Ɛksodɔs 39 - Krio Fɔs Oli Baybul

Dɛn Mek Di gawn Fɔ Di Man Dɛn We De Mek Sakrifays Fɔ Pipul Sin

¹ Dɛn yuz di blu, pɔpul ɛn rɛd wul matirial fɔ mek fayn gawn dɛn fɔ di man dɛn we de mek sakrifays fɔ pipul sin we dɛn de sav na di oli ples. Dɛn mek Erɔn in yon gawn jɛs lɛkɛ aw PAPA GƆD bin dɔn tɛl Mozis fɔ mek am.

² Dɛn yuz gold trɛd, blu, pɔpul ɛn rɛd matirial fɔ mek di ifɔd.

³ Dɛn dizayn gold lif pan di blu, pɔpul ɛn rɛd wul matirial.

⁴ Dɛn mek tu sholda strap ɛn fiks dɛn na di ifɔd in sayd.

⁵ Dɛn mek bɛlt wit di sem kayn matirial ɛn stich am pan di ifɔd, jɛs lɛkɛ aw PAPA GƆD bin tɛl Mozis fɔ du.

⁶ Dɛn rɛdi di ɔniks ston dɛn ɛn fiks dɛn wit gold; ɛn spɛl Jekɔb in twɛlv bɔypikin dɛn nem pan am lɛk stamp.

⁷ Dɛn put ɔl dɛn tin ya pan di sholda strap pan di ifɔd fɔ rɛprizɛnt di twɛlv fambul dɛn na Izrɛl, jɛs lɛkɛ aw PAPA GƆD bin dɔn kɔmand Mozis.

Di pawch

⁸ Di sem kayn matirial we dɛn yuz fɔ mek di ifɔd, nain dɛn yuz fɔ mek di pawch wit di sem kayn dizayn.

⁹ I gɛt skwaya shep we na nayn inchis lɔŋ, nayn inchis wayd.

¹⁰ Dɛn yuz fayn miniral ston dɛn fɔ mek fo ro dɛn; na di fɔs ro dɛn yuz rubi, topaz ɛn ganɛt ston;

¹¹ na di sɛkɛn ro dɛn yuz ɛmirald, safaya ɛn dayamɔn;

¹² na di tɔd ro dɛn yuz tɔkɔys, aget ɛn amithist;

¹³ dɔn na di las ro dɛn yuz bɛril, ɔniks ɛn jaspa. Dɛn yuz gold fɔ mach ɔl dɛn ston ya.

¹⁴ Ɔl di twɛlv ston dɛn gɛt wan pan Jekɔb in bɔypikin dɛn nem. Na dɛn de rɛprizɛnt di twɛlv fambul dɛn na Izrɛl.

¹⁵ Dɛn mek piɔ gold chen fɔ di pawch ɛn twis am lɛkɛ kɔd.

¹⁶ Dɛn mek tu sɛt dizayn wit gold sɛtin ɛn tu gold riŋ dɛn ɛn fiks dɛn na di ɔp kɔna dɛn pan di pawch,

¹⁷ dɔn dɛn pas di tu gold chen dɛn insay di tu gold riŋ dɛn,

¹⁸ dɔn dɛn fasin di ɔda tu ɛnd dɛn pan di gold chen dɛn pan di tu dizayn we dɛn mek, na so dɛn tek fiks dɛn bifo di sholda strap dɛn pan di ifɔd.

¹⁹ Dɛn mek ɔda tu gold riŋ dɛn ɛn fiks dɛn to di kɔna na di bɔtɔm say pan di pawch, na di insay ɛj nia to di ifɔd.

²⁰ Dɛn mek tu mɔ gold riŋ dɛn ɛn fiks dɛn bɔtɔm say bifo di tu sholda strap dɛn pan di ifɔd nia to usay dɛn stich di bɛlt.

²¹ Dɛn tay di riŋ dɛn pan di pawch to di riŋ dɛn pan di ifɔd wit blu kɔd, fɔ lɛ di pawch go rɛst pantap di bɛlt fɔ lɛ i nɔ lus jɛs lɛkɛ aw PAPA GƆD bin dɔn kɔmand Mozis.

