Ɛksodɔs 36 - Krio Fɔs Oli Baybul

¹ Mozis se Bɛzalɛl ɛn Oolayab wit ɔl di ɔda man dɛn we PAPA GƆD dɔn gi di sɛns ɛn skil pan bildin wok fɔ du di wok lɛkɛ aw i dɔn se.

Di Pipul Dɛn Briŋ Bɔku Gift Dɛn

² Mozis kɔl Bɛzalɛl, Oolayab ɛn ɔl di ɔda man dɛn we PAPA GƆD dɔn gi sɛns ɛn skil we rɛdi fɔ wok fɔ bigin di wok wantɛm.

³ Mozis gi dɛn ɔl di bildin matirial ɛn ɔda tiŋs dɛn we di Izrɛlayt dɛn dɔn gi. Pan ɔl we di pipul dɛn bin dɔn gi tiŋs dɛn, dɛn bin stil kɔntinyu fɔ de gi mɔ ɛvri mɔnin.

⁴ Dis mek di wokman dɛn kɔmplen to Mozis se,

⁵ di matirial ɛn di tiŋs dɛn dɔn bɔku pasmak pas wetin PAPA GƆD se.

⁶ So Mozis gi ɔda se lɛ nɔ bɔdi nɔ gi mɔ, di tiŋs dɛn du so. Dat mek di pipul dɛn tap,

⁷ bikɔs wetin dɛn bin gɛt pas wetin dɛn nid fɔ du di wok.

Di Pipul Dɛn Bil Di Tɛnt

⁸ Di masta sabi wokman dɛn bil di Tɛnt we PAPA GƆD fɔ de. Dɛn yuz tɛn pis fayn linin matirial wit blu pɔpul ɛn rɛd wul, dɔn dɛn dizayn krichɔ dɛn we gɛt fɛda.

⁹ Di matirial dɛn na bin fotin yad lɔŋ ɛn tu yad wayd. Ɔl tɛn na bin di sem sayz.

¹⁰ Dɛn jɔyn fayv togɛda fɔ mek wan sɛt.

¹¹ Dɛn mek blu lup dɛn na di ɛj pan ɔl di sɛt dɛn.

¹² Dɛn put fifti lup dɛn pan di fɔs pis ɛn ɔda fifti lup pan di ɔda wan fɔ mach am.

¹³ Dɔn dɛn mek fifti gold uk dɛn fɔ jɔyn di tu sɛt to wan pis.

¹⁴ Dɛn yuz got ia mek ilɛvin klos fɔ ɛŋ, dɛn ɔl,

¹⁵ na bin di sem sayz, dat na fiftin yad lɔŋ ɛn tu yad wayd.

¹⁶ Dɛn so fayv togɛda fɔ mek wan sɛt, dɔn di ɔda siks dɛn so am fɔ mek ɔda sɛt.

¹⁷ Dɛn put fifti lup dɛn na di ɛj pan di wan pis ɛn ɔda fifti lup pan di ɔda wan.

¹⁸ Dɛn mek fifti bras uk fɔ jɔyn di tu sɛt fɔ mek wan.

¹⁹ Dɛn mek tu mɔ matirial fɔ kɔba di Tɛnt; di wan na ship kanda we dɛn day rɛd dɛn yuz fɔ mek am, di ɔda wan na fayn lɛda matirial dɛn yuz we nain fɔ de na do.

²⁰ Dɛn tek akeshia bod mek di ɔp frem fɔ di Tɛnt.

²¹ Ɔl di frem dɛn na fiftin fut lɔŋ ɛn twɛnti-sɛvin inchis wayd.

²² Dɛn ɔl gɛt wan say we dɛn jɔyn to dɛn kɔmpin.

²³ Dɛn mek twɛnti frem fɔ di bɔtɔm say,

²⁴ wit fɔti silva bes we dɛn de sidɔm pan.

²⁵ Dɔn di pantap say dɛn mek twɛnti ɔda frem

²⁶ wit fɔti silva bes we dɛn de wɛr pan. Di frem dɛn ɔl bin gɛt tu bes.

²⁷ Dɛn mek siks frem fɔ di bak pat pan di Tɛnt, dat na di raytan pat.

²⁸ Dɛn mek tu frem fɔ di tu kɔna dɛn na di Tɛnt.

²⁹ Frɔm dɔŋ to ɔp di frem dɛn ɔl jɔyn na di kɔna.

³⁰ Na et frem dɛn bin de ɔltogɛda wit dɛn silva bes: na sikstin bes, dɛn ɔl bin gɛt tu tu.

³¹ Dɛn mek fiftin krɔsba wit akeshia bod, fayv fɔ wan say dɛn pan di Tɛnt,

³² dɔn fayv fɔ di ɔda say na di bak.

³³ Di midul krɔsba in rɔn frɔm wan say na di Tɛnt to di ɔda say.

³⁴ Dɛn tek gold kɔba di frem dɛn, dɔn dɛn yuz gold riŋ dɛn fɔ pas di krɔsba dɛn insay.

³⁵ Dɛn yuz fayn linin matirial blu, pɔpul ɛn rɛd wul, dɔn dɛn dizayn chɛryubim pan am.

³⁶ Dɛn yuz akeshia bod mek fo post dɛn fɔ ol di klos dɛn we de ɛŋ, dɛn kɔba dɛn wit gold ɛn gi dɛn gold uk dɛn. Dɔn dɛn mek fo silva bes dɛn we di post dɛn go sidɔm pan.

³⁷ Fɔ di domɔt fɔ go insay di Tɛnt, dɛn yuz fayn linin matirial, dat na blu, pɔpul ɛn rɛd wul, dɔn dɛn dizayn am.

³⁸ Fɔ dis klos we de ɛŋ dɛn mek fayv post we dɛn gi uk, dɔn dɛn kɔba dɛn ɛn dɛn rɔd dɛn wit gold, dɔn dɛn mek fayv bras bes fɔ in post dɛn.