Ɛksodɔs 38 - Krio Fɔs Oli Baybul

Dɛn Mek Di Ɔlta Fɔ Bɔn Sakrifays

¹ As fɔ di ɔlta fɔ bɔn sakrifays, Bɛzalɛl yuz akeshia bod bil di ɔlta. I bin gɛt fo kɔna. In mɛzhɔmɛnt na sɛvin ɛn af fut lɔŋ, sɛvin ɛn af fut wayd ɛn fo ɛn af fut ay.

² I mek fo ɔn dɛn pantap na di fo kɔna. Ɔl bin jɔyn pan di ɔlta. I yuz bras kɔba am.

³ I mek ɔl di tiŋs dɛn we fɔ de na di ɔlta: di pan, shɔbul bol, fɔk ɛn di faya pan dɛn. Na bras i tek mek ɔl dɛn tiŋs ya.

⁴ I mek gretin wit bras fɔ di ɔlta ɛn put am ɔnda di ɔlta.

⁵ I mek fo riŋ dɛn fɔ tot di ɔlta ɛn put dɛn na di fo kɔna dɛn.

⁶ I yuz akeshia bod mek pol dɛn ɛn kɔba dɛn wit bras,

⁷ dɔn i pas dɛn insay di riŋ dɛn pan di ɔlta. Na bod i yuz fɔ mek di ɔlta, ɛn i mek am dip insay.

Dɛn Mek Di Brɔnz Besin

⁸ Bɛzalɛl yuz bras mek di besin ɛn in stand. Na di lukin glas we di uman dɛn we bin de sav na di Tɛnt domɔt bin gɛt i yuz fɔ mek am.

Dɛn Mek Di Klos Fɔ Ɛŋ Na Fɔ Di Tɛnt

⁹ As fɔ di Tɛnt usay PAPA GƆD kin de, na fayn linin matirial i yuz fɔ mek di klos fɔ ɛŋ de. Na fifti yad matirial i yuz fɔ mek di dɔŋ pat;

¹⁰ i yuz twɛnti bras post ɛn twɛnti bras bes wit in uk ɛn silva rod dɛn.

¹¹ Na di sem amawnt ɔf matirial i yuz fɔ di ɔp pat.

¹² Fɔ di rayt sayd na twɛnti-fayv yad matirial i yuz wit tɛn post ɛn tɛn bes wit dɛn uk ɛn silva rɔd dɛn.

¹³ Na di sem amawnt ɔf matirial we i yuz fɔ di rayt i yuz fɔ di lɛft sayd.

¹⁴ I yuz sɛvin ɛn af yad matirial fɔ mek di klos fɔ di domɔt wit dɛn tri post ɛn tri bes dɛn.

¹⁵ Di ɔda sayd dɛn na di domɔt bin gɛt sɛvin ɛn af yad klos wit tri post ɛn tri bes dɛn.

¹⁶ I Yuz fayn linin matirial fɔ mek ɔl di klos dɛn na di Tɛnt.

¹⁷ Na bras i yuz fɔ mek di post dɛn bes, dɔn i yuz silva fɔ mek di uk dɛn, di rɔd, ɛn di pantap say pan di post dɛn. Na di silva rɔd i yuz fɔ jɔyn jɔyn ɔl di post dɛn togɛda.

¹⁸ Di klos we ɛŋ na di domɔt fɔ go usay pɔsin nɔ fɔ go, na fayn linin matirial wit blu, pɔpul ɛn rɛd wul dɛn tek dizayn am. In mɛzhɔmɛnt na tɛn yad lɔŋ ɛn tu ɛn af yad wayd, we tan lɛkɛ di klos we de kɔba usay di Kɔvinant bɔks de.

¹⁹ Dis klos ya bin gɛt fo post dɛn we tinap pan fo bras bes. Na silva dɛn tek mek dɛn uk, di tin we de kɔba pantap ɛn di rɔd dɛn.

²⁰ Ɔl di pɛg dɛn fɔ di Tɛnt ɛn di say sɛf we pɔsin nɔ fɔ go, na bras dɛn tek mek dɛn.

Di Gold, Brɔnz Ɛn Silva Tiŋs Dɛn Fɔ Mek PAPA GƆD In Tɛnt

²¹ Na ɔl dɛn tin dɛn yaso dɛn bin yuz fɔ mek di Tɛnt we PAPA GƆD fɔ de, usay dɛn bin kip di tu ston tablɛt we di Tɛn Kɔmandmɛnt bin rayt pan. Na Mozis bin supavays di Livayt dɛn we bin de wok ɔnda Ithama fɔ kɔnt dɛn. Ithama in Papa na Erɔn, we de mek sakrifays fɔ pipul sin.

²² Ɔ we kɔmɔt to di Juda fambul bɔn Yuri, we bɔn Bɛzalɛl we na Yuri in bɔypikin, we Yuri insɛf na Ɔ in bɔypikin we kɔmɔt to di Juda fambul, na dis Bɛzalɛl mek ɔl wetin PAPA GƆD bin tɛl Mozis fɔ mek.

²³ Di man we bin de ɛp am, dat na Oolayab we na Aisamak in bɔypikin we kɔmɔt na Dan fambul, na bin femɔs dizayna ɛn i sabi fɔ mek blu, pɔpul ɛn rɛd wul ɛn linin matirial.

²⁴ Ɔl ɛn ɔl di gold we dɛn yuz fɔ mek di Tɛnt nɔmɔ na tu tawzin, wan ɔndrɛd ɛn naynti-fayv pawns, ɛn na di mɛzhɔmɛnt we dɛn bin de yuz da tɛm de dɛn tek we am.

²⁵ Di silva we dɛn yuz we sɛvin tawzin, fayv ɔndrɛd ɛn fifti pawns, ɛn na di sem mɛzhɔmɛnt we dɛn bin de yuz da tɛm de dɛn tek we am.

²⁶ Di gold ɛn silva we dɛn gɛda bin so bɔku dat i rich di nɔmba we i bin fɔ rich if ɔl di pipul dɛn we dɛn kɔnt na di sɛnsɔs bin gi dɛn yon kɔntribyushɔn. Dɛn bin kɔnt bɔt sɔm siks ɔndrɛd ɛn tri tawzin, fayv ɔndrɛd ɛn fifti tawzin man dɛn, dat na dɛn wan we dɔn ol twɛnti ia ɛn we pas da ej de.

²⁷ Fɔ di silva in yon say, dɛn yuz sɛvin tawzin, fayv ɔndrɛd pawns fɔ mek di ɔndrɛd bes fɔ di Tɛnt, dɔn fɔ di klos fɔ ɛŋ yon say, na sɛvinti-fayv pawns dɛn yuz fɔ mek wan bes.

²⁸ Bɛzalɛl yuz di balans fifti pawns silva fɔ mek di rɔd dɛn, di uk dɛn fɔ di post dɛn ɛn fɔ di wan dɛn we de de pantap.

²⁹ Ɔl ɛn ɔl di bras we dɛn gi na fayv tawzin, tri ɔndrɛd ɛn tɛn pawns.

³⁰ I yuz am fɔ mek di bes dɛn fɔ di domɔt fɔ go insay di Tɛnt, di bras ɔlta wit in bras gretin ɛn ɔl di ɔda tiŋs dɛn fɔ di ɔlta,

³¹ di bes dɛn fɔ di say we pɔsin nɔ fɔ go ɛn di domɔt fɔ da ples de, ɛn fɔ ɔl di pɛg dɛn we de rawnd di Tɛnt.