul dɛn de wɔship se mek a tɛl yu se, lɛ i lɛf in pipul dɛn lɛ dɛn go wɔship am na di ples we pɔsin nɔ go ebul tap. Bɔt te naw i nɔ gri fɔ yɛri dɛn.

¹⁷ Tɛl am se, mi se, di tin we a go du go mek i no se mi na PAPA GƆD. Dis wɔkinstik we i de si so na yu an, nain yu go tek nak di wata na di Riva nayl, ɛn i go tɔn to blɔd.

¹⁸ Di fish dɛn na di riva go day ɛn di wata go de smɛl. Di Ijipshian dɛn nɔ go ebul fɔ drink di wata na di riva.”

¹⁹ PAPA GƆD tɛl Mozis se, “Tɛl Erɔn fɔ pɔynt in wɔkinstik pan ɔl di wata dɛn na Ijipt - di riva dɛn, di watasay, dɛn brij, dɛn wɛl ɛn ɔl usay wata de, dɛn ɔl go tɔn blɔd. Ɔl dɛn wata we dɛn dɔn kip na drɔm ɔ bokit, ɔl go tɔn to blɔd.”

²⁰ So Mozis ɛn Erɔn du wetin PAPA GƆD tɛl dɛn fɔ du. Di kiŋ ɛn in ɔfisa dɛn bin de we Erɔn tek in wɔkinstik nak di wata na di riva, dɔn di wata tɔn to blɔd.

²¹ Di fish dɛn na di riva day ɛn dat mek di wata bigin fɔ smɛl. Di Ijipshian dɛn nɔ bin ebul fɔ drink di wata. Blɔd bin de ɔlsay na Ijipt.

²² Bɔt di majikman dɛn na Ijipt dɛnsɛf yuz dɛn majik pawa ɛn tɔn wata to blɔd. Dis mek di kiŋ stil mek traŋayes. I nɔ gri fɔ du wetin Mozis ɛn Erɔn se jɛs lɛkɛ aw PAPA GƆD bin dɔn se.

²³ Di kiŋ jɛs tɔn i bak ɛn go nain os. Wetin apin nɔ wɔri am atɔl.

²⁴ Di Ijipshian dɛn bi gɛt fɔ dig wata wɛl nia riva Nayl bikɔs dɛn nɔ bin gɛt wata fɔ drink.

²⁵ Di wata we PAPA GƆD tɔn to blɔd de lɛkɛ dat fɔ sɛvin de.