Di Klos Dɛn Fɔ Di ɔda Man Dɛn We De Mek Sakrifays Fɔ Pipul Sin

²² Na blu wul dɛn yuz fɔ mek di gawn we de de ɔnda di ifɔd.

²³ Dɛn tek tɛm stich di say we ed de pas ɛn gi am bayndin fɔ lɛ i nɔ chɛr.

²⁴ Dɛn dizayn pomigranet frut dɔŋ say pan di gawn. Na blu, pɔpul ɛn rɛd wul dɛn yuz fɔ mek dis dizayn.

²⁵ Dɛn yuz piɔ gold mek bɛl dɛn ɛn put dɛn midul di pomigranet dɛn rayt rawnd di dɔŋ say pan di gawn.

²⁶ Dɛn put wan bɛl, wan pomigranet; wan bɛl, wan pomigranet rayt rawnd di gawn, jɛs lɛk aw PAPA GƆD bin dɔn tɛl Mozis.

²⁷ Dɛn so shɔt dɛn fɔ Erɔn ɛn in bɔypikin dɛn.

²⁸ Dɛn so tɔban, kyap ɛn fayn linin shɔt trɔsis,

²⁹ dɔn dɛn so gadul wit blu, pɔpul ɛn rɛd wul matirial, ɛn dɛkɔret am fayn jɛs lɛkɛ aw PAPA GƆD bin dɔn tɛl Mozis.

³⁰ Dɛn tek piɔ gold mek di oli krawn in plet ɛn dɛn rayt pan am se, “Dis Na fɔ PAPA GƆD nɔmɔ.

³¹ Dɛn tek blu les tay am pan di tɔban, jɛs lɛkɛ aw PAPA GƆD bin dɔn tɛl Mozis.

Di Wokman Dɛn Dɔn Di Wok

³² Di man dɛn du ɔl di wok fɔ di Tɛnt usay PAPA GƆD fɔ de jɛs lɛkɛ aw i bin dɔn tɛl dɛn fɔ du.

³³ Dɔn dɛn kɛr di Tɛnt go gi Mozis wit ɔl di tiŋs we i gɛt lɛkɛ di uk, di frem, di krɔsba, di post ɛn dɛn bes,

³⁴ di ship kanda we dɛn day to rɛd ɛn di ɔda fayn lɛda matirial fɔ kɔba tin na tebul ɛn di klos fɔ ɛŋ;

³⁵ di Kɔvinant Bɔks usay di ston tablɛt dɛn de, in pol dɛn ɛn i kɔba;

³⁶ di tebul ɛn ɔl di tiŋs dɛn we de wit am ɛn di bred we dɛn de ɔfa to PAPA GƆD;

³⁷ di piɔ gold stand fɔ di lamp, di lamp dɛn ɛn ɔl wetin de wit dɛn ɛn di ɔyl fɔ di lamp dɛn;

³⁸ di gold ɔlta ɛn di ɔyl fɔ anɔynt; di insɛns wit fayn smɛl; di klos we fɔ de na di Tɛnt in domɔt;

³⁹ di bras ɔlta wit in bras gretin, in pol dɛn ɛn ɔl wetin de wit am; di bol dɛn ɛn dɛn bes;

⁴⁰ di kɔtin dɛn fɔ di say we pɔsin nɔ fɔ go ɛn dɛn bes; di klos fɔ ɛŋ na di domɔt to di say we pɔsin nɔ fɔ go ɛn dɛn rop; di Tɛnt pɛg dɛn, ɔl di tiŋs dɛn we dɛn fɔ yuz na di Tɛnt;

⁴¹ di fayn gawn dɛn fɔ di man dɛn we de mek sakrifays fɔ pipul sin we dɛn fɔ wɛr na di oli ples, di oli klos fɔ Erɔn ɛn in bɔypikin dɛn.

⁴² Di Izrɛlayt dɛn du ɔl wetin PAPA GƆD tɛl dɛn fɔ du.

⁴³ Mozis ɛgzamin ɔl tin ɛn si se dɛn du jɛs wetin PAPA GƆD tɛl dɛn fɔ du. So Mozis blɛs dɛn.