Ɛksodɔs 40 - Krio Fɔs Oli Baybul

Di Pipul Dɛn Fiks Di Tɛnt Dɔn Mozis Dɛdiket Am

¹ PAPA GƆD tɔk to Mozis,

² I se, “Di fɔs de na di fɔs mɔnt, na da de de una fɔ fiks di Tɛnt we a fɔ de.

³ Put di Kɔvinant Bɔks usay di Tɛn Kɔmandmɛnt de na di Tɛnt, ɛn put di klos we yu de ɛŋ pan am.

⁴ Dɔn yu briŋ di tebul ɛn put ɔl wetin fɔ de pan am na dɛn ples. Briŋ di stand we di lamp fɔ de ɛn put di lamp dɛn pan am.

⁵ Put di gold ɔlta fɔ bɔn insɛns bifo di Kɔvinant Bɔks, dɔn yu ɛŋ di klos na di Tɛnt in domɔt.

⁶ Put di ɔlta we na de fɔ bɔn sakrifays bifo di Tɛnt.

⁷ Put di bol bitwin di Tɛnt ɛn di ɔlta ɛn ful am wit wata.

⁸ Put di balans klos we de ɛŋ rawnd di Tɛnt we mek di bawndri ɛn put klos na di domɔt.

⁹ Dɔn, tek di ɔyl we yu de yuz fɔ kɔnsikret ɛn kɔnsikret di Tɛnt ɛn ɔl wetin de, de. Kɔnsikret ɔl wetin de de wit di fɔnichɔ.

¹⁰ Nɛks, yu kɔnsikret di ɔlta fɔ bɔn sakrifays ɛn ɔl wetin de wit am, dɔn i go oli.

¹¹ Kɔnsikret di bol ɛn in bes.

¹² Wɛn yu dɔn, briŋ Erɔn ɛn in bɔypikin dɛn na di Tɛnt in domɔt ɛn was wit wata,

¹³ dɔn yu drɛs Erɔn wit di spɛshal gawn, ɛn anɔynt ɛn kɔnsikret am fɔ lɛ i go de sav mi as man we de mek sakrifays fɔ pipul sin.

¹⁴ Briŋ in bɔypikin dɛn kam ɛn wɛr dɛnsɛf yon gawn pan dɛn,

¹⁵ dɔn yu anɔynt dɛn lɛkɛ aw yu anɔynt dɛn papa, fɔ lɛ dɛnsɛf go de sav mi as man dɛn we de mek sakrifays fɔ pipul sin. Dɛn ɛn dɛn jɛnareshɔn na dɛn go de sav mi te go.”

¹⁶ Mozis du ɔl wetin PAPA GƆD tɛl am fɔ du.

¹⁷ So di fɔs de na di fɔs mɔnt insay di sɛkɛn ia we dɛn lɛf Ijipt, dɛn fiks di Tɛnt we PAPA GƆD fɔ de.

¹⁸ Mozis le di fawndeshɔn; i put di bes dɛn ɛn fiks di frem dɛn, di krɔsba ɛn di post dɛn;

¹⁹ dɔn i prɛd di tin we fɔ kɔba di Tɛnt pantap, jɛs lɛkɛ aw PAPA GƆD bin dɔn tɛl am fɔ du.

²⁰ I tek di tu ston tablɛt ɛn put dɛn insay di Kɔvinant Bɔks. I krɔs di pol dɛn na di riŋ dɛn pan di bɔks ɛn put di kɔba pantap.

²¹ I put di Kɔvinant Bɔks insay di Tɛnt ɛn drɔ di klos we i de tek kɔba am lɛ dɛn nɔ si am. Jɛs lɛkɛ aw PAPA GƆD tɛl am fɔ du na so i du.

²² I put di tebul insay di Tɛnt ɔp say lilibit,

²³ dɔn i put di bred we dɛn de ɔfa to PAPA GƆD pantap di tebul. I du jɛs lɛkɛ aw PAPA GƆD tɛl am fɔ du.

²⁴ I put di stand fɔ di lamp insay di Tɛnt dɔŋ say lilibit bifo di tebul.

²⁵ Ɛn na de bifo PAPA GƆD in yay i layt di lamp dɛn, jɛs lɛkɛ aw PAPA GƆD tɛl am fɔ du.

²⁶ I put di gold ɔlta insay di Tɛnt bifo di klos we ɛŋ,

²⁷ dɔn i bɔn insɛns we gɛt fayn swit smɛl.

²⁸ I ɛŋ di klos na di Tɛnt in domɔt.

²⁹ Na bifo dis klos ya i put di ɔlta we na fɔ bɔn sakrifays ɛn plant sakrifays. I du jɛs lɛkɛ aw PAPA GƆD tɛl am fɔ du.

³⁰ I put di bol midul di Tɛnt ɛn di ɔlta ɛn ful am wit wata.

³¹ Mozis, Erɔn ɛn in bɔypikin dɛn kin de was dɛn an ɛn fut de,

³² ɛnitɛm we dɛn de go na di Tɛnt ɔ di ɔlta, jɛs lɛkɛ aw PAPA GƆD bin tɛl dɛn fɔ du.

³³ Mozis mek klos fɔ ɛŋ rayt rawnd di spes we di Tɛnt ɛn di ɔda tiŋs dɛn ɛn di ɔlta de ɛn mek domɔt. Na so i tek dɔn di wok.

PAPA GƆD Apia Lɛkɛ Klawd Oba Di Tɛnt

³⁴ PAPA GƆD apia lɛkɛ klawd we tan lɛkɛ fɔg oba di Tɛnt. I kɔba di wanol ples.

³⁵ Bikɔs ɔf dis Mozis nɔ ebul fɔ go insay di Tɛnt.

³⁶ Ɛnitɛm we dis kayn klawd ya so apia, di Izrɛlayt dɛn nɔba ebul fɔ kɔntinyu dɛn patrol, pas i kɔmɔt,

³⁷ bɔt wɛn i kɔmɔt dɛn kin ebul kɛri ɔn wit dɛn patrol.

³⁸ Tru awt di tɛm we dɛn de travul, PAPA GƆD in klawd kin de oba di Tɛnt de tɛm, dɔn faya kin de insay de na nɛt.