Ɛksodɔs 35 - Krio Fɔs Oli Baybul

Lɔ Dɛn Fɔ Di De Fɔ Pre Ɛn Blo

¹ Mozis gɛda ɔl di Izrɛlayt dɛn ɛn tɛl dɛn se, “Dis na wetin PAPA GƆD dɔn gi ɔda se una fɔ du.” I se,

² “Una gɛt siks de na di wik fɔ wok bɔt di de we mek sɛvin fɔ kip am oli ɛn kwayɛt to PAPA GƆD. Ɛnibɔdi we wok da de de dɛn fɔ kil am.

³ Una nɔ fɔ ivin mek faya sɛf da de de we na fɔ pre ɛn blo.”

Di Tin Dɛn We Fɔ Gi PAPA GƆD Fɔ In Spɛshal Os

⁴ Mozis tɛl ɔl di Izrɛlayt dɛn se, dis na ɔda we PAPA GƆD gi.

⁵ “Una fɔ gi sɔntin to PAPA GƆD. Udat gɛt fri an we want fɔ gi fɔ briŋ gold, silva ɛn bras,

⁶ fayn linin matirial, blu, pɔpul ɛn rɛd wul matirial we dɛn tek got ia mek,

⁷ rɛd ship kanda; fayn lɛda ɛn akeshia bod;

⁸ ɔyl fɔ lamp; difrɛn kayn spays dɛn we gɛt fayn sɛnt fɔ mek ɔyl fɔ anɔynt ɛn fɔ mek insɛns,

⁹ ɔniks ston ɛn ɔda dia tiŋs dɛn fɔ mek ifɔd ɛn di pawch we di edman fɔ dɛn man we de mek sakrifays fɔ pipul sin de wɛr.

Di Tin Dɛn We Dɛn Fɔ Mek Fɔ Di Tɛnt We PAPA GƆD Fɔ De

¹⁰ Mozis tɛl di pipul dɛn se ɔl dɛn wan dɛn we gɛt skil fɔ mek sɔntin fɔ mit am fɔ lɛ dɛn go mek ɔl wetin PAPA GƆD dɔn se dɛn fɔ mek.

¹¹ Di tin dɛn fɔ mek na di Tɛnt ɛn ɔl wetin de pan am, di uk dɛn, di frem dɛn, di pila dɛn, di ba dɛn wit dɛn bes;

¹² di Kɔvinant bɔks wit in pol dɛn in kɔba ɛn in klos fɔ kɔba am;

¹³ di tebul wit in pol dɛn ɛn ɔl di ɔda tin dɛn we de de pan am; di bred we dɛn fɔ ɔfa to PAPA GƆD;

¹⁴ di stand we de lamp di de pan fɔ sho layt wit ɔl di ɔda tin dɛn ɛn di lamp dɛn; wit di ɔyl fɔ di lamp;

¹⁵ di ɔlta fɔ bɔn insɛns wit in pol dɛn ɛn di ɔyl fɔ anɔynt wit dɛn fayn insɛns, di klos fɔ di domɔt ɛn di Tɛnt;

¹⁶ di ɔlta fɔ bɔn sakrifays wit in bras gretin, in pol dɛn wit ɔl wetin fɔ de pan am, di bol ɛn di bes;

¹⁷ di ɔda klos dɛn na di Tɛnt wit in pila ɛn in bes dɛn, ɛn di skrin fɔ di kɔt in get;

¹⁸ di tabanakul in pɛg dɛn, wit di kɔt in yon pɛg dɛn ɛn dɛn kɔd;

¹⁹ di fayn gawn dɛn fɔ di man dɛn we de mek sakrifays fɔ pipul sin fɔ de sav na di oli ples, di oli gawn fɔ Erɔn we na di edman fɔ di man dɛn we de mek sakrifays fɔ pipul sin ɛn in bɔypikin dɛn.

Di Tin Dɛn We Di Pipul Dɛn Gi Fɔ Bil Di Tɛnt

²⁰ Ɔl di Izrɛlayt dɛn lɛf Mozis go.

²¹ Dɔn dɛn ɔl briŋ difrɛn difrɛn tiŋs dɛn fɔ bil di Tɛnt we PAPA GƆD go de. Ɔlman gi wetin in at tɛl am fɔ gi ɛn matirial fɔ mek di man dɛn we de mek sakrifays fɔ pipul sin dɛn gawn.

²² Man ɛn uman dɛn ɔl briŋ gold tiŋs dɛn we dɛn de wɛr lɛkɛ broch, yerin, riŋ, chen ɛn ɔl kayn gold as dɛn ɔfrin to PAPA GƆD.

²³ Ɔl dɛn wan dɛn we gɛt dɛn fayn linin matirial lɛkɛ blu, pɔpul, rɛd wul, got ia klos, rɛd ship kanda ɛn dɛn fayn lɛda briŋ dɛn kam.

²⁴ Dɛn wan dɛnsɛf we sabi mek bras ɛn silva briŋ dɛn yon kam. Dɛn wan we gɛt akeshia bod sɛf briŋ dɛn kam.

²⁵ Dɛn uman dɛnsɛf we sabi mek tred briŋ wetin dɛn dɔn mek lɛkɛ blu, pɔpul ɛn rɛd wul,

²⁶ ɛn trɛd we dɛn tek got ia mek.

²⁷ Di edman dɛn, dɛn briŋ miniral dɛn lɛkɛ ɔniks ston ɛn ɔda ston dɛn fɔ dɛkɔret di ifɔd ɛn di pawch,

²⁸ wit spays ɛn ɔyl fɔ di lamp, ɔyl fɔ anɔynt ɛn dɛn insɛns we gɛt fayn sɛnt.

²⁹ Ɔl di Izrɛlayt dɛn, man o, uman o, dɛn ɔl briŋ sɔntin to PAPA GƆD fɔ di wok we i dɔn gi Mozis fɔ du.

Di Wokman Dɛn We Dɛn Pik Fɔ Do Di Wok

³⁰ Mozis tɛl di Izrɛlayt dɛn se, PAPA GƆD dɔn pik Bɛzalɛl, dat na Yuri in bɔypikin we sɛf na Ɔ in grampikin we kɔmɔt na Juda fambul.

³¹ I se PAPA GƆD dɔn gi am in pawa wit sɛns ɛn skil fɔ du ɔlkayn bildin wok,

³² lɛkɛ fɔ dizayn, fɔ drɔ ɛn fɔ mek gold, silva ɛn bras tiŋs dɛn,

³³ fɔ kav wud ɛn fɔ yuz skil mek ɛnitin.

³⁴ I se PAPA GƆD dɔn gi Bɛzalɛl ɛn Oolayab we insɛf na Aisamak in bɔypikin we na Dan fambul i kɔmɔt di sɛns fɔ lan pipul ɔl dɛn skil ya.

³⁵ I se i dɔn gi dɛn di sɛns fɔ mek ɔlkayn tin dɛn lɛkɛ aw man kin yuz in an fɔ dizayn matirial. Dɛn kin yuz blu, pɔpul, rɛd wul ɛn ɔda matirial. I se dɛn sabi mek ɔlkayn tin.