Ɛksodɔs 32 - Krio Fɔs Oli Baybul

Di Pipul Dɛn Mek Gold Kaw Fɔ Wɔship

¹ We di pipul dɛn si se Mozis dɔn te ɔp di mawnten ɛn nɔ kam dɔŋ, dɛn go mit Erɔn ɛn tɛl am se, as fɔ Mozis we pul dɛn kɔmɔt na Ijipt, dɛn nɔ no wetin dɔn apin to am; so, lɛ in di Erɔn mek gɔd fɔ dɛn we go de lid dɛn.

² Erɔn ansa dɛn se lɛ dɛn gi am di gold yerin we dɛn wɛf, dɛn gyal pikin ɛn dɛn bɔypikin dɛn de wɛr.

³ Di pipul dɛn gɛda di yerin dɛn ɛn gi dɛn to Erɔn.

⁴ Erɔn tek di gold yerin dɛn ɛn mɛlt am ɛn mek gold lay lay gɔd lɛkɛ kaw. Ɔl di Izrɛlayt bigin tɛl dɛn kɔmpin se na da kaw de na di gɔd we pul dɛn kɔmɔt na Ijipt.

⁵ Erɔn bil ɔlta bifo di lay lay gɔd ɛn tɔk se di nɛks de dɛn go mek big sɛlibreshɔn fɔ ɔna PAPA GƆD.

⁶ Di pipul dɛn grap ali mɔnin di nɛks de ɛn bɔn animal as sakrifays ɛn ɔfa ɔda sakrifays fɔ pis; dɔn dɛn sidɔm naw fɔ it ɛn drink ɛn de mek lɔv.

⁷ PAPA GƆD tɔk to Mozis. I se, “Mekes go dɔŋ di mawnten lɛ yu go si aw yu pipul dɛn we yu pul kɔmɔt Ijipt kam dɔn biev; dɛn dɔn du bad, bad tin ɛn tɔn dɛn bak pan mi.

⁸ Dɛn dɔn kɔmɔt na di rod we a sho dɛn fɔ waka. Dɛn dɔn mek gold kaw ɛn de wɔship am, ɛn infakt sɛf ɔfa sakrifays to am ɛn tɔk se na di gɔd dat we pul dɛn kɔmɔt na Ijipt.

⁹ A dɔn si se dɛn pipul yaso na pipul dɛn we gɛt traŋa at,

¹⁰ so, lɛf mi saful lɛ a dil wit dɛn ɛn dɔnawe wit dɛn. Fɔ yu yon say, a go mek yu ɛn yu jɛnareshɔn dɛn tɔn to wanol neshɔn.”

¹¹ Bɔt Mozis beg PAPA GƆD se lɛ i kol in at, lɛ i nɔ vɛks, bikɔs nain dɔn yuz in traŋa an fɔ sev dɛn ɛn pul dɛn kɔmɔt na Ijipt.

¹² I se if i nɔ du so di Ijipshian dɛn go se na bad nɔmɔ i bin mekɔp fɔ du dɛn we i pul dɛn kɔmɔt na Ijipt, i mekɔp fɔ kil dɛn ɛn lɛ wan pan dɛn nɔ lɛf na di wɔl. I beg PAPA GƆD se duya lɛ i kol in at ɛn chenj in maynd, lɛ i nɔ mek in pipul dɛn sɔfa.

¹³ I tɛl PAPA GƆD se lɛ i nɔ fɔgɛt da prɔmis we i bin prɔmis in savant dɛn, dat na Ebraam, Ayzak ɛn Jekɔb, we i bin swɛ to insɛf se in go mek dɛn jɛnareshɔn dɛn bɔku lɛkɛ di sta dɛn na di skay ɛn gi dɛn bɔku, bɔku land we go bi dɛn yon sote go.

¹⁴ PAPA GƆD chenj in maynd ɛn nɔ pɔnish di pipul dɛn igen lɛkɛ aw i bin se.

¹⁵ Mozis go dɔŋ di mawnten. I ol di tu ston tablɛt dɛn nain an we na pan dɛn di kɔmandmɛnt dɛn rayt; ɛn na di tu sayd pan dɛn di kɔmandmɛnt bin rayt.

