Ɛksodɔs 25 - Krio Fɔs Oli Baybul

Di Matirial Dɛn We Dɛn Gi Fɔ Bil Di Tabanakul

¹ PAPA GƆD tɔk to Mozis. I se,

² “Tɛl di Izrɛlayt dɛn se lɛ ɔlman mek kɔntribyushɔn fɔ mi. Ɛnibɔdi we want gi sɔntin fɔ kɛr am go to yu.

³ Di tin dɛn we yu fɔ tek na dɛn an na: gold, silva, ɛn bras;

⁴ yu fɔ tek blu, pɔpul ɛn rɛd wul matirial wit matirial we na got ia dɛn tek mek am.

⁵ Yu fɔ tek ship kanda we dɛn day wit rɛd; got kanda, akeshia bod,

⁶ ɔyl fɔ di lamp dɛn, difrɛn plant dɛn wit fayn smɛl fɔ mek di ɔyl we fɔ tek anɔynt, ɛn insɛns,

⁷ ɔniks ston, ɔda ston dɛn fɔ di eprɔn we di edman pan di man dɛn we de mek sakrifays fɔ pipul sin de wɛr, ɛn fɔ di pawch we kin ɛŋ nain chɛst we na de i de kip di Yurim ɛn di Thumim.

⁸ Di pipul dɛn fɔ mek wan spɛshal ples fɔ mi we na de a go de.

⁹ Yu fɔ mek am akɔdin to di plan we a go gi yu ɛn put ɔl wetin a se fɔ put de.

Di Kɔvinant Bɔks

¹⁰ Na akeshia bod una fɔ tek mek di bɔks. I fɔ bi fɔti fayv inchis lɔŋ, twɛnti sɛvin inchis wayd ɛn twɛnti-sɛvin inchis ay.

¹¹ Una fɔ kɔba am wit piɔ gold insay ɛn ɔlɔbɔt rawnd am.

¹² Una fɔ mek fo gold riŋ dɛn ɛn una go fiks tu na ɔl di sayd dɛn.

¹³ Dɔn una fɔ tek akeshia tik mek pol dɛn ɛn kɔba dɛn wit gold.

¹⁴ Una fɔ wɛr di pol dɛn insay di riŋ na di bɔks in sayd. Na so una go du fɔ tot di bɔks.

¹⁵ Di pol dɛn fɔ lɛf pan di riŋ na di bɔks ɛn dɛn nɔ fɔ kɔmɔt de.

¹⁶ Una fɔ put di tu ston tablɛt dɛn we di kɔmandmɛnt dɛn rayt pan insay di bɔks.

¹⁷ “Una fɔ mek gold kɔba fɔ di bɔks. I fɔ bi fɔti-fayv inchis lɔŋ ɛn twɛnti-sɛvin inchis wayd.

¹⁸ Una fɔ mek tu gold chɛryubim Dɛn fɔ ama fayn lɛ gɛt fayn shep,

¹⁹ ɛn put dɛn pantap di bɔks in kɔba. Wan pan di Chɛryubim fɔ de na wan say, dɔn di ɔda wande na di ɔda say. Dɛn fɔ fasin pan di bɔks in kɔba.

²⁰ Di Chɛryubim fɔ tret dɛn fɛda ɔp lɛ dɛn kɔba di bɔks in kɔba, ɛn dɛn fɔ tɔn dɛn fes to dɛn kɔmpin. Dɛn fɔ bɛn dɛn fɔs dɛn dɔŋ de luk di bɔks in kɔba.

²¹ Yu fɔ put di tu ston tablɛt dɛn insay di bɔks ɛn tek di kɔba, kɔba am.

²² A go de kam dɔŋ de kam mit yu. A go de oba di kɔba midul di tu Chɛryubim we de pantap di bɔks. Na de a go de fɔ de tɔk wit yu ɛn gi yu ɔl mi lɔ dɛn fɔ di Izrɛlayt dɛn.

Di Tebul Fɔ Di Bred We Dɛn De Gi To PAPA GƆD

²³ “Tek akeshia bod mek tebul. I fɔ bi tati-et inchis lɔŋ, etin inchis wayd, ɛn twɛnti-sɛvin inchis ay.

²⁴ Yu fɔ kɔba am wit piɔ gold ɛn di ɛj dɛn ɔl fɔ bi gold.

²⁵ Yu fɔ mek gold frem rawnd am. Di frem fɔ bi tri inchis wayd.

²⁶ Mek fo riŋ ɛn put dɛn na di fo kɔna pan di tebul nia in fut dɛn.

²⁷ Nainsay dɛn riŋ dɛn de, di pol dɛn fɔ pas fɔ tot di tebul.

²⁸ Di tik dɛn fɔ bi akeshia bod, ɛn dɛn fɔ kɔba wit gold.

²⁹ Mek plet, kɔp, jɔg ɛn bol dɛn fɔ mek wayn sakrifays. Ɔl dɛn tin yaso fɔ bi gold.

³⁰ Yu fɔ put di bred we fɔ ɔfa to PAPA GƆD na di tebul fɔ mi ɛvri de, ɛn di tebul nɔ fɔ kɔmɔt bifo di Kɔvinant bɔks.

Di Stand Fɔ Put Lamp

³¹ “Yu fɔ mek stand fɔ put lamp wit piɔ gold. Dɛn fɔ mol am fayn ɛn gi am fayn shep. Di kɔp fɔ di ɔyl, ɛn di flawa dɛn we dɛn de tek dɛkɔret am ɔl fɔ fasin pan am.

³² I fɔ gɛt siks an dɛn, di lɛft fɔ gɛt tri, di rayt gɛt tri.

³³ Kav siks kɔp we shep lɛkɛ almɔn flawa wit in lif dɛn ɔl rawnd am; di lɛft fɔ gɛt tri, dɔn di rayt gɛt tri.

³⁴ Di stand fɔ put di lamp in men stɛm fɔ gɛt tu fayn almɔn flawa wit lif ɛn flawa we wan bɔs.

³⁵ I fɔ gɛt wan smɔl flawa we wan bɔs ɔnda ɔl di big almɔn flawa dɛn na di ɔda an dɛn.

³⁶ Di stand fɔ di lamp in kɔp, in flawa, in an dɛn, ɔl fɔ bi wan pis piɔ gold we dɛn mol fayn, fayn wan.

³⁷ Mek sɛvin lamp fɔ di stand ɛn put dɛn pantap am fɔ lɛ dɛn go de sho layt bifo.

³⁸ Di sizɔs fɔ trim di wik, ɛn di tre dɛnsɛf fɔ bi piɔ gold.

³⁹ Na bɔt sɔm tati-fo kilo gold yu fɔ yuz fɔ mek di stand fɔ di lamp ɛn ɔl wetin fɔ yuz pan am.

⁴⁰ Tek tɛm mek am lɛkɛ aw a sho yu ɔp di mawnten fɔ mek am.