Ɛksodɔs 26 - Krio Fɔs Oli Baybul

Aw Fɔ Bil Di Tɛnt We PAPA GƆD Fɔ De

¹ “Dɔn igen, yu fɔ mek di tɛnt we a de de wit tɛn piɔ fayn linin matirial. Yu fɔ yuz rɛd, blu ɛn pɔpul matirial. Yu fɔ dizayn Chɛryubim pan am.

² Ich wan pan di tɛn pis matirial fɔ bi fotin yad bay tu yad.

³ Yu fɔ jɔyn fayv togɛda fɔ mek wan sɛt, dɔn yu fɔ du di sem wit di ɔda fayv.

⁴ Tek blu matirial mek lup ɛn so am na di ɛj pan di klos we ɛŋ na di do pan di fɔs sɛt. Dɔn di wan we de insay insɛf fɔ gɛt di sem kayn lup.

⁵ Na fifti lup dɛn ɔl fɔ gɛt ɛn dɛn fɔ de fesin dɛn kɔmpin.

⁶ Fiks fifti uk pan di lup dɛn, ɛn jɔyn dɛn ɔl togɛda. Wɛn yu du dat, di tɛnt go tɔn to wanol pis.

⁷ Yuz got ia fɔ mek kɔba fɔ di tɛnt. Yuz ilɛvin pis got ia fɔ mek am.

⁸ Di kɔba fɔ bi fiftin yad lɔŋ ɛn tu yad wayd.

⁹ So di fayv pis fɔ mek wan, dɔn yu so di ɔda siks fɔ mek ɔda wan. Di wan we mek siks, yu fɔ fol am tu ɛn put am bifo di tɛnt.

¹⁰ Mek fifti lup pan di klos we de na do, ɛn fifti lup pan di ɔda sɛt.

¹¹ Mek fifti bras uk, uk dɛn pan di lup ɛn jɔyn ɔl togɛda fɔ lɛ i go tan lɛkɛ wan klos we ɛŋ.

¹² Di af pis we lɛf pan di klos fɔ ɛŋ biɛn di tɛnt.

¹³ Di af fɔ kɔba ɔlsay pan di tɛnt.

¹⁴ “Mek tu mɔ kɔba fɔ di tɛnt. Di wan fɔ bi ship kanda we dɛn day wit rɛd, dɔn di ɔda wan fɔ bi got kanda.

¹⁵ “Yuz akeshia bod mek frem dɛn. Mek dɛn tinap tret.

¹⁶ Ɔl di frem fɔ bi fiftin fut lɔŋ ɛn twɛnti-sɛvin inchis wayd.

¹⁷ Ɛn dɛn ɔl ich fɔ gɛt tu fut we shap lɛkɛ pɛg fɔ wɛr insay silva bes.

¹⁸ Yu fɔ mek twɛnti frem fɔ wan sayd,

¹⁹ ɛn fɔti silva bes we di frem go sidɔm pan. Ɔl di frem fɔ gɛt tu bes ɔnda dɛn fɔ sidɔm pan.

²⁰ Dɔn di ɔda sayd pan di tɛnt fɔ gɛt twɛnti frem

²¹ wit insɛf yon fɔti silva bes fɔ sidɔm pan, tu bes ɔnda wan frem.

²² Fɔ di tɛnt in bak, mek siks frem.

²³ Mek tu frem fɔ dɛn bak kɔna na di tɛnt.

²⁴ Dɛn frem dɛn na di kɔna fɔ jɔyn frɔm bɔtɔm te rich ɔp. Na so di ɔda wan dɛnsɛf fɔ bi.

²⁵ So na et frem gɛt fɔ de ɔltogɛda wit dɛn sikstin silva bes, tu, tu ɔnda dɛn ɔl.

²⁶ “Yuz akeshia bod mek fiftin krɔsba; fayv na di lɛft sayd pan di tɛnt,

²⁷ fayv na di rayt, ɛn fayv na di bak.

²⁸ Di midul krɔsba in fɔ de pantap di frem, in fɔ lɔŋ frɔm wan ɛnd te rich di ɔda ɛnd na di tɛnt.

²⁹ Yuz gold fɔ kɔba di frem dɛn. Fiks gold lup, fo pan dɛn fɔ ol di krɔsba. Di krɔsba dɛnsɛf fɔ kɔba wit gold.

³⁰ Yu fɔ put di tɛnt tret wan lɛkɛ aw a bin sho yu na di mawnten.

³¹ “Mek klos fɔ ɛŋ wit fayn linin matirial. I fɔ gɛt blu, pɔpul ɛn rɛd trɛd pan am. Dɔn fɛn sɔmbɔdi we go dizayn Chɛryubim pan am.

³² Yu fɔ ɛŋ di klos pan di fo pila dɛn we yu tek akeshia bod mek. Di pila dɛn fɔ kɔba wit gold, dɔn dɛn fɔ gɛt uk dɛn na di sayd. Di pila dɛn fɔ sidɔm pan fo silva bes dɛn.

³³ Ɛŋ di klos pan di uk dɛn na di tɛnt in ruf, dɔn yu put di Kɔvinant Bɔks we nainsay de di tu ston tablɛt dɛn de biɛn am. Dis klos go sɛpret di oli ples frɔm di say we oli pas ɔl.

³⁴ Dɔn yu put di Kɔvinant Bɔks in kɔba pan am.

³⁵ Put di tebul we na pan am dɛn kin dɛdiket bred to PAPA GƆD na di oli ples ɔp say, dɔn yu put di stand fɔ di lamp dɔŋ say.

³⁶ “Yu fɔ mek ɔda klos fɔ ɛŋ na di domɔt fɔ go insay di tɛnt. Yu fɔ yuz fayn linin matirial. I fɔ gɛt blu, pɔpul ɛn rɛd kɔla pan am. Dɛn fɔ kushe am fayn wan.

³⁷ Fɔ di post dɛn we dis klos de sidɔm pan, yuz fayv akeshia bod ɛn kɔba dɛn wit gold. Put gold uk pan dɛn. Yuz bras fɔ mek fayv bes fɔ di post dɛn.