¹⁶ Na PAPA GƆD mek di tablɛt dɛn, ɛn nainsɛf sɛf rayt pan dɛn.

¹⁷ Jɔshwa yɛri di pipul dɛn de mek lawd, lawd nɔys, so i tɛl Mozis se i tan lɛkɛ fɔ se na wa in de yɛri dɔŋ di kamp.

¹⁸ Mozis ansa se di kayn nɔys we in de yɛri nɔto di kayn nɔys we pipul kin mek we dɛn win ɔ we dɛn gɛt big, big lɔsis, bɔt na siŋ in yɛri.

¹⁹ Wɛn Mozis rich nia di kamp ɛn si di gold kaw lay lay gɔd ɛn di pipul dɛn de dans, i so vɛks dat i trowe di ston tablɛt dɛn dɔŋ di mawnten. Di tablɛt dɛn skata ɛn brok pispis.

²⁰ I tek di gold kaw lay lay gɔd we dɛn mek, mɛlt am ɛn gren am to pawda; dɔn i put am na wata ɛn gi ɔl di Izrɛlayt dɛn fɔ drink am.

²¹ Nain i aks Erɔn uskayn tin di pipul dɛn du am so we mek i mek dɛn du da kayn bad bad tin de.

²² Erɔn beg Mozis lɛ i nɔ vɛks pan am. I se Mozis insɛf no se di pipul dɛn lɛk fɔ du bad.

²³ I se na dɛn tɛl am se lɛ i mek gɔd fɔ dɛn we go de lid dɛn, bikɔs da man Mozis we pul dɛn kɔmɔt na Ijipt, dɛn nɔ no wetin dɔn apin to am.

²⁴ So, in tɛl dɛn se if ɛnibɔdi gɛt gold lɛ dɛn gi am. I se dɛn gi am di gold, ɛn wɛn i ib am na faya, nain di kaw lay lay gɔd kɔmɔt.

²⁵ Mozis si se di pipul dɛn dɔn lɔstrak ɛn dɔn shem to dɛn ɛnimi, ɛn na Erɔn kɔz dat,

²⁶ so i go tek in stand na di domɔt fɔ go na di kamp ɛn ala se, “Ɔl dɛn wan we de na PAPA GƆD in say una kam oba to mi!” So ɔl dɛn wan we na Livay fambul krɔs go oba to Mozis,

²⁷ nain i se, “Izrɛl PAPA GƆD se, ɔlman fɔ ol in sɔd ɛn waka insay di kamp frɔm dis get to di ɔda get ɛn kil in brɔda, in padi ɛn in neba.”

²⁸ Di man dɛn we na Livayt du wetin Mozis se. Na bɔt sɔm tri tawzin man dɛn dɛn kil da de, de.

²⁹ Mozis tɛl di Livayt dɛn se, dɛn ɔl dɔn Ɔden da de de, fɔ de sav PAPA GƆD bikɔs dɛn dɔn sakrifays dɛn bɔypikin dɛn ɛn dɛn brɔda dɛn, ɛn PAPA GƆD dɔn blɛs dɛn fɔ dat.

³⁰ Di nɛks de Mozis tɛl di pipul dɛn se dɛn dɔn sin bad bad wan to PAPA GƆD, so in de go ɔp di mawnten bak to PAPA GƆD. I se sɔntɛm PAPA GƆD go fɔgiv dɛn sin.

³¹ Mozis go ɔp to PAPA GƆD ɛn beg am se, di pipul dɛn dɔn sin bad bad wan agens am we dɛn tek gold mek gɔd.

³² I beg am lɛ i fɔgiv dɛn sin, bɔt if i nɔ de du am, lɛ i pul in nem kɔmɔt nain buk,

³³ bɔt PAPA GƆD ansa Mozis se na udat sin agens am nain nem i de pul kɔmɔt nain buk.

³⁴ PAPA GƆD tɛl am se lɛ i lid di pipul dɛn go na di ples we i dɔn tɛl am fɔ go. I se in enjɛl go de bifo am fɔ de gayd am. I se di tɛm we in go rɛdi fɔ dɛn i go pɔnish dɛn fɔ dɛn sin.

³⁵ PAPA GƆD pɔnish di pipul dɛn bikɔs dɛn mek Erɔn mek gold kaw lay lay gɔd fɔ dɛn.