Ɛksodɔs 33 - Krio Fɔs Oli Baybul

PAPA GƆD Tɛl Di Izrɛlayt Dɛn Fɔ Lɛf Mawnt Saynay

¹ PAPA GƆD tɔk to Mozis. I se, “Kɔmɔt na dis ples. Yu ɛn di pipul dɛn we yu pul kɔmɔt na Ijipt, una lɛf yaso ɛn go na di land we a bin prɔmis Ebraam, Ayzak ɛn Jekɔb se a go gi dɛn ɛn dɛn jɛnareshɔn.

² A go sɛn enjɛl fɔ gayd yu, dɔn a go drɛb dɛn Kenanayt, dɛn Amɔrayt, dɛn Itayt, dɛn Pɛrizayt, dɛn Ivayt ɛn dɛn Jɛbyusayt dɛn kɔmɔt na di land.

³ Una de go na land we fayn fɔ plant ɛn fɔ mɛn animal dɛn.. Bɔt a nɔ de go wit una, bikɔs if a go, a go kil una na rod bikɔs una traŋayes bad.

⁴ Wɛn di pipul dɛn yɛri aw PAPA GƆD tɔk traŋa wan, dɛn kray bita wan ɛn nɔ wɛr gold igen

⁵ PAPA GƆD bin dɔn tɛl Mozis fɔ tɛl di pipul dɛn se dɛn na traŋayes pipul dɛn, ɛn if i disayd fɔ waka wit dɛn fɔ wan minit sɛf, i go kil dɛn. I se dɛn fɔ pul ɔl di gold we dɛn wɛr, dɔn in go disayd wetin fɔ du wit dɛn.

⁶ Frɔm da say de na Mawnt Ɔrɛb te dɛn de go naw, di pipul dɛn nɔ wɛr gold igen, ɔlman bin pul in yon.

Di Tɛnt Usay PAPA GƆD Kin Mit Mozis

⁷ Ɛnitɛm we di pipul dɛn kin bil dɛn kamp, Mozis kin tek di Tɛnt ɛn put am na say we de fa lilibit. Dɛn kin de kɔl am se “Di Tɛnt usay PAPA GƆD de.” Ɛnibɔdi we want no wetin PAPA GƆD mekɔp fɔ am kin go insay di Tɛnt.

⁸ Ɛnitɛm we Mozis de go insay di Tɛnt, na so di pipul dɛn kin tinap na dɛn yon tɛnt domɔt de luk am te i go insay.

⁹ Wɛn Mozis dɔn go insay di Tɛnt, klawd kin kam dɔŋ te rich to di Tɛnt in domɔt, nainsay da klawd de PAPA GƆD kin de we i de tɔk to Mozis.

¹⁰ Wɛn ɔl di pipul dɛn kin si di klawd bifo di Tɛnt domɔt, dɛn kin tinap bifo dɛn tɛnt domɔt ɛn baw ɛn wɔship PAPA GƆD.

¹¹ Na so PAPA GƆD kin de tɔk to Mozis fes to fes lɛkɛ aw pɔsin kin tɔk to in padi. Wɛn Mozis kin tɔn in bak fɔ go, wan yɔŋ man we nem Jɔshwa, we na Nɔn in bɔypikin we nain asistant in kin lɛf insay di Tɛnt.

PAPA GƆD Prɔmis Se In Go De Wit Dɛn

¹² Mozis tɔk to PAPA GƆD. I se, “Na tru se yu dɔn pik mi fɔ lid dɛn pipul ya, bɔt yu nɔ tɛl mi udat go go wit mi. Yɛs, yu dɔn tɔk se yu no mi gud gud fashin ɛn yu lɛk mi.

¹³ Duya, if fɔ tru, tru se yu lɛk mi, tɛl mi wetin yu mekɔp fɔ lɛ a go de sav yu ɛn pliz yu. Nɔ fɔgɛt se na dɛn pipul ya yu dɔn pik fɔ bi yu yon.”

¹⁴ PAPA GƆD ansa Mozis. I se, “Misɛf sɛf go de wit yu ɛn yu go gɛt kol at.”

¹⁵ Mozis tɛl PAPA GƆD se if i no se i nɔ de go wit dɛn, lɛ i nɔ mek dɛn lɛf da ples de.

¹⁶ I aks PAPA GƆD se aw i want in ɛn di pipul dɛn fɔ no se i lɛk dɛn. I se if i lɛk dɛn lɛ i de wit dɛn, bikɔs na dat go mek dɛn difrɛn frɔm di ɔda neshɔn dɛn na di wɔl.

¹⁷ PAPA GƆD ansa Mozis. I se, “A go du wetin yu se bikɔs a no yu gud gud fashin ɛn a lɛk yu.”

¹⁸ Mozis beg PAPA GƆD se in want fɔ si aw PAPA GƆD tan so lɛ in sho insɛf to am.

¹⁹ PAPA GƆD ansa Mozis. I se, “A go mek ɔl mi gudnɛs de bifo yu, ɛn a go kɔl mi nem ‘PAPA GƆD’ fɔ lɛ yu yɛri. A go sho lɔv ɛn masi to udat a pik.

²⁰ Bɔt a nɔ go mek yu si mi fes, bikɔs ɛnibɔdi we si mi fes go day.

²¹ Luk wan ples de nia mi na ya usay yu go tinap pantap wan rɔk,

²² ɛn wɛn a de pas lɛkɛ layt, a go put yu insay wanol na di rɔk ɛn kɔba yu wit mi an te a pas,

²³ wɛn a dɔn pas, a go pul mi an kɔmɔt pan yu fɔ lɛ yu si mi bak; bɔt yu nɔ go si mi fes